تاعى جەتى گولليۆۋدتىق فيلم قازاق تىلىندە كورسەتىلەتىن بولادى

«بولاشاق» كورپوراتيۆتىك قورى «وزىڭنەن باستا» جوباسى اياسىندا 2011 جىلدان باستاپ Disney, Sony Pictures, Marvel, Lucas Films, Bazelevs جانە ت.ب. ستۋديالاردىڭ 33 كينوكارتيناسىنا دۋبلياج جاساعان. جوبا «مەلومان» كومپانياسىنىڭ قولداۋىمەن جۇزەگە اسىرىلاتىن الەۋمەتتىك جوبا بولىپ تابىلادى جانە كوممەرتسيالىق ماقساتتاردى كوزدەمەيدى. جوبانىڭ جاھاندىق ماقساتى – قازاقستان ازاماتتارىنا الەمدىك ستۋديالاردىڭ كونتەنتىن انا تىلدەرىندە قول جەتىمدى ەتۋ. بۇل – قازاق تىلىندە ساپالى كونتەنتتى جاساۋ, قازاق تىلىندە سويلەيتىن تۇرعىنداردىڭ قازاق تىلىندەگى ساپالى كينوتەاترالدى كونتەنتكە قول جەتكىزۋ قۇقىعىن قورعاۋ, قازاق ءتىلىن الەمدىك كەڭىستىكتە ناسيحاتتاۋ تۋرالى جوبا.

پرەزەنتاتسيا كەزىندە بولاشاق پرەمەرالاردىڭ قازاق تىلىندەگى ترەيلەرى كورسەتىلدى. دۋبلياج اكتەرلەرى, دىبىس رەجيسسەرلەرى, ءماتىن ۇيلەستىرۋشىلەر ءوز ىستەرىنىڭ قىر-سىرىمەن ءبولىستى, ال ۇيىمداستىرۋشىلار مەن سەرىكتەستەر جوبانىڭ ەرەكشەلىكتەرى مەن ونى جۇزەگە اسىرۋدىڭ ناتيجەلەرى تۋرالى ءسوز قوزعادى. ءىس-شاراعا جوبانىڭ ۇيىمداستىرۋشىلارى, سونىڭ ىشىندە «بولاشاق» قورىنىڭ قامقورشىلار كەڭەسىنىڭ ءتورايىمى دينارا ءشايجۇنىسوۆا, «Aray Media Group» ستۋدياسى, «BI Group» كومپانياسىنىڭ وكىلدەرى, سونداي-اق دۋبلياج اكتەرلەرى, دۋبلياج ماماندارى, جوباعا جانكۇيەر جۋرناليستەر, بلوگەرلەر, قوعامدىق قايراتكەرلەر قاتىستى.

- سۇيىكتى كەيىپكەرلەرمەن قازاق تىلىندە قارىم-قاتىناس جاساي وتىرىپ, ءبىزدىڭ بالالار مەملەكەتتىك تىلدە كوبىرەك سويلەۋگە ۇمتىلاتىن بولادى. ءبىز بالالارعا ارنالعان انيماتسيالىق فيلمدەردى قازاق تىلىندە كورسەتۋدى قولداۋ ماقساتىندا كينوتەاترلار ءۇشىن سالىقتىق جەڭىلدىكتەر, مىسالى, مۇنداي سەانستاردى كورەرمەندەرگە ىڭعايلى ۋاقىتتا قويۋعا ىنتالاندىرار ەدى دەپ ەسەپتەيمىز. «ميراس» رەسپۋبليكالىق قوعامدىق كەڭەسىنىڭ الاڭىندا «Nur Otan» پارتياسىمەن بىرلەسە وتىرىپ, ءبىز قر ۇكىمەتىنە دىبىستالعان كينونى كورسەتۋدى قولداۋ جانە ازاماتتاردىڭ كينوتەاتر كونتەنتىنە قازاق تىلىندە تەڭ جاعدايدا قول جەتكىزۋ بولىگىندە ۇسىنىستار ەنگىزدىك. ءبىز وسى ماسەلەلەر بويىنشا قر پرەمەر - ءمينيسترىنىڭ تاپسىرماسى شىققانىن بىلەمىز جانە جاقىن ارادا وسى ماسەلەلەر بويىنشا قر مادەنيەت جانە سپورت مينيسترلىگى اتىنان ۋاكىلەتتى ورگاننىڭ بەلسەندى جانە ساپالى قاتىسۋىن كۇتەمىز, –  دەپ اتاپ ءوتتى «بولاشاق» قورىنىڭ قامقورشىلار كەڭەسىنىڭ ءتورايىمى دينارا ءشايجۇنىسوۆا.

جوبا سەرىكتەستەر مەن دەمەۋشىلەر قولداۋىنىڭ ارقاسىندا جۇزەگە اسىرىلادى. جوبا سەرىكتەستەرى: «مەلومان» كومپانياسى, KINOPARK كينوتەاترلار جەلىسى, ivi جانە Megogo ونلاين كينوتەاترلارى. قازىرگى تاڭدا ivi ينتەرنەت-كينوتەاترىندا گولليۆۋد فيلمدەرىن قازاق تىلىندە كورۋگە بولادى, جانە جاقىندا ولاردىڭ قاتارىن وسى جىلدىڭ 7 پرەمەراسى تولىقتىرادى. ءارتۇرلى جىلدارى ERG ەۋرازيالىق كومپانيالار توبى, «التىن قىران» كومپانيالار توبى, «سامرۇق-قازىنا» ۇاق» اق, «DAMU Logistics» اق, «بايتەرەك» ۇبح اق,  Kassa Nova Bank, «دامۋ» كاسىپكەرلىكتى دامىتۋ قورى» اق, «قازاقستان قۇرىلىس جيناقتاۋ بانكى» اق, «Ordabasy group» جشس جانە ت.ب. جوبا دەمەۋشىلەرى بولدى. 2020 جىلى فيلمدەردى دۋبلياجداۋ دەمەۋشىسى «BI Group» كومپانياسى بولدى. بۇل كومپانيا بۇرىن دا بىرنەشە ءفيلمنىڭ دەمەۋشىسى بولعان.

- قازاق ءتىلى – ءبىزدىڭ بايلىعىمىز, حالىقتىڭ رۋحى, تاريحي جانە مادەني قۇندىلىق. BI Group حولدينگى ءۇش جىلدان بەرى «وزىڭنەن باستا» جوباسىن قولداپ كەلەدى. وسى ۋاقىت ىشىندە قۇنى 800 ميلليون تەڭگەگە جۋىق 15 تانىمال فيلم اۋدارىلىپ, دىبىستالدى. قارجىلاي كومەك بەرە وتىرىپ, ءبىز تەك انا ءتىلىمىزدى دامىتۋعا قاراجات جۇمسامايمىز. بەلسەندى الەۋمەتتىك-قايىرىمدىلىق قىزمەتپەن اينالىسا وتىرىپ, ءبىزدىڭ كومپانيا قازاقستاندىق بالالار ءۇشىن ساپالى شەتەلدىك كينوكونتەنتپەن تانىسۋعا مۇمكىندىك بەرەدى. ءبىز مەملەكەتتىك تىلگە قامقورلىق جاساۋدىڭ ماڭىزدىلىعىن تۇسىنەمىز: كوپتەگەن جوبالارىمىزدا قازاقشا اتاۋلار بار, جانە اباي قۇنانباەۆتىڭ 175 جىلدىعىنا وراي ءبىز جاڭا «اسىل مۇرا» تۇرعىن ءۇي كەشەنىن ىسكە قوستىق. سونداي-اق حولدينگتىڭ الەۋمەتتىك جەلىلەرى مەن قىزمەتكەرلەرگە ارنالعان پورتالى ەكى ءتىلدى دە جۇرگىزىلەدى, – دەدى BI Development باس ديرەكتورىنىڭ قارجى جونىندەگى ورىنباسارى قايرات شاياحمەتوۆ.

9 جىل ىشىندە «وزىڭنەن باستا» جوباسىنىڭ اينالاسىندا الەمدىك كينونى انا تىلىندە كورۋ وتە ماڭىزدى ادامداردىڭ قاۋىمداستىعىن قالىپتاستىردى. 9 500 000 جازىلۋشى اۋديتورياسى بار 100-دەن استام قازاقستاندىق مەديا-تۇلعا ءبىزدىڭ جوبامىزدى قولدايدى. 2018 جىلى پىكىر كوشباسشىلارى ونلاين-داۋىس بەرۋدى ۇيىمداستىرىپ, وعان 35 000-عا جۋىق ازامات قاتىستى. ولاردىڭ بارلىعى فيلمدەردى قازاق تىلىندە ەلىمىزدىڭ كينوتەاترلارىندا ىڭعايلى ۋاقىتتا كورۋ مۇمكىندىگىنە داۋىس بەردى. دۋبلياجدالعان فيلمدەردى بارلىعى 170 000-نان استام كورەرمەن قارادى. ءبىز ەلوردا مەن وڭىرلەردە 100-دەن اسا قايىرىمدىلىق كينوكورسەتىلىم وتكىزدىك. «مۇزدى ولكە 2» ءفيلمىن (2019 ج.) 26 900 ادام قاراپ, جوبا تاريحىندا كورەرمەندەردىڭ رەكوردتىق سانىن جينادى.

قازاقستاندا العاش رەت «بولاشاق» قورى بەيىمدەلگەن كينوكورسەتىلىمدەر تاجىريبەسىن ەنگىزدى. 2018 جىلدان باستاپ ءبىز جىل سايىن اۋتيزم جانە دامۋدىڭ باسقا دا ەرەكشەلىكتەرى بار بالالارعا ارنالعان بەيىمدەلگەن كينوكورسەتىلىمدەر وتكىزەمىز.