رەسەي فەدەراتسياسى امەريكالىق قاۋىپسىزدىك قىزمەتىنىڭ بۇرىنعى قىزمەتكەرى ەدۆارد سنوۋدەنگە ۋاقىتشا ساياسي باسپانا بەردى. بۇل تۋرالى «WikiLeaks» تۆيتتەرىندە مالىمدەندى.
قورعاۋشى اناتولي كۋچەرەنانىڭ ايتۋىنشا, ساياسي باسپانا ءبىر جىلعا ۇسىنىلىپ وتىر. مالىمدەمەنىڭ دالەلى رەتىندە قورعاۋشى سنوۋدەن قۇجاتىنىڭ كوشىرمەسىن كورسەتتى. «ونىڭ ورنالاسقان جەرى قاۋىپسىزدىك ماسەلەسىنە وراي قۇپيادا ساقتالادى», – دەدى كۋچەرەنا.
«نوۆوستي» اگەنتتىگىنىڭ اقپارىنا سۇيەنسەك, سنوۋدەن «شەرەمەتەۆو» اۋەجايىنان شىعىپ, جالعىز ءوزى جول ءجۇرىپ كەتكەن.
ەدۆارد سنوۋدەن «شەرەمەتەۆو» اۋەجايىنىڭ ترانزيتتىك ايماعىندا 23 ماۋسىمنان بەرى تۇرىپ كەلگەن ەدى. ونىڭ امەريكالىق پاسپورتى كۇشىن جويۋىنا وراي, سنوۋدەن اۋەجاي اۋماعىن كەتە المادى.
اقش بيلىگى رەسەيگە سنوۋدەندى وزدەرىنە تاپسىرۋ جونىندە بىرنەشە رەت ءوتىنىش ءبىلدىردى. الايدا, ماسكەۋ ونى قايتارعان جاعدايدا قاشقىندى قيناۋ مەن ءولىم جازاسى كۇتىپ تۇرعانىن ەسكەرىپ, ءوتىنىشتى ورىندامادى.
ايدار ورىسباەۆ.