بيىلعى جاز بۋراباي كۋرورتتى ايماعىنداعى حال-احۋالدى كادىمگىدەي سىنعا سالدى. ءارتۇرلى جيىنداردا ايتىلىپ جۇرگەن دەرەكتەر بويىنشا, جازعى ماۋسىمدا رەسەيدەن عانا 150-200 مىڭداي ادام ءوز كولىكتەرىمەن رەسمي جانە «جابايى» تۇردە دەمالىسقا كەلەدى ەكەن. اڭگىمەنى جول قاتىناسىنا, ياعني بۋرابايعا جەتۋ ماسەلەسىنە بۇرساق, كوكشەتاۋ اۋەجايىنىڭ ماڭىزدىلىعى ارتا تۇسەدى. مەملەكەتتىك كوميسسيا 30 نىساننان تۇراتىن قايتا قۇرۋ قۇرىلىستارىن قابىلداۋ جۇمىسىنا كىرىسىپ كەتتى. وسى ورايدا, جۇرتشىلىق جاڭا اۋەجايدىڭ الەۋەتى قانداي بولاتىنىن دا بىلگىسى كەلەدى.
بيىلعى جاز بۋراباي كۋرورتتى ايماعىنداعى حال-احۋالدى كادىمگىدەي سىنعا سالدى. ءارتۇرلى جيىنداردا ايتىلىپ جۇرگەن دەرەكتەر بويىنشا, جازعى ماۋسىمدا رەسەيدەن عانا 150-200 مىڭداي ادام ءوز كولىكتەرىمەن رەسمي جانە «جابايى» تۇردە دەمالىسقا كەلەدى ەكەن. اڭگىمەنى جول قاتىناسىنا, ياعني بۋرابايعا جەتۋ ماسەلەسىنە بۇرساق, كوكشەتاۋ اۋەجايىنىڭ ماڭىزدىلىعى ارتا تۇسەدى. مەملەكەتتىك كوميسسيا 30 نىساننان تۇراتىن قايتا قۇرۋ قۇرىلىستارىن قابىلداۋ جۇمىسىنا كىرىسىپ كەتتى. وسى ورايدا, جۇرتشىلىق جاڭا اۋەجايدىڭ الەۋەتى قانداي بولاتىنىن دا بىلگىسى كەلەدى.
«ەگەمەن قازاقستاننىڭ» اقمولا وبلىسى بويىنشا مەنشىكتى ءتىلشىسى باقبەرگەن امالبەك «كوكشەتاۋ اۋە كومپانياسى» اق پرەزيدەنتى ۋزيفوللا اجىمولداەۆقا:
– ءسىز بۇعان نە دەيسىز؟
– ۇكىمەت قاۋلىسىمەن ششۋچە-بۋراباي كۋرورتتى ايماعىن دامىتۋدىڭ 2012-2013 جىلدارعا ارنالعان جوسپارى بەكىتىلگەن. وندا كوكشەتاۋ اۋەجايىن ارنايى تەحنيكالىق جابدىقتارمەن قامتاماسىز ەتۋ, ۇشاقتار مەن قوسالقى بۋىندارعا قىزمەت كورسەتۋ ماسەلەسىنە 600 ميلليون تەڭگە ءبولۋ قاراستىرىلعان. قازىر تۇبەگەيلى قايتا قۇرۋ جۇمىستارى اياقتالدى. ۇشۋ-قونۋ الاڭى شەتەلدىك قۇرىلعىلاردى ورناتۋمەن قاتار, 2850 مەترگە ۇزارتىلدى. ساعاتىنا 200 جولاۋشىنى قابىلداي الاتىن اەروۆوكزال ەكى تەلەسكوپيالىق تراپ, ليفت جانە ەسكالاتورمەن جابدىقتالدى. مۇندا جولاۋشىلارعا بارلىق قولايلى جاعدايلار جاسالۋمەن بىرگە, تىركەۋ, شەكارالىق جانە كەدەندىك راسىمدەۋ ورىندارى قاراستىرىلعان. اۋەكومپانيا «ايپ» الەمدىك جيناعىنا اۋەجايدىڭ ۇشىپ-قونۋ الاڭى, اپاتتان قۇتقارۋ شارالارى, تەرمينالدار, جولاۋشى جانە جۇك تاسىمالداۋ جونىندەگى انىقتامالارىن تولىق جاريالايدى. اقپاراتتىق بلوك ىسكە قوسۋعا دايىن. سونداي-اق, جىلۋ قازاندىعى مەن تاراتۋ جۇيەلەرىنىڭ, زەرتحانا عيماراتىنىڭ, جانار-جاعارماي ورتالىعى مەن ترانسفورماتور پودستانتسياسى سياقتى نىسانداردىڭ جۇمىستارى اياقتالدى.
قازىردىڭ وزىندە ۇشاقتار الماتى-كوكشەتاۋ-الماتى باعىتىندا اپتاسىنا 4 رەت ۇشسا, كوكشەتاۋ-شىمكەنت-كوكشەتاۋ رەيسى 5 تامىزدان باستاپ جۇماسىنا ەكى رەت قاتىناۋدا. كوكشەتاۋ-وسكەمەن باعىتى بويىنشا اۆياتاسىمالداۋ بار. ەندىگى جەردە اقتاۋ, اتىراۋ, اقتوبە باعىتىندا دەربەس رەيستەر اشىلاتىن بولادى. جۋىردا رەسەيلىك بىرقاتار اۋەكومپانيالاردىڭ, سونداي-اق, ومبى, بارناۋىل, تيۋمەن, ءنوۆوسىبىر قالاسىنىڭ اۋەجايلارى باسشىلارىمەن كەزدەستىك. وندا جاز ايلارىندا رەسەي مەن قازاقستان جاعىنان اۋە قاتىناستارىنىڭ ۇيىمداستىرىلۋى جونىندە ءسوز قوزعالدى. ماسەلەن, تانىمال «ترانساەرو» كومپانياسى ماسكەۋ-كوكشەتاۋ باعىتىمەن اپتاسىنا ەكى رەيس جاساۋعا رۇقسات الدى. سونداي-اق, قازاقستاننىڭ تۋريستىك فيرمالارىمەن بىرگە رەسەي, گەرمانيا مەن بەلارۋستەن چارتەرلىك رەيستەر ۇيىمداستىرۋ جۇمىستارىن قولعا الدىق. الداعى كەزدە گەرمانيا, تۇركيا, قىتاي باعىتىندا اۋە قاتىناستارىن اشۋ نيەتىندەمىز. بۇل ۇمتىلىستارىمىز بۋرابايدىڭ عانا ەمەس, زەرەندى, ساندىقتاۋ اۋداندارىنداعى تۋريستىك يندۋستريانى دامىتۋعا سەپتىك جاسايتىنى بەلگىلى.
اقمولا وبلىسى.