وبلىستىق «ەرتىس دارىنى» قوسىمشا ءبىلىم بەرۋ وقۋ-ادىستەمەلىك ورتالىعىنىڭ مالىمەتىنشە, 8-14 قاڭتار ارالىعىندا الماتىداعى رەسپۋبليكالىق فيزيكا-ماتەماتيكا مەكتەبىندە وتكەن حVI حالىقارالىق جاۋتىكوۆ وليمپياداسىنا الەمنىڭ 21 ەلىنەن 599 قاتىسۋشى كەلىپ, پاۆلودار وبلىستىق كومانداسى 1 التىن, 4 كۇمىس جانە 2 قولا مەدالعا يە بولدى.
وبلىس ورتالىعىنداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 12-سىنىپ وقۋشىسى ديار تۇلەنوۆ تاعى دا التىن مەدالعا يە بولدى.
– ءبىزدىڭ ديار اتالعان وليمپياداعا قاتىسىپ, بۇعان دەيىن دە 2 رەت التىن مەدال العان ەدى. ول – وتە دارىندى وقۋشى. دياردى 7-سىنىپتان باستاپ وليمپياداعا دايىنداپ كەلەمىن, – دەيدى فيزيكا ءپانىنىڭ ۇستازى نازىمگۇل كارىموۆا.
ديار تۇلەنوۆ 2017 جىلى قولا مەدال, 2018, 2019 جىلدارى التىن مەدال يەگەرى اتانىپتى. ول ەلىمىزدەگى ەڭ مىقتى 8 فيزيكتىڭ قاتارىنا ەنگەن وقۋشى.
ۇستازى نازىمگۇل اپايىنىڭ ايتۋىنشا, ديار قازاقستاننىڭ اتىنان حالىقارالىق فيزيكا وليمپيادالارىنا قاتىسىپ, جۇلدەلى ورىنداردى يەلەنىپ ءجۇر. قازىر دياردىڭ قولىندا رەسەي جوعارى ەكونوميكا مەكتەبى, نازارباەۆ ۋنيۆەرسيتەتى, قازاق-بريتان ۋنيۆەرسيتەتتەرى بەرگەن گرانتتارى بار. جانە دە IELTS حالىقارالىق ەمتيحانىنىڭ ناتيجەسى بويىنشا دا جوعارى كورسەتكىشكە يە – 8,0 ۇپايدى جينادى.
ءيا, ءبىلىمدى وقۋشىلار ەرتەڭگى ەل ەرتەڭى. قازاق جاستارى ءۇشىن تەحنيكالىق ءبىلىم الۋ, فيزيكا, ماتەماتيكا, حيميا سالاسىن يگەرۋ قازىرگى تەحنولوگيالار زامانىندا اسا قاجەت. جىل سايىن وتەتىن جاۋتىكوۆ حالىقارالىق وليمپياداسىنىڭ ماقساتى دا وسى, وقۋشىلاردى فيزيكا-ماتەماتيكا عىلىمدارىنا قىزىقتىرۋ, وليمپيادا ارقىلى ەلىمىزدىڭ فيزيكا-ماتەماتيكا باعىتىنداعى ءبىلىم الىپ جۇرگەن وقۋشىلاردىڭ جوعارى دەڭگەيىن كورسەتۋ.
سونىمەن بىرگە وليمپيادادا فيزيكا جانە ماتەماتيكا باعىتىنداعى مامانداندىرىلعان مەكتەپتەر اراسىندا وتكەن وبلىس كومانداسىنىڭ قۇرامىندا №8 مەكتەپ-ليتسەي وقۋشىلارى انتون دراگانچۋك, ميراس قوبلان, يۆان ۋكولوۆ, دىنمۇحاممەد راحىمجانوۆ, ۆلاديمير ليم, ء«بىلىم-يننوۆاتسيا» ليتسەي-ينتەرناتىنىڭ وقۋشىلارى بەكزات اۋباكىر, رۋستەم حاسانوۆ, ءاليحان ابيحاس, كوپتىلدى ليتسەي-ينتەرناتىنىڭ وقۋشىسى سەرىك قۇرماشەۆ تا بولدى.
فيزيكا ءپانى بويىنشا جوعارى ناتيجەلەر كورسەتكەن انتون دراگانچۋك – التىن مەدال, دىنمۇحاممەد راحىمجانوۆ, ۆلاديمير ليم, ميراس قوبلان – كۇمىس مەدالدى (مۇعالىمى ا. بيليدا) يەلەندى.
ال ماتەماتيكا ءپانى بويىنشا №8 ليتسەي-مەكتەبىنىڭ وقۋشىسى يۆان ۋكولوۆ كۇمىس مەدالعا (مۇعالىمى ت.رۋبتسوۆا), ء«بىلىم-يننوۆاتسيا» ليتسەي-ينتەرناتىنىڭ 11-سىنىپ وقۋشىسى بەكزات اۋباكىر – قولا مەدالعا (مۇعالىمى ە. شايحىعالي) يە بولدى.
ينفورماتيكا ءپانى بويىنشا ء«بىلىم-يننوۆاتسيا» ليتسەي-ينتەرناتىنىڭ 10- سىنىپ وقۋشىسى ءاليحان ابيحاس قولا مەدالدى (مۇعالىمى ا. يسين ) يەلەندى.
وليمپيادا سوڭىندا وزات وقۋشىلارعا قازاقستان-بريتان تەحنيكالىق ۋنيۆەرسيتەتىنىڭ, حالىقارالىق اقپاراتتىق تەحنولوگيالار ۋنيۆەرسيتەتىنىڭ گرانتتارى بەرىلدى.
پاۆلودار