بۇل وسىمگە نەگىزىنەن قۇرامىندا الكالويدتەر مەن انتيبيوتيكتەر بار دارىلىك زاتتار ءوندىرىسىنىڭ ارتۋى ەسەبىنەن قول جەتكىزىلدى. اتاپ ايتقاندا, الكولويدتەر بار زاتتار ءوسىمى 813 مىڭ توننادان 829 مىڭ تونناعا جەتسە, سوڭعى ءتۇرى بويىنشا ءوسىم 112 مىڭ توننادان استى, ياعني 57 مىڭ توننادان 169 مىڭ تونناعا جەتتى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
ەلىمىزدىڭ ەڭ ءىرى فارماتسەۆتيكالىق كومپانياسى حالىقارالىق GMP ستاندارتتارىنا سايكەستىگىن دالەلدەيتىن بىرنەشە سەرتيفيكاتقا يە. ونىڭ ىشىندە 2019 جىلى «حيمفارم» اق ستەريلدى ەمەس ەرىتىندىلەر مەن سيروپتار وندىرۋگە, سونداي-اق CEF توبى انتيبيوتيكتەرىنىڭ اسەپتيكالىق سەبىلۋى بويىنشا GMP سەرتيفيكاتىن الدى.
فارماتسەۆتيكادا اسەپتيكالىق ءوندىرىس ەڭ كۇردەلى بولىپ سانالادى. وندا ستاندارتتى تەحنولوگيالىق پروتسەدۋرالاردى ساقتاۋدان بولەك, ستەريلدىلىكتىڭ قاتاڭ جاعدايىن جاساپ, قولداپ وتىرۋ كەرەك. بۇل ءوز ەلىمىزدە عانا ەمەس, سىرتقى نارىقتاردا ساتۋ ءۇشىن فارماتسەۆتيكالىق ونىمدەر ءوندىرىسىنىڭ ساپاسىن جاقسارتۋ باعىتىندا ۇلكەن جۇمىستار اتقارىلىپ جاتقانىن كورسەتەدى. بۇگىنگى تاڭدا زاۋىت ءوز ونىمدەرىنىڭ 9%-ىن قىرعىزستان, رەسەي, ۋكرانيناعا ەكسپورتتايدى.
قازىرگى ۋاقىتتا كاسىپورىننىڭ وندىرىستىك قۋاتى جىلىنا 420 ملن ءدارى-دارمەك, كاپسۋلا جانە تۇيىرشىكتەر, 140 ملن ينەكتسيالىق ەرىتىندىسى بار امپۋلا, 37 ملن انتيبيوتيكتەر ۇنتاعى (تسەفالوسپوريندەر), 13 ملن انتيبيوتيكتەر ۇنتاعى (پەنەمالار/ميتسيندەر), 3 ملن سۇيىق پەرورالدى دارىلىك زاتتار وندىرۋگە مۇمكىندىك بەرەدى.