وتكەن اپتانىڭ سوڭىندا دۋبايداعى ءتۋرنيردىڭ فينالىندا ونەر كورسەتكەن قازاقستاندىق تەننيسشى ەلەنا رىباكينا سول مەجەگە جەتكەنى ءۇشىن 372 200 اقش دوللارى كولەمىندە سىياقى الدى.
وسىلايشا, جەرلەسىمىزدىڭ تاپقان تابىسى 1 ميلليوندىق مەجەدەن استى. ناقتىلاپ ايتساق, بۇل كۇندەرى الەمنىڭ 17 راكەتكاسى اتانىپ وتىرعان ەلەنا ءتۇرلى تۋرنيردەگى ءوزىنىڭ ايشىقتى ونەرىنىڭ ارقاسىندا 1 164 376 دوللاردى قالتاعا باستى.
ءبىر عاجابى, بۇل كۇندەرى دوحادا ءوتىپ جاتقان ءتۋرنيردىڭ العاشقى اينالىمدا رۋمىنيالىق سورانا كىرستيانى ءۇش سەتتىك سايىستا ۇتقان ول 2020 جىلى جالاۋى جەلبىرەگەن WTA جارىستارىندا جەڭىستەرىنىڭ سانىن 20-عا جەتكىزدى. بۇعان دەيىن ءدال وسىنداي ناتيجەگە وسىدان باقانداي 11 جىل بۇرىن رەسەيلىك ەلەنا دەمەنتتەۆا قول جەتكىزگەن ەدى. سونىمەن قاتار رىباكينا قازاقستاننىڭ تۋى استىندا ونەر كورسەتكەن كەزەڭدە WTA تۋرنيرلەرىندە ءبىر مارتە باس جۇلدەنى ولجالاپ, ءۇش رەت فينالعا شىقتى.
كاتاردىڭ باس شاھارىندا ءوتىپ جاتقان ءدۇبىرلى دودانىڭ ەكىنشى اينالىمىندا ەلەنا رىباكينا الەمنىڭ 62 راكەتكاسى بەلگيالىق اليسون ۆان ۋيتۆانكپەن شەبەرلىك بايقاسادى.