نورۆەگيانىڭ پرەمەر-ءمينيسترى يەنس ستولتەنبەرگ ەلدەگى پارلامەنت سايلاۋى قارساڭىندا وسلو ماڭىنداعى جۇرتپەن ەتەنە ارالاسىپ, ەركىن سويلەسۋ ءۇشىن جاسىرىن تۇردە جارتى كۇن تاكسيست بولدى. بۇل تۋرالى يتار-تاسس حابارلادى.
وسىدان كەيىن ۇكىمەت باسشىسىنىڭ باسقاشا جاعدايداعى ءرولىن, ياعني تاكسيست بولىپ, كولىك تىزگىنىندە وتىرعان شاعىن بەينەلەيتىن روليك نورۆەگيا جۇمىسشىلار پارتياسىنىڭ بەينەپورتالىنا سالىندى. ول بىرنەشە ساعاتتىڭ ىشىندە 11 مىڭ كورەرمەنگە يە بولعان.
كليپتە پرەمەردىڭ كەزەكتى جولاۋشىمەن جاتتاندى سوزدەر تىزبەگىن ايتىپ, باراتىن جەرلەرىن بەلگىلەپ العاسىن, تەرەڭدەۋ تاقىرىپقا – ەلدەگى ءبىلىم بەرۋدىڭ جايىنان باستاپ, بانكتەر مەن كورپوراتسيالار باسشىلارىنىڭ جوعارى ايلىعىنا دەيىنگى ارالىقتاعى اڭگىمەلەرگە بارعانى كورىنىس بەرەدى.
ءبىر قىزىعى, تاكسيگە مىنگەن ءبىر جولاۋشىدان وزگەلەرى وزدەرىن الا بارا جاتقان ەلدىڭ ەڭ جوعارى باسشىسىنىڭ ءبىرى ەكەنىن اڭعارماپتى. تاعى ءبىر ايتاتىنى, ستولتەنبەرگ ايداعان كولىككە مىنگەندەردىڭ بىردە-بىرىنەن جەرىنە جەتكەننەن كەيىن اقشا الىنباپتى.
قازىرگى ءىس باسىنداعى پرەمەر باسقاراتىن جۇمىسشىلار پارتياسى پارلامەنت سايلاۋىنا ءبىر ايعا جەتپەيتىندەي ۋاقىت قالعاندا, داۋىس جيناۋ بويىنشا وزدەرىنىڭ باستى قارسىلاسى – كونسەرۆاتورلاردان ەداۋىر ارتتا كەلەدى ەكەن. سونىمەن بىرگە, ونىڭ كۇشتى ساياسي وداقتاستارى دا جوق. سوندىقتان بۇلار ءۇشىن جۇرتتىڭ سايلاۋعا مەيلىنشە كوبىرەك كەلگەندەرى جاقسى. ال لەيبوريستەر 5 ميلليوندىق حالقى بار نورۆەگيادا سوڭعى كەزدەرى ءالى ەشكىمنىڭ شىلاۋىندا كەتە قويماعان جۇرتتى كىم كوبىرەك تارتىپ اكەتسە, سولار جەڭىسكە جەتەدى دەپ ەسەپتەيدى. بۇل ورايدا 54 جاستاعى ستولتەنبەرگتىڭ ءحاريزمى مەن تانىمالىلىعى كوپ نارسەنى شەشىپ كەتۋگە ءتيىس.
مۇرات ايتقوجا.