بۇگىن جىلداعى وسى ۋاقىتتاعى ءداستۇر بويىنشا كۇللى تۇرىكمەنستان جۇرتى تايلى-تاياعى قالماي قاۋىن مەيرامىن اتاپ وتۋدە. بۇل تۋرالى «24 KZ» تەلەارناسى حابارلادى.
ەجەلدەن تۇركىمەندەردىڭ داڭقىن شىعارىپ جۇرگەن ايشىقتى زاتتاردىڭ بىرىنە وسى قاۋىن دا جاتادى. ادەتتە بىلايعى جۇرت ونى «شارجوۋ قاۋىنى» رەتىندە بىلەدى. جەگەندە ءدامى ءتىل ۇيىرەتىن بالداي ءتاتتى بۇل قاۋىنداردىڭ داڭقى الدەقاشان جەر-ءجۇزىن ارالاپ كەتكەن.
قازاقستاندا كۇنى بۇگىنگە دەيىن ەڭ ءتاتتى قاۋىن قىزىلوردا وبلىسىنىڭ شيەلى اۋدانىندا وسىرىلەدى دەپ ەسەپتەلەدى. بۇل اۋداندا شىنىندا دا كەزىندە ەڭ كەرەمەت قاۋىندار ءوسىرىلۋشى ەدى. جانە ونىڭ كولەمى دە كوپ بولاتىن. سوندىقتان كەشەگى كەڭەس كەزەڭىندە وسى ءبىر اۋداندا عانا ەكى بىردەي قاۋىن قابىلداۋ پۋنكتى (شيەلى, بايگەقۇم) جۇمىس ىستەدى. قازىر سونىڭ ءبىرى دە جوق. بۇدان ىشعاتىن تۇجىرىم, شيەلى قاۋىنىن قايتا قولعا الىپ, دامىتۋ كەرەك.
كەزىندە شيەلى قاۋىنى تۋرالى قانشاما عىلىمي ەڭبەكتەر مەن ادەبي تۋىندىلار جازىلدى. مىسالى, تالانتتى جازۋشى تىنىمباي نۇرماعامبەتوۆ ءتىپتى ءبىر اڭگىمەسىن «شيەلى قاۋىنى» دەپ اتادى. اڭگىمەنىڭ جاقسى شىققانى سونداي, ونىڭ ورىس تىلىنە اۋدارىلعان نۇسقاسى «وگونەك» جۋرنالىندا جارىق كوردى.
ەندى تۇركىمەن جەرىندەگى مەرەكەگە قايتا كەلەيىك. مۇندا ساۋىق قۇرىپ جۇرگەن حالىق ويىن-ساۋىق كەشتەرىنىڭ قىزىعىن تاماشالاۋدان بولەك, قاۋىن مەن قاربىزدىڭ ءدامىن تاتادى. بۇل مەرەكە 1994 جىلى ءبىرىنشى پرەزيدەنت ساپارمۇرات نيازوۆتىڭ باستاماسىمەن ەلدىڭ ەرەكشە كۇندەرى تىزىمىنە ەنگەن. ماقساتى تۇرىكمەن ەلىنىڭ قاۋىندارىن بۇكىل الەمگە دارىپتەۋ بولىپ وتىر.
مۇرات ايتقوجا.