ەلورداداعى №87 مەكتەپ-گيمنازيادا ابايتانۋ عىلىمي-تانىمدىق ورتالىعى اشىلدى. سالتاناتتى شاراعا نۇر-سۇلتان قالاسى اكىمىنىڭ ورىنباسارى باقتيار ماكەن قاتىستى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
مەكتەپ ديرەكتورى ايگۇل وڭداعانقىزى ءوز سوزىندە شارانىڭ ۇلى اقىننىڭ 175 جىلدىق مەرەيتويىنا وراي ۇيىمداستىرعانىن ايتىپ ءوتتى.
«قازاقتىڭ ۇلى ويشىلى, باس اقىنى اباي اتامىزدىڭ 175 جىلدىق مەرەيتويىنا وراي ول كىسىنىڭ عيبراتقا تولى مول مۇراسىن جاس ۇرپاققا سۋسىنداتۋ ماقساتىندا ابايتانۋ عىلىمي تانىمدىق ورتالىعى اشىلعالى تۇر. بۇل ورتالىقتى اشۋداعى ماقساتىمىز – جاس بۋىنعا, وسكەلەڭ ۇرپاققا ۇلى اقىننىڭ تاعىلىمدىق مۇرالارىن دارىپتەۋ. جاستارىمىز اباي اتامىز ايتقانداي جۇرەگى جىلى, قايراتى ىستىق, اقىلى نۇرلى, ءبىلىمدى بولارى ءسوزسىز» دەدى ول.
اكىم ورىنباسارى باقتيار ماكەن, اتا-انالار قامقورشىلارى كەڭەسىنىڭ توراعاسى گۇلنار مانسۇرقىزى جانە بالا اباي بەينەسىن سومداپ جۇرگەن مەكتەپ وقۋشىسى ءىلياس مىقتىبەك ورتالىقتىڭ لەنتاسىن قيىپ, سالتاناتتى تۇردە اشتى. ورتالىقتاعى ەڭ قۇندى مۇرانىڭ ءبىرى – شاكارىم قۇدايبەردى ۇلىنىڭ كەلىنى ءباتيمانىڭ بورتپە ءشالىسى.
«بۇگىنگە دەيىن ءبىراز دۇنيەلەردى جوعالتىپ الدىق. وتكەن كۇزدە №87 مەكتەپكە ۇلى اقىننىڭ ەسىمى بەرىلگەن سوڭ وقۋ ورداسى جانىنان عىلىمي تانىمدىق ورتالىعىن اشىپ وتىرمىز. بۇل ورتالىق ەندى ءۇش كەزەڭگە ءبولىنىپ جۇمىس ىستەيتىن بولادى: «بالا اباي», «اقىن اباي», «حاكىم اباي». مۇندا بالالارعا قاجەت دۇنيەنىڭ ءبارى قويىلدى. ءبىز وقۋشى قاۋىمعا ابايدىڭ اقىن بولىپ قالىپتاسقانىن, ونىڭ اكەسى قۇنانبايمەن, اجەسى زەرەمەن بايلانىسىن, ونىڭ ەل اراسىنداعى تاپقىرلىق اڭىزدارىن ايتپايمىز. ءبىز ابايدى بىردەن اقىن ەتىپ تۇسىرە سالعانبىز. مىنە, وسى بالالاردىڭ ۇعىنۋىنا قيىندىق تۋدىرىپ جاتىر. ءبىز ءار بالانىڭ دەڭگەيىنە قاراي كەزەڭ-كەزەڭىنە ءبولىپ قامتۋىمىز كەرەك» دەدى جازۋشىلار وداعىنىڭ مۇشەسى الماحان مۇحامەدقاليقىزى.