حان ءتاڭىرىنىڭ مۇزارت شىڭى مەنمۇندالاپ تۇراتىن دالا اتىرابىندا اقيىق اقىن مۇقاعالي ماقاتاەۆ جىرلاماعان جىلعا دا, قىر مەن ورمان دا جوق.
تۋعان جەردىڭ قاسيەتتى توپىراعىنا دەيىن ايالاي جىرىنا قوسقان اقىننىڭ ءاربىر ولەڭ جولىندا ماحاببات پەن ساعىنىشتىڭ تابى جاتقانى حاق. اقىننىڭ تۋعان كۇنى ءوزى تۋىپ وسكەن قاراساز ماڭىندا مولدىرەپ اعىپ جاتاتىن قاراسۋعا التى اققۋدىڭ قونۋى جىرعا قۇمار ولكەنى ەلەڭ ەتكىزگەنى انىق. وسىناۋ ەرەكشە كورىنىستى تاماشالاعاندا اقيىق اقىن جىرلاعان مىنا ءبىر جىر شۋماقتارى ەرىكسىز ويعا ورالادى.
بەۋ, دۇنيە-اي, اققۋلار ورالعاندا,
ايدىن كولدىڭ يەسى جول العاندا.
جەتىسىپ ءبىر «جەتىم كول» قالۋشى ەدى-اۋ,
تىنۋشى ەدى-اۋ, تەڭسەلگەن قارا ورمان دا.
تايانعاندا اققۋلار قونار ماڭعا,
باسۋشى ەدى-اۋ, بايىزىن بار ارمان دا!
قاناتىنان اققۋدىڭ بالاپانداپ,
Əن ۇشاتىن سىمپىلداپ تاڭ اتاردا.
ءسۇيىنشى بەر دەگەندەي ءبىر تولىقسىپ,
سىبىرلايتىن «جەتىم كول» الاتاۋعا.
تىنا قالىپ بۇلبۇل دا جاعا-تالدا,
قاراي-تۇعىن ايدىنعا, اق وتاۋعا.
تاڭ مەن كۇننىڭ اراسى تايانعاندا,
تاۋدىڭ باسى الاۋمەن بويالعاندا,
تىرىلەتىن تاۋداعى بار تىرشىلىك,
قاناتىنان اققۋدىڭ ويانعان با؟!
بۇل توسىن كورىنىستى قاراسازدىقتار اقيىق اقىننىڭ كەلەر جىلى تۋعانىنا 90 جىل تولۋىنىڭ حابارشىسىنداي قابىلداپ, جاقسىلىقتىڭ جارشىسىنا بالاپ وتىر. «اققۋلاردىڭ مۇقاعالي اعامىزدىڭ تۋعان كۇنى 9 اقپاندا كەلىپ قونۋى قاراساز حالقىنا ەرەكشە جىگەر بەرگەندەي. بۇگىنگى ۇرپاق رۋحاني كەلبەتى ۇلت بولمىسىن ايشىقتاپ تۇرعان الاشتىڭ الىپ تەمىرقازىعىنا اينالعان تۇعىرلى تۇلعا مۇقاعاليدى ەشكىمگە ۇقسامايتىن, ەشكىمدى قايتالامايتىن, ءىنجۋ-مارجان ءسوز قۇدىرەتىن ءوز ورنەگىمەن ەرەكشەلەگەن شىنايى پوەزيا وكىلى رەتىندە تانىدى. قازاقتىڭ قاراپايىم ءتىلىنىڭ ءنارى مەن ءمانىن ابايدان كەيىن ءتۇسىندىرىپ كەتكەن, قازاقتىڭ ولەڭىن مازمۇن مەن ءپىشىن جاعىنان تۇرلەنتكەن اقىن مۇقاعاليدىڭ مۇراسى يگىلىگىمىز عانا ەمەس, قاستەرلەپ قادىرلەيتىن قازىنامىز», دەيدى اسەرلى اڭگىمەسىندە قاراساز اۋىلىنىڭ تۇرعىنى, ۇستاز ءادىلجان نوكەەۆ.
تۋعان قاراسازىنا اقيىق اقىننىڭ سالەمىن جەتكىزۋگە كەلگەندەي, التى اققۋ ايدىن بەتىندە قيقۋلاي سىرعىپ بارادى. ال اقپاننىڭ اپپاق قارى ايدىن كولمەن ەرەكشە جاراسىم تاپقان.
الماتى وبلىسى