قىتايداعى ەپيدەميولوگيالىق جاعدايعا بايلانىستى قازاقستان ۇكىمەتى كوروناۆيرۋستىڭ ەل اۋماعىنا ءارى قاراي تارالۋىن بولدىرماۋ ءۇشىن 27 قاڭتاردان باستاپ الماتى – نۇر-جولى – ءۇرىمشى, وسكەمەن – مايقاپشاعاي – ءۇرىمشى, جاركەنت – قورعاس – قۇلجا, اياگوز – باقتى – زيمۇناي باعىتتارىندا اۆتوبۋس قاتىناسىن ۋاقىتشا توقتاتۋ تۋرالى شەشىمگە كەلدى. بۇل ەكى باعىتتا كۇنىنە بارلىعى 14 رەيس قاتىنايتىن.
سونداي-اق 1-3 اقپان ارالىعىندا ەكى ەل اراسىنداعى تەمىر جول جانە اۋە قاتىناستارى ۋاقىتشا توقتاتىلادى. وسىعان وراي اعىمداعى جىلعى 3 اقپاننان باستاپ اتالعان رەيستەرگە بيلەت العاندار ونى ساتىپ العان جەرلەرى بويىنشا قايتارا الادى. بيلەتتەر ءۇشىن اقشا ايىپپۇلسىز راسىمدەلىپ, تولىق كولەمدە قايتارىلادى. ساپارىنان قالىپ قويعان جولاۋشىلاردى ەلگە قايتارۋ ءۇشىن بەيجىڭ جانە ءۇرىمشى قالالارىنان قوسىمشا رەيستەر ۇيىمداستىرىلاتىن بولدى.
«نۇر-سۇلتان – ءۇرىمجى مەن الماتى – ءۇرىمجى باعىتىنداعى پويىزدار اقتوعاي ستانساسىندا ءبىر پويىز بولىپ بىرىگىپ, ءارى قاراي ۇرىمجىگە باعىت الاتىن. ول جاققا بيلەت العانداردىڭ كوبى دوستىق ستانساسىنان ءتۇسىپ قالادى. انىقتاعانىمىزداي, دوستىقتان ءارى قاراي ۇرىمجىگە دەيىن 22 بيلەت الىنعان ەكەن. وسى 22 ادامنىڭ ىشىندە 8-ءى بيلەتتى قايتارعان. قالعان 14 ادامعا وپەراتورلار حابارلاسىپ, پويىزدىڭ جۇرمەيتىنىن, بيلەت قۇنىن الىپ كەتۋى كەرەكتىگىن ايتىپ جاتىر», – دەدى بۇل جونىندە قر يدم كولىك كوميتەتىنىڭ توراعاسى سامات عىلىموۆ. ال ازاماتتىق اۆياتسيا كوميتەتىنىڭ توراعاسى تالعات لاستاەۆ اۋە بيلەتتەرىنىڭ دە تولىق قۇنى يەلەرىنە قايتارىلاتىنىن ايتادى. جانە بيلەتتەرگە ەشقانداي كوميسسيا ۇستالمايدى, تولىق كولەمدە قايتارىلادى.