شۆەيتساريالىق ەڭ ۇزدىك قوناقجايلىلىق جانە تۋريستىك مەكتەپتەردىڭ وكىلدىگى جانە بۇۇ جانىنداعى دۇنيەجۇزىلىك تۋريستىك ۇيىمنىڭ (يۋنۆتو) العاشقى اكادەميالارىنىڭ ءبىرى قازاقستاندا اشىلماق. بۇگىندە مۇنداي ءبىلىم بەرۋ ورتالىقتارى تەك گرۋزيادا عانا بار, جۋىردا پورتۋگاليا, شۆەيتساريادا جانە قىتاي ەلدەرىندە دە اشىلادى.
اتالعان وقۋ ورتالىعى قازاقستان رەسپۋبليكاسى ۇكىمەتىنىڭ 2019 جىلعى 20 ناۋرىزداعى № 129 قاۋلىسىمەن نۇر-سۇلتان قالاسىندا قۇرىلعان حالىقارالىق تۋريزم جانە قوناقجايلىق ۋنيۆەرسيتەت نەگىزىندە جۇمىس ىستەيدى دەپ جوسپارلانعان.
ورتالىقتىڭ الداعى جىلدارداعى نەگىزگى مىندەتى - وسى سالادا جۇمىس ىستەيتىن 1200 مامان مەن جاڭا كادرلاردى دايارلاۋ. باستى نازار قوناقۇيلەر مەن مەيرامحانالاردىڭ الدىڭعى ساناتتاعى ماماندارى مەن بولىمدەردىڭ تازالىعىن جۇزەگە اسىراتىن, مەيرامحانادا قىزمەت كورسەتەتىن جانە ساتۋ مەن ماركەتينگ باعىتىندااعى ورتا مەنەدجەرلەرگە بولىنبەك.
ورتالىقتى قارجىلاندىرۋ حالىقارالىق تۋريزم جانە قوناقجايلىلىق ۋنيۆەرسيتەتىنىڭ جوسپارلانعان بيۋدجەتى اياسىندا جۇزەگە اسىرىلادى. سونداي-اق, قارجىلاندىرۋعا وسى سالاعا قىزىعۋشىلار مەن مامانعا تاپشى جۇمىسبەرۋشىلەر جانە مەتسەناتتار دا تارتىلاتىن بولادى.
- ەلىمىزدەگى ءتۋريزمدى دامىتۋ مەملەكەتتىك باعدارلاماسىنىڭ نەگىزگى مىندەتتەرىنىڭ ءبىرى - قىزمەت كورسەتۋ ساپاسىن جاقسارتۋ. ەكى ايدىڭ ىشىندە ءبىز ەڭ بەدەلدى شۆەيتساريالىق «Les Roches» جانە «SHL» مەكتەپتەرىنىڭ وكىلدەرى جانە UNWTO-مەن كەلىسسوزدەر جۇرگىزىپ, الداعى ماسەلەلەردى پىسىقتاپ, ەلگە شاقىرىپ, قازاقستاندا تۋريزم سالاسىندا كادرلار دايارلايتىن زاماناۋي ءبىلىم بەرۋ ورتالىعىن قۇرۋ تۋرالى مەموراندۋمعا قول قويدىق, - دەدى «Kazakh Tourism» ۇك» اق باسقارما توراعاسى ەرجان ەركىنباەۆ.
تۋريزم سالاسىنىڭ توپ-مەنەدجەرلەرى «Les Roches» باعدارلاماسى اياسىندا دايىندالادى, SHL كادرلاردى قايتا دايارلاۋ فۋنكتسياسىن السا, ال, UNWTO-نىڭ وكىلدىگى ءبىلىم بەرۋ پروتسەسىن عىلىمي, اكادەميالىق جانە اناليتيكالىق قامتاماسىز ەتۋ, سالاداعى ەڭ جاڭا اقپاراتقا, تەندەنتسيالارعا, عىلىمي اقپاراتتارعا قول جەتىمدىلىكتى قامتاماسىز ەتەدى. مۇنداي اكادەميانىڭ بولۋى اكادەميالىق دەڭگەيدە ەلىمىزدىڭ تارتىمدىلىعىن ارتتىرۋعا كومەكتەسەدى: اكادەميا شەتەلدىك ستۋدەنتتەردى تارۋعا جانە يۋنۆتو حالىقارالىق شارالارىن قازاقستاندا وتكىزۋگە سەپ بولادى.
- گرۋزيادا مۇنداي ءبىلىم بەرۋ ورتالىعى بار جانە ءبىز وسى ەلدىڭ تاجىريبەسىنە جۇگىندىك. ولار مۇنداي ماڭىزدى وقۋ ورنىن اشۋ جانە ولاردىڭ برەندىن پايدالانۋ ءۇشىن 7 جىل جۇمساعان. ءبىزدىڭ گرۋزيالىق ارىپتەستەرىمىزبەن جانە گرۋزياداعى UNWTO اكادەمياسىمەن جاسالعان كەلىسىمدەردىڭ ارقاسىندا ءبىلىم بەرۋ باعدارلامالارىن تارتۋ جانە ىسكە قوسۋ مەرزىمى, ليتسەنزيا الۋ قۇنى ايتارلىقتاي قىسقاردى, - دەيدى ەرجان ەركىنباەۆ.