الماتى ماڭىندا اپاتقا ۇشىراعان Bek Air ۇشاعىنىڭ ەكىنشى ۇشقىشى قايتىس بولدى. بۇل اقپاراتتى الماتى اكىمدىگىنىڭ ءباسپاسوز قىزمەتى راستادى.
الماتى قالاسىنىڭ قوعامدىق دەنساۋلىق ساقتاۋ باسقارماسى ءباسپاسوز قىزمەتىنىڭ مالىمدەۋىنشە, پيلوت 21 قاڭتاردا №4 قالالىق كلينيكالىق اۋرۋحانادان ەمحانادا امبۋلاتوريالىق ەمدەلۋگە جاعدايى تۇراقتى كۇيدە ۇيىنە شىعارىلعان.
«ەمحانادا كارديولوگ, حيرۋرگ, تەراپەۆت, پسيحولوگتاردىڭ قاراۋىندا بولعان. بۇگىن ساعات 18.00-دە جەدەل جاردەم قىزمەتىنە ونىڭ جاعدايى كەنەت ناشارلاپ كەتكەنى جونىندە شاقىرتۋ تۇسكەن. جەدەل جاردەم دەر كەزىندە كەلدى, جۇرەك قىزمەتىن قالپىنا كەلتىرۋ جونىندەگى بارلىق رەانيماتسيالىق ءىس-شارالار جاسالدى, الايدا ونىڭ بارلىعى ناتيجەسىز بولدى», - دەدى باسقارما وكىلى.
ەسكە سالايىق, 2019 جىلدىڭ 27 جەلتوقسانىندا الماتىدان نۇر-سۇلتان قالاسىنا ۇشىپ شىققان Bek Air ۇشاعى اپاتقا ۇشىراعان بولاتىن. اۋە كەمەسىنىڭ كومانديرى 57 جاستاعى مارات مۇراتباەۆ وقيعا ورنىندا قازا بولدى.
ال ەكىنشى ۇشقىش ميرجان مولداقۇلوۆ اۋىر جاراقات الدى, ونىڭ ومىرتقاسىنا كۇردەلى وتا جاسالعان ەدى.
قازىرگى مالىمەت بويىنشا پيلوت ۇيىندە كوز جۇمعان. مارقۇمدى اۋرۋحانادان 21 قاڭتار كۇنى شىعارعان. ۇشقىش ءولىمىنىڭ سەبەپ-سالدارى ازىرگە بەلگىسىز.