التاي كولگىنوۆ بايقوڭىر اۋدانى اكىمىنىڭ تۇرعىندارمەن ەسەپتى كەزدەسۋىنە قاتىستى. كەزدەسۋدە ەلدى مەكەندەردى دامىتۋ, ەسكى جانە اپاتتى ۇيلەردى بۇزۋ, سانيتارلىق تازالىق, الەۋمەتتىك وبەكتىلەردىڭ قۇرىلىسى, ۇلەستى قۇرىلىس ماسەلەلەرى ايتىلىپ, تالقىلاندى. «ەركىن فورماتتاعى» كەزدەسۋلەر مەملەكەت باسشىسىنىڭ «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ اياسىندا ءوتتى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
«وسىدان ءبىر ايداي ۋاقىت بۇرىن ءبىز وزدەرىڭىزبەن كەزدەسكەن ەدىك. تۇرعىندار اۋداندى دامىتۋعا قاتىستى ماڭىزدى سۇراق-ساۋالدارىن ورتاعا سالعان بولاتىن. ۇكىمەتتىڭ كەڭەيتىلگەن وتىرىسىندا پرەزيدەنت قالانى دامىتۋ جونىندە جانە ءومىر ساپاسىن جاقسارتۋ بويىنشا بىرقاتار تاپسىرما بەردى. اسىرەسە ەلدى مەكەندەر مەن جەكە سەكتورلاردى دامىتۋعا, الەۋمەتتىك, تۇرعىن ءۇي, كولىك ينفراقۇرىلىمىمەن قامتاماسىز ەتۋگە باسا ماڭىز بەردى. ماسەلەن ايتا كەتەر بولساق, بىلتىرعى جىلى «نۇرلى جەر» باعدارلاماسى بويىنشا 8 ەسكى ءۇيدىڭ تۇرعىندارى ياعني 90-نان استام وتباسى جاڭا پاتەرگە كوشتى. مۇناي بازاسىنا جاقىن ورنالاسقان 39-شى رازەزد تۇرعىندارىنىڭ بارلىعىنا دەرلىگىن جاڭا ۇيگە كوشىردىك. البەتتە, بۇل جۇمىستاردىڭ بارلىعى الداعى ۋاقىتتا جالعاسىن تابادى», دەدى ەلوردا اكىمى التاي كولگىنوۆ.
بايقوڭىر اۋدانىنىڭ تۇرعىندارى سونداي-اق ۇزاققا سوزىلعان ۇلەستى قۇرىلىستى دا كوتەردى. ەلوردا اكىمى ۇلەستى قۇرىلىستىڭ ۇزاققا سوزىلۋىنىڭ نەگىزگى ماسەلەلەرى – قۇرىلىس سالۋشىلار مەن ۇلەسكەرلەر اراسىنداعى سوت ءىسى داۋ-دامايلارى, جوبالىق-سمەتالىق قۇجاتتار مەن ساراپتامانىڭ, قارجىلىق جانە تەحنيكالىق ءاۋديتتىڭ جوقتىعى ەكەنىن اتاپ كورسەتتى.
«بۇگىنگى تاڭدا ەلوردادا 12,5 مىڭنان استام ۇلەسكەر بار, ياعني جيىنتىعى 42 وبەكتى. ءبىز شىنايى كورىنىستى ءوز كوزىمىزبەن كورۋ ءۇشىن ارىپتەستەرىمىزبەن بىرگە ءار وبەكتىگە بارىپ ارالادىق. پروبلەما وتە كوپ. كەي جەردە تەك شۇڭقىر عانا, كەيبىرى ءبىر پاتەردى بىرەنەشە رەت ساتقان, تەحنيكالىق قاباتتار مەن تۇراقتار پاتەر رەتىندە ساتىلعان. وسىعان قاراماستان ءبىز قارقىندى تۇردە جۇمىس جۇرگىزىپ جاتىرمىز. ءاربىر اياقتالماعان ۇلەستى قۇرىلىس بويىنشا كەزەڭ-كەزەڭىمەن ءىس-شارالار جوسپارى جاسالىندى. 2019 جىلى 10 تۇرعىن ءۇي كەشەنىن (11 ءۇي) پايدالانۋعا بەردىك. وسىلايشا 2,5 مىڭنان استام ۇلەسكەر ءوز قۇجاتتارىن راسىمدەپ, ءوز پاتەرلەرىنە كىردى», دەدى ەلوردا اكىمى التاي كولگىنوۆ.
سونىمەن قاتار اۋدان تۇرعىندارى كوشەنى جارىقتاندىرۋ, جىلى ايالدامالار سالۋ, ىشكىكۆارتال ارالىق كوشەلەردى قاردان تازارتۋ, اۋلالاردى اباتتاندىرۋ سىندى ماسەلەلەردى شەشۋدى سۇرادى. بايقوڭىر اۋدانىنىڭ اكىمى نۇربول نۇرساعاتوۆتىڭ ايتۋىنشا ءبىلىم وبەكتىلەرى بويىنشا ماسەلەلەر بار, 2020 جىلى بايقوڭىر اۋدانىنىڭ س. سەيفۋللين – سىرداريا كوشەسىندە ءبىر مەكتەپتىڭ قۇرىلىسى جانە قولدانىستاعى ءبىلىم ورداسىنىڭ اۋماعىندا 3 كورپۋستىڭ قۇرىلىسى باستالماق» دەلىنگەن حابارلامادا.