اقىلى جولداردا تولەم الۋ جۇيەسىن ورناتۋ جانە قىزمەت كورسەتۋگە قاتىستى ينۆەستيتسيالىق جوبا اياسىندا بيىل ەلىمىزدىڭ تاسجولدارىندا بەينەباقىلاۋ كامەرالارى ورناتىلا باستايدى. جالپىلاي العاندا, ەلىمىزدىڭ رەسپۋبليكالىق ماڭىزى بار اۆتوموبيل جولدارىنىڭ 11 مىڭ شاقىرىمىندا 600 بەينەباقىلاۋ كامەراسى ورناتىلادى دەپ جوسپارلانۋدا. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
كامەرالار ەل جولدارىنداعى قوزعالىستى تاۋلىك بويى باقىلايدى. تۇتاستاي العاندا, مۇنداي قوندىرعىلار 2024 جىلعا دەيىن ەلىمىزدەگى رەسپۋبليكالىق ماڭىزى بار جولداردىڭ 32 ۋچاسكەسىندە پايدا بولماق.
ازىرلەۋشىلەردىڭ ايتۋىنا قاراعاندا, ەسەپتەۋ قۋاتتىلىعى مەن ارنايى باعدارلامالىق قامتاماسىز ەتۋ اقپاراتتىڭ كەڭ كولەمىن ناقتى ۋاقىت رەجيمىندە وڭدەۋگە مۇمكىندىك بەرەدى. وسىلايشا, كولىك قوزعالىسىنىڭ جىلدامدىعى مەن باعىتى, جەكە دەرەكتەردى پايدالانۋسىز كولىك قۇرالىنىڭ ءتيپى, سونداي-اق, جول جيەگىمەن قوزعالىپ كەلە جاتقان جانە مەملەكەتتىك تىركەۋ ءنومىرىنسىز جۇرگەن اۆتوكولىكتەر انىقتالادى. بەينە-باقىلاۋ كامەرالارىنىڭ باستى مىندەتتەرىنىڭ ءبىرى – بەلگىلەنبەگەن جەردە توقتاۋ, كەرى باعىتتا قوزعالۋ, قوزعالىستىڭ قارسى جيەگىمەن ءجۇرۋ, جىلدامدىق رەجيمىن اسىرۋ سياقتى جولدا ءجۇرۋ ەرەجەلەرىن بۇزۋدىڭ فاكتىلەرىن تىركەۋ. بۇدان بولەك, جۇيە اۆتوماتتى رەجيمدە جول ترافيگىنىڭ مولشەرىن تىركەۋگە, كامەرانىڭ وسىنە قاراماستان كولىك قۇرالىنىڭ قوزعالىسىن انىقتاۋعا مۇمكىندىك بەرەدى.
جولداردا تولەم الۋ جۇيەسى ينفراقۇرىلىمنىڭ كەڭ شوعىرىن ۇسىنباق. وسىلايشا, ولارعا ستاتسيونارلى باقىلاۋ پۋنكتى, اۆتوماتتى يدەنتيفيكاتسيالاۋ قۇرالدارىنىڭ اپپاراتتى-باعدارلامالىق كەشەنى, مونيتورينگ, دەرەكتەردى وڭدەۋ, پايدالانۋشىلارمەن جۇمىس ورتالىقتارى, سونداي-اق, دەرەكتەردى جىبەرۋگە ارنالعان بايلانىس كانالدارى جاتقىزىلادى.
«QazAvtoJol» ۇلتتىق كومپانياسى وتكەن جىلدىڭ جەلتوقسانىندا رەسپۋبليكالىق ماڭىزى بار اۆتوموبيل جولدارى ارقىلى ءجۇرىپ ءوتۋ ءۇشىن اقى الۋ جۇيەسىن ورناتۋ جانە قىزمەت كورسەتۋ بويىنشا ينۆەستيتسيالىق كونكۋرستىڭ قورىتىندىسىن جاريالاعانىن ەسكە سالايىق. ونىڭ قورىتىندىلارىنا سايكەس قازاقستاندىق جانە تايۆاندىق كونسورتسيۋممەن ىنتىماقتاستىق تۋرالى كەلىسىمشارتقا قول قويىلعان بولاتىن.