احمەت بايتۇرسىن ۇلى اتىنداعى قوستاناي مەملەكەتتىك ۋنيۆەرسيتەتىندە كوپ جىلدان بەرى ءداستۇرلى ونەر مەكتەپتەرى جۇمىس ىستەپ كەلەدى. ولاردىڭ جاستارعا تاربيەلىك ىقپالى زور. ماسەلەن, ۋنيۆەرسيتەت تابالدىرىعىن اتتاعانعا دەيىن قولىنا دومبىرا ۇستاپ كورمەگەن تالاي جاستىڭ ساباقتان تىس ۋاقىتتا حالىق اقىنى ءاسيا بەركەنوۆانىڭ مەكتەبىنە بارىپ ءجۇرىپ, ءتورت جىلدان سوڭ دومبىراعا كادىمگىدەي باۋىر باسىپ, كۇيشىلىك, انشىلىكتى جانسەرىك ەتىپ العانىن كوردىك.
2000 جىلداردىڭ باسىندا ءبىلىم ورداسىندا «شاڭىراق» دەپ اتالاتىن ستۋدەنتتەر تەاترى قۇرىلعان. قارجىلىق قولداۋ بولماعاندىقتان, وسىدان ءبىر جارىم جىل بۇرىن جابىلىپ قالعان جاستار تەاترى جۇمىسىن قايتا جانداندىردى. وعان وڭىرگە بەلگىلى رەجيسسەر ايساۋلە ابدەشقىزى جەتەكشىلىك ەتەدى. جاستار تەاترى جۋىردا عانا كورەرمەندەرىنە مۇحتار اۋەزوۆتىڭ «اباي» دراماسىن تارتۋ ەتتى. سپەكتاكلدى تاماشالاۋعا ۋنيۆەرسيتەت رەكتورى الما دوسجانوۆا باستاعان عالىم-ۇستازدار, ستۋدەنتتەر كەلدى. قويىلىم كوپشىلىككە ۇنادى. رەكتور شاكىرتتەرگە العىس ءبىلدىرىپ, تەاترعا الداعى ۋاقىتتا دا قارجىلاي قولداۋ كورسەتەتىنىن ايتتى.
پروفەسسور قالقامان جاقىپ تا ساحناعا كوتەرىلىپ, كوپشىلىكپەن «ابايدان» العان اسەرىمەن ءبولىستى:
– ۋنيۆەرسيتەتىمىزدە تاريحي وقيعانىڭ كۋاگەرى بولدىق. شىندىعىندا, ساحنادا ءوزىمىزدىڭ ستۋدەنتتەر ەكەنىن ۇمىتىپ كەتتىم. كادىمگى ءبىر كاسىبي ساحنا شەبەرلەرى ويناعان سياقتى, سول ابايدىڭ داۋىرىنەن ءبىر-اق شىقتىم. ستۋدەنتتەر قاي ءرولدى دە جاقسى سومدادى. ابايدىڭ ايگەرىممەن ىزگى قارىم-قاتىناسى, جاستاردىڭ عاشىقتىق سەزىمدەرى دە اسەرلى شىقتى, – دەدى ۇستاز.