قازىرگى تاڭدا «بايقوڭىر» اۋدانىندا سۋ استىندا قالۋى مۇمكىن 12 ۋچاسكەدە 453 تۇرعىن ءۇي بار. توتەنشە جاعداي تۋىنداسا, تاماقتاندىرۋ جانە ۋاقىتشا ورنالاستىرۋ پۋنكتتەرى دايىندالدى. بۇل تۋرالى قالا اكىمدىگىنىڭ رەسمي سايتى حابارلادى.
الداعى كۇندەرى اۋا تەمپەراتۋراسى كوتەرىلىپ, قار ەريدى دەپ كۇتىلۋدە. وسىعان بايلانىستى «بايقوڭىر» اۋدانىنىڭ اكىمدىگى كۇشەيتىلگەن رەجيمدە جۇمىس ىستەيدى. اۋدان باسشىسى نۇربول نۇرساعاتوۆتىڭ تاپسىرماسىمەن جەدەل شتاب قۇرىلدى.
توتەنشە جاعداي ورىن العان جاعدايدا تۇرعىندار تاۋلىك بويى 55-73-76, 55-73-78 تەلەفوندارى بويىنشا «بايقوڭىر» اۋدانى اكىمىنىڭ اپپاراتىنا, سونىمەن قاتار +7 (701) 999-85-75 تەلەفونى بويىنشا كيرپيچنىي, كازگورودوك تۇرعىن الاپتارى بويىنشا اكىمنىڭ باس ينسپەكتورى توقتار حاسەنوۆقا جانە +7 (702) 818-11-88 تەلەفونى بويىنشا ءوندىرىس تۇرعىن الابى بويىنشا اكىمنىڭ باس ينسپەكتورى دارحان سەيىتحانوۆقا حابارلاسا الادى.
قازىرگى كەزدە كوكتەمگى سۋ تاسقىنىنىڭ الدىن الۋ ماقساتىندا جەكە سەكتورداعى قاردى تازالاۋ, شىعارۋ جۇمىستارى ءۇش اۋىسىممەن جۇرگىزىلىپ جاتىر.
كۇن سايىن سۋ دەڭگەيىن تومەندەتۋگە ارنالعان ارىق-ناۋا جۇيەلەرى تازارتىلادى, سۋ باسۋ قاۋپى بار 39 جەكە مەنشىكتى ۇيدە قاجەت بولعان جاعدايدا ستاتسيونارلىق سورعى ستانتسيالارى ورناتىلادى. تجد جانە اۋدان اكىمى اپپاراتىنىڭ قىزمەتكەرلەرى سۋ باسۋ قاۋپى بار پروبلەمالىق ۋچاسكەلەردە تۇراقتى تۇردە تەكسەرۋ جۇمىستارىن جۇرگىزەدى. سونداي-اق جەرگىلىكتى تۇرعىندار اراسىندا قاۋىپسىزدىك ەرەجەلەرىن ءتۇسىندىرۋ جۇمىستارى قولعا الىندى.