ەلوردادا 167 183 شاعىن جانە ورتا بيزنەس سۋبەكتىسى تىركەلگەن. ونىڭ 68 483 زاڭدى تۇلعا, 98 364 جەكە كاسىپكەر جانە 336 شارۋا قوجالىعى. وتكەن جىلمەن سالىستىرعاندا ءوسىم 3,1%-دى قۇرايدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
شاعىن جانە ورتا كاسىپكەرلىك وكىلدەرىنىڭ تۇراقتى ءوسۋى مەملەكەتتىڭ كاسىپكەرلىك ورتانىڭ جاي-كۇيىن جەتىلدىرۋ بويىنشا قاجەتتى جاعدايلار جاساۋىنىڭ جانە قالاداعى بيزنەس-احۋالدى جاقسارتۋ بويىنشا ۇزدىكسىز جۇمىس جۇرگىزۋىنىڭ ارقاسىندا مۇمكىن بولدى.
قازىرگى ۋاقىتتا ەلوردادا شاعىن جانە ورتا بيزنەستى دامىتۋ مەن قولداۋعا باعىتتالعان بىرقاتار باعدارلامالار جۇزەگە اسىرىلۋدا. سونىڭ ءبىرى – «بيزنەستىڭ جول كارتاسى-2020» بيزنەستى قولداۋ مەن دامىتۋ باعدارلاماسى. ول بويىنشا ەكىنشى دەڭگەيدەگى بانكتەردە نەسيەنىڭ ەڭ جوعارى سوماسى 2,5 ملرد تەڭگەگە دەيىن كرەديتتەردىڭ پايىزدىق كورسەتكىشتەرىن 40%-عا دەيىن سۋبسيديالاۋ, ءىسىن جاڭا باستاعان كاسىپكەرلەر ءۇشىن 85% - عا دەيىن جانە جۇمىس ىستەپ جۇرگەن كاسىپكەرلەر ءۇشىن 50% - عا دەيىن كەپىل مۇلكىن قامتاماسىز ەتۋ ماقساتىندا كەپىلدەندىرۋ, جاڭا بيزنەس-يدەيالاردى ىسكە اسىرۋ ءۇشىن 3 ملن تەڭگەگە دەيىن مولشەردە مەملەكەتتىك گرانت بەرۋ, بيزنەس نىساندارىنىڭ ينفراقۇرىلىمىن جاقسارتۋ جۇمىستارى ىسكە اسۋدا.
جۇمىسپەن ناتيجەلى قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» باعدارلاماسى دا سۇرانىسقا يە. وسى باعدارلاما اياسىندا سالالىق شەكتەۋلەرسىز 5 جىلعا دەيىنگى مەرزىمگە جىلدىق 6% -بەن 8 000 اەك-كە دەيىن شاعىن نەسيەلەر بەرۋ, سونداي-اق ءىسىن جاڭا باستاعان كاسىپكەرلەر ءۇشىن 85% - عا دەيىن جانە جۇمىس ىستەپ جۇرگەن بيزنەس وكىلدەرى ءۇشىن 50% - عا دەيىن كەپىلدىك بەرۋ كوزدەلگەن.