زاڭناماعا سايكەستىگىن انىقتاۋدى سۇرادى
استراحان وبلىستىق دۋماسىنىڭ دەپۋتاتى ولەگ شەين ماسكەۋ پروكۋراتۋراسىنىڭ باسشىسى سەرگەي كۋدەنەەۆتەن ماسكەۋ قالاسى مەرىنىڭ مىندەتىن ۋاقىتشا اتقارۋشى سەرگەي سوبيانين وتباسىنىڭ اق ءۇي جانىنداعى پاتەردى جەكەشەلەندىرۋىنىڭ زاڭدىلىعىن سۇرادى.
زاڭناماعا سايكەستىگىن انىقتاۋدى سۇرادى
استراحان وبلىستىق دۋماسىنىڭ دەپۋتاتى ولەگ شەين ماسكەۋ پروكۋراتۋراسىنىڭ باسشىسى سەرگەي كۋدەنەەۆتەن ماسكەۋ قالاسى مەرىنىڭ مىندەتىن ۋاقىتشا اتقارۋشى سەرگەي سوبيانين وتباسىنىڭ اق ءۇي جانىنداعى پاتەردى جەكەشەلەندىرۋىنىڭ زاڭدىلىعىن سۇرادى.
دەپۋتاتتىڭ قاداعالاۋشى ورگانعا جولداعان حاتىندا كەزىندە تالاس تۋدىرعان تۇرعىن ءۇي الاڭى قانداي نەگىزگە سۇيەنىپ بەرىلگەندىگىن انىقتاۋ كورسەتىلگەن. شەيننىڭ اتاپ كورسەتۋىنشە, ەگەر پاتەر وعان قىزمەتتىك تۇرعىن جاي رەتىندە بەرىلگەن بولسا, ءسوبيانيننىڭ دە, ونىڭ قىزىنىڭ دا پاتەردى جەكەشەلەندىرۋگە قۇقىعى جوق. بۇعان فەدەرالدى زاڭنامالاردا تىيىم سالىنعان. ءسوبيانيننىڭ قىزىنىڭ ماسكەۋدىڭ ورتالىعىندا اۋماعى 300 شارشى مەتردەن اساتىن پاتەرى بار ەكەندىگى جانە ونىڭ جەكەشەلەندىرىلگەنى جونىندەگى اقپاراتتى قالا مەرىنە كانديدات الەكسەي ناۆالنىي ءوزىنىڭ بلوگىنا ورنالاستىرعان ەكەن. ونىڭ ايتۋىنشا, پاتەردىڭ نارىقتاعى قۇنى 5 ميلليون دوللارعا جۋىقتايدى.
يزرايل ۇكىمەتى باسشىسىنا وپەراتسيا جاسالدى
وتكەن جەكسەنبىدە يزرايل پرەمەر-ءمينيسترى بينيامين نەتانياحۋگە كىندىكتەگى جارىقتى الىپ تاستاۋعا بايلانىستى وپەراتسيا جاسالدى. جەرگىلىكتى باق-تاردىڭ جازۋىنا قاراعاندا, وپەراتسيا ءساتتى وتكەن.
الپىس ءۇش جاستاعى نەتانياحۋگە شۇعىل وپەراتسيا يەرۋساليمدەگى كلينيكالاردىڭ بىرىندە جاسالعان. پرەمەر-مينيسترگە وپەراتسيا ناركوز ارقىلى نەمەسە ناركوزسىز جۇزەگە اسىرىلعاندىعى ناقتى كورسەتىلمەگەن. جەكسەنبى كۇنى ب.نەتانياحۋ تۇتقىنداعى پالەستينالىق توپتاردى بوساتۋعا بايلانىستى ۇكىمەت وتىرىسىنا قاتىسۋى ءتيىس ەدى. ۇكىمەت اپپاراتىنىڭ حابارلاۋىنشا, وتىرىس كەيىنگە قالدىرىلدى. بۇل تۇتقىنداردى بوساتۋ جونىندەگى كەلىسسوزدەرگە كەرى اسەر ەتپەيدى.
پرەزيدەنت پەن پرەمەر-مينيستر ءسوز قاعىستىرىپ قالدى
گرۋزيا پرەزيدەنتى ميحايل سااكاشۆيلي مەن وسى ەلدىڭ پرەمەر-ءمينيسترى بيدزينا يۆانيشۆيلي باتۋميگە كەلگەن امەريكالىق «بالكلي» اسكەري كورابلىنىڭ بورتىنداعى رەسمي قابىلداۋ كەزىندە سوزگە كەلىسىپ قالدى.
«ينتەرفاكس» اگەنتتىگىنىڭ اقپاراتتارى بويىنشا, 11 تامىز كۇنى كەشكىسىن بولعان قابىلداۋ كەزىندە يۆانيشۆيلي 2008 جىلعى وڭتۇستىك وسەتياداعى اسكەري جانجالعا گرۋزيانىڭ بۇرىنعى بيلىگى جاۋاپ بەرەدى, دەپ مالىمدەسە كەرەك. ونىڭ ارتىنشا ءسوز العان سااكاشۆيلي بۇعان كەلىسپەيتىندىگىن ءبىلدىرىپتى. «مەن بۇل سوعىسقا گرۋزين تاراپى جاۋاپتى دەگەن كەز كەلگەن پىكىرگە ءۇزىلدى-كەسىلدى قارسىمىن. مۇنداي پىكىردى گرۋزيانى جاقسى كورمەيتىندەر نەمەسە گرۋزيانىڭ جاۋلارىمەن بايلانىسى بارلار ايتادى», دەپتى.
سەكسەن ادام قۇربان بولدى
يراكتىڭ بىرنەشە قالالارىندا جاسالعان تەررورلىق ارەكەتتەردى «ال كايدا» مۇشەلەرىنەن قۇرالعان «يراك يسلام مەملەكەتى» ۇيىمى مويىندارىنا الدى. بۇل جونىندە «فرانس-پرەسس» اگەنتتىگى حابارلادى.
يسلامدىق سايتتاردىڭ بىرىندە سودىرلار ورنالاستىرعان مالىمدەمەگە قاراعاندا, يراكتاعى تەررورلىق ارەكەتتەر «ارنايى قىزمەتتىڭ وپەراتسيالارىنا جاۋاپ» رەتىندە جاسالىنعاندىعى ايتىلعان. ەلدىڭ باعداد جانە باسقا قالالارىندا 10 تامىزدا 12 رەت جارىلىس جاسالعان. جارىلىستار ورازا ايتتىڭ سوڭعى كۇنى جۇزەگە اسىرىلعان. سونىڭ سالدارىنان 80-گە جۋىق ادام قازا تاۋىپ, 150-دەن استام ادام جارالانعان.
جاڭا اەس سالۋ كەلىسىمىنە قول قويماق
يراننىڭ سىرتقى ىستەر ءمينيسترى الي اكبار سالەحي جۋرناليستەرگە تەھەران مەن ماسكەۋ جاقىن ارادا يراندا جاڭا اتوم ەلەكتر ستانساسىن سالۋ تۋرالى كەلىسىمگە قول قوياتىنىن حابارلادى.
«نوۆوستي» اگەنتتىگىنىڭ اقپاراتتارى بويىنشا, مينيستر تاراپتار وتكىزگەن كونسۋلتاتسيالاردىڭ قورىتىندىسىندا, ولار اتالعان ماسەلە جونىندە ءوزارا تۇسىنىستىك تۋرالى كەلىسىمگە قول قويۋ قاجەت دەگەن شەشىمگە كەلگەن. كەلىسىمگە قول قويۋ مەرزىمىنە قاتىستى ناقتى اقپارات جوق. يران ءمينيسترىنىڭ بۇل مالىمدەمەسىنە رەسەي تاراپىنان قازىرگە تۇسىنىك بەرىلمەدى. بۇدان ءبىراز ۋاقىت بۇرىن يراننىڭ جاڭادان سايلانعان پرەزيدەنتى حاسان رۋحاني تەھەران رەسەيمەن ىنتىماقتاستىق بارىسىندا جاڭا اتوم ەلەكتر ستانساسى قۇرىلىسىن سالۋدى جالعاستىراتىنىن مالىمدەگەن بولاتىن.
پرەمەر ءبىر كۇن تاكسيست بولىپ جۇمىس ىستەدى
نورۆەگيانىڭ پرەمەر-ءمينيسترى يەنس ستولتەنبەرگ ماۋسىم ايىندا وسلو قالاسىندا ءبىر كۇن قۇپيا تۇردە تاكسي جۇرگىزۋشىسى بولىپ جۇمىس ىستەپتى. ونداعى ماقساتى – ءوز سايلاۋشىلارىمەن ەركىن جاعدايدا اڭگىمەلەسىپ, كوپشىلىكتىڭ پىكىرىن ءبىلۋ بولسا كەرەك.
پرەمەر-مينيستر «جۇ مىس» كەزىندە تاكسيستىڭ كيىمىن كيىپ, كوزىنە قارا كوزىلدىرىك تاعىپ العان ەكەن. جولاۋشىلار ونى تانىعان جاعدايدا عانا ول اتى-ءجونىن, لاۋازىمىن ايتقان كورىنەدى. ستولتەنبەرگتىڭ ايتۋىنشا, سەگىز جىلدا العاش رەت اۆتوموبيل رولىنە وتىرعانى وسى بولىپتى. «مەن وسلونىڭ كوشەلەرىن جاقسى بىلەمىن. تاكسيدى جۇرگىزۋ ونشا قيىندىق تۋدىرمادى», دەپتى ساياساتكەر. ونىڭ ءاۆتوموبيلدى باسقارۋ كەزىندەگى قيمىل-قوزعالىسى جاسىرىن كامەراعا ءتۇسىرىلىپتى. ەندى ول وسى جىلدىڭ قىركۇيەگىندە وتەتىن پارلامەنتتىك سايلاۋ ناۋقانىندا كورسەتىلەتىن سياقتى.
قىسقا قايىرىپ ايتقاندا:
وزبەكستاندا جۇمىس ىستەيتىن قىرعىزستان ديپلوماتى قاناتبەك شارشەنبەكتى ونىمەن كوپ قاباتتى ۇيدە بىرگە تۇراتىن كورشىلەرى ماسكۇنەمدىككە سالىنادى جانە ورەسكەل سوزدەر ايتىپ, بالاعاتتايدى دەپ ايىپتادى.
روكاتەند جانارتاۋىنىڭ «مىنەز» كورسەتۋىنە بايلانىستى يندونەزيانىڭ پالۋە ارالىنان 2,5 مىڭ ادام قاۋىپسىز جەرگە كوشىرىلدى. جانارتاۋ سەنبى كۇنى «ويانا» باستاعان.
افينانىڭ سولتۇستىك-شىعىسىندا زاڭسىز ميگرانتتار تۇرىپ جاتقان لاگەردە جانجال شىقتى. لاگەردەگىلەر ونداعى بۇيىمداردى ورتەگەن, سونداي-اق, كۇزەتشىلەرگە شابۋىل جاساعان. وقيعا سالدارىنان 10-نان استام كۇزەتشى زارداپ شەكتى.
ۇندىستاندىقتار ءوز كۇشتەرىمەن تۇرعىزعان «اريحانت» اتتى العاشقى اتوم سۇڭگۋىر قايىعى اشىق تەڭىزدە سىناقتىڭ سوڭعى كەزەڭىنەن وتۋگە دايىن ەكەنىن مالىمدەدى. بۇل ەل بولاشاقتا بەس اتوم سۇڭگۋىر قايىعىن جاساۋدى جوسپارلاپ وتىر.
ينتەرنەت ماتەريالدارى نەگىزىندە ازىرلەندى.