كوروناۆيرۋس فينلياندياعا جەتتى

«ساياحاتشىنىڭ كوروناۆيرۋس جۇقتىرعانى لاپلاندياداعى ورتالىق اۋرۋحانادا انىقتالدى. بۇل فينليانديادا راستالعان العاشقى جاعداي», - دەلىنگەن فينليانديانىڭ ۇلتتىق دەنساۋلىق ساقتاۋ جانە الەۋمەتتىك قورعاۋ ينستيتۋتىنىڭ حابارلاماسىندا.

فينليانديالىق اقپارات قۇرالدارىنىڭ حابارلاۋىنشا, ۋحاننان كەلگەن 32 جاستاعى قىتايلىق ايەل بەس كۇن بۇرىن قىتايدان كەتكەن. ول كەزدە ونىڭ جاعدايى جاقسى دەپ باعالانعان بولاتىن.

ەسكە سالا كەتەيىك, 2019-nCoV اتتى كوروناۆيرۋستىڭ جاڭا ءتۇرى جەلتوقساندا قىتايدا انىقتالدى. اۋرۋ العاشىندا سۋىق ءتيۋدىڭ بەلگىلەرىمەن باستالادى. ۋحان قالاسىندا ءبىر كۇننىڭ ىشىندە اتالعان شاعىمدارمەن جۇزگە جۋىق ناۋقاس تىركەلگەن بولاتىن.

سوڭعى مالىمەتتەر بويىنشا, قىتايدا كوروناۆيرۋستى جۇقتىرعانداردىڭ سانى 7711 ادام بولسا, ونىڭ 170-ءسى قازا تاپقان.

قىتايدان باسقا, وڭتۇستىك كورەيا, جاپونيا, اقش, تايلاند, كانادا, ۆەتنام, سينگاپۋر, نەپال, فرانتسيا, اۆستراليا, مالايزيا, گونكونگ, ماكاو, تايۆان, كامبودجا جانە گەرمانيادا كوروناۆيرۋس ينفەكتسياسى تىركەلدى.