سەمەيدە «كوكتەم-2020» رەسپۋبليكالىق كوماندالىق-شتابتىق جاتتىعۋى باستالدى.سەمەي اقپاراتتىق ورتالىعى مالىمەتىنشە, شارا اياسىندا «سپارتاك» ستاديونىندا سۋ باسۋ قاۋپىنە قاجەتتى تەحنيكالاردىڭ بايقاۋى ءوتتى. 40 تەحنيكالىق بىرلىك پەن جۇزدەگەن جەكە قۇرامنىڭ مۇشەلەرى ساپ تۇزەدى. جاتتىعۋعا تۇرعىن ءۇي –كوممۋنالدىق شارۋاشىلىعىنىڭ تەحنيكالارى, كولىك قىزمەتى, ۇلتتىق ۇلاننىڭ, جەرگىلىكتى پوليتسيا قىزمەتىنىڭ, توتەنشە جاعدايلار باسقارماسىنىڭ, جەدەل جاردەم قىزمەتىنىڭ, ۆكرك جانە «قازتەلەكوم» بريگادالارى, تۇرعىنداردى ىستىق تاماق جانە قوناق ۇيلەرگە ورنالاستىرۋدى ۇيىمداستىراتىن ۆەتەرينارلىق جانە كاسىپكەرلىك بولىمدەرى قاتىستى. قازىردىڭ وزىندە «تۋريست», «سەمەي» قوناق ۇيلەرىمەن جانە «قاراعايلى» ساۋىقتىرۋ كەشەنىمەن مەموراندۋم جاسالدى. سونىمەن بىرگە «ۆودنىي» كەنتى اۋماعىندا ارنايى وقۋ- جاتتىعۋ وتكىزدى.
بۇگىنگى كۇننىڭ نەگىزگى ماقساتى- سەمەي وڭىرىندە سۋ باسۋدىڭ الدىن الۋ, جاتتىعۋ بارىسىندا ارىقتاردى, سۋ جۇيەلەرىن قوقىستاردان تازارتۋ, اۆتودرومنايا كوشەسىندەگى بۇزىلعان بەتون كوپىردىڭ قالدىقتارىن الۋ. سونىمەن بىرگە ەرىگەن قار سۋى جينالۋى مۇمكىن دەگەن جەرلەردى تازالاۋ جۇمىستارى جۇرگىزىلەدى. بۇل جۇمىستار شارتتى تۇردە ەمەس, ناقتى اتقارىلادى. بۇل جەرگە ايتارلىقتاي ءتونىپ تۇرعان قاۋىپ جوق. الدىن الۋ شارالارى سۋ باسقان جاعدايدا قاۋىپتى تەزىرەك سەيىلتۋگە دايىندىق ءۇشىن جۇرگىزىلۋدە,-دەيدى تج باسقارماسىنىڭ ازاماتتىق قورعانىس توبىنىڭ اعا وفيتسەرى قىمبات كوپباەۆ.
بۇگىنگى كۇنى تۇرعىن ءۇي سەكتورىندا سۋ باسۋ قاۋپىنىڭ الدىن الۋ اياسىندا قالا كوشەلەرىنەن قار شىعارىلۋدا. قىس باستالعالى 250 مىڭ شارشى قار شىعارىلدى. ورتالىق كوشەلەر قاردان تازارتىلدى. قازىر جەكە سەكتورداعى سەيفۋللين مەن قاجىمۇقان كوشەلەرى قاردان تازارتىلۋدا. جيىنى 450 مىڭ شارشى قار شىعارۋ كۇتىلۋدە. قاۋىپتىلىگى جوعارى دەگەن ايماقتار ناقتىلاندى. اتالعان اۋدانداردا مونيتورينگ جۇرگىزىلىپ, قار شىعارىلۋدا. اكىم كارىز جۇيەلەرى سۋ اعىنىن قالىپتى وتكىزبەيتىن اۋماقتاردا جانە سەلەۆين, اباي مەن قابانباي باتىر كوشەلەرىندەگى جول وتكەلدەرىندە تەحنيكالىق شارالار وتكىزۋ قاجەتتىلىگىن اتاپ ءوتتى.
- اۋا رايىنىڭ بولجامىنا قاراعاندا سۋ باسۋ قاۋپىنە دايىن بولۋىمىز كەرەك. قار وتە كوپ. تۇرعىنداردىڭ ايتۋى بويىنشا, سوڭعى جىلدارى مۇنداي جاعداي قالادا بولماپتى. سوندىقتان سۋ باسۋعا دايىن بولۋىمىز كەرەك. تەحنيكالىق شارالار جاسالدى. دەگەنمەن, قار كۇرت ەرىسە, ينجەنەرلىك جۇيەنىڭ دايىندىعىنا قاراماستان ماسەلە تۋىنداۋى مۇمكىن. سۋ سوراتىن ماشينالارعا تەكسەرۋ جۇرگىزىلدى. قاۋىپتىڭ الدىن الۋدىڭ باستى شاراسى- قاردى شىعارۋ. بۇگىنگى كۇنى 62 تەحنيكا كۇن سايىن قار شىعارىپ جاتىر. بۇل ارينە, از. قار شىعارۋعا قاراجاتىمىز جەتپەيدى. ءبىز وبلىسقا شىعىپ, بىزگە قوسىمشا قاراجات بولۋلەرىن سۇرادىق. ءوتىنىشىمىز قولداۋ تاپتى. كوكتەمدە سۋ سورىپ اۋرە بولعانشا, قاردى قازىردەن شىعارۋعا كۇش سالۋىمىز قاجەت,- دەيدى قالا اكىمى ەرماك ءسالىموۆ.
وقۋ-جاتتىعۋ ەكى كۇنگە جالعاسادى. وسى ۋاقىت ارالىعىندا ناقتى قاۋىپتىڭ الدىن الۋدىڭ بارلىق شارالارىن ابدەن پىسىقتاپ الۋ جوسپارلانعان. تەحنيكانىڭ سانى ەمەس, جۇمىس ساپاسى دا ماڭىزدى ەكەنى باسا ايتىلدى.
سەمەي