بۇرناعى كۇنى الماتى وبلىسىنداعى «ىلە» پوليگونىندا «دالا قىرانى» حالىقارالىق ءبىتىمگەرشىلىك وقۋ-جاتتىعۋى باستالدى. ونىڭ اشىلۋ سالتاناتىنا قورعانىس مينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى, گەنەرال-پولكوۆنيك ساكەن جاسۇزاقوۆ, قاتىسۋشى ەلدەر قولباسشىلىعىنىڭ وكىلدەرى جانە ءبىر توپ شەتەلدىك باقىلاۋشىلار قاتىستى.
بۇرناعى كۇنى الماتى وبلىسىنداعى «ىلە» پوليگونىندا «دالا قىرانى» حالىقارالىق ءبىتىمگەرشىلىك وقۋ-جاتتىعۋى باستالدى. ونىڭ اشىلۋ سالتاناتىنا قورعانىس مينيسترىنىڭ ءبىرىنشى ورىنباسارى – قازاقستان رەسپۋبليكاسى قارۋلى كۇشتەرى باس شتابىنىڭ باستىعى, گەنەرال-پولكوۆنيك ساكەن جاسۇزاقوۆ, قاتىسۋشى ەلدەر قولباسشىلىعىنىڭ وكىلدەرى جانە ءبىر توپ شەتەلدىك باقىلاۋشىلار قاتىستى.
«دالا قىرانى» تاكتيكالىق-ارنايى ءبىتىمگەرشىلىك وقۋ-جاتتىعۋى قازاقستان رەسپۋبليكاسى مەن ناتو اراسىنداعى ارىپتەستىك قيمىلدارىنىڭ دەربەس جوسپارىن جۇزەگە اسىرۋ, سونداي-اق «بەيبىتشىلىك ءۇشىن ارىپتەستىك» باعدارلاماسى شەڭبەرىندە وتكىزىلىپ كەلەدى.
العاشقى «دالا قىرانى» وقۋ-جاتتىعۋى وسىدان ون جىل بۇرىن, ياعني 2003 جىلى, ءدال وسى جەردە وتكىزىلگەن ەدى. مىنە, سودان بەرى وعان قاتىسۋشىلاردىڭ سانى جىل ساناپ ارتىپ كەلەدى. بيىل ونىنشى رەت وتكىزىلىپ وتىرعان وقۋ-جاتتىعۋعا قازاقستان, اقش, ۇلىبريتانيا, ليتۆا, شۆەيتساريا, يتاليا, قىرعىزستان, تاجىكستان مەملەكەتتەرى قارۋلى كۇشتەرىنىڭ وكىلدەرى قاتىسادى. جاتتىعۋلاردىڭ بارىسىن يسپانيا, گەرمانيا جانە بەلارۋس رەسپۋبليكاسىنىڭ باقىلاۋشىلارى باقىلايتىن بولادى.
بۇل جولعى جاتتىعۋعا قازاقستان جاعىنان «قازبات» بىتىمگەرشىلىك باتالونى تولىق قۇرامدا, «قازبريگ» بىتىمگەرشىلىك بريگاداسىنىڭ شتابى جانە قازاقستان قارۋلى كۇشتەرى اەروۇتقىر اسكەرلەرى قولباسشىسى باسقارماسىنىڭ اسكەري قىزمەتشىلەرى تارتىلعان. سونىمەن قاتار, قۇرلىق اسكەرلەرى جانە اۋە قورعانىسى كۇشتەرىنىڭ بولىمشەلەرى دە بولادى.
«قازبريگ» بىتىمگەرشىلىك بريگاداسىنىڭ وقۋ ورتالىعىندا باستالعان وسى جيىننىڭ نەگىزگى ماقساتى – كومانديرلەر مەن شتابتاردىڭ بىتىمگەرشىلىك وپەراتسيالارىن جۇرگىزۋ بارىسىندا بولىمشەلەر اراسىنداعى ءوزارا ءىس-قيمىل مەن شەشىم قابىلداۋدى ۇيىمداستىرۋداعى تاجىريبەلىك داعدىلارىن جەتىلدىرۋگە باعىتتالعان. سونىمەن قاتار, ءبولىمشەلەر قارسىلاس تاراپتار اراسىنداعى قاقتىعىس جاعدايىندا بەيبىتشىلىكتى قولداۋ بويىنشا جاۋىنگەرلىك ۇيلەسىمدىلىگىن دە ارتتىراتىن بولادى.
«ەگەمەن-اقپارات».