اقش سوتى كليۆلەند قالاسىندا ءۇش قىزدى ۇرلاپ اكەتىپ, ۇزاق ۋاقىت بويى ۇيىندە قيناپ ۇستاعان اريەل كاستروعا قاتىستى ۇكىم شىعاردى. بۇل تۋرالى يتار-تاسس حابارلادى.
سوت پروتسەسىندە توراعالىق ەتكەن سۋديا مايكل رۋسسو قىلمىسكەردى ءومىر بويىنا اباقتىعا قاماۋ جازاسىنا كەستى. وتكەن اپتادا كاسترو تەرگەۋ جۇمىستارىنا كومەكتەسۋى مەن كىناسىن مويىنداۋى ارقىلى ءولىم جازاسىنان قۇتىلعان بولاتىن.
سوت وتىرىسى بىرنەشە ساعاتقا سوزىلدى. بۇرىن مەكتەپ وقۋشىلارىن تاسيتىن اۆتوبۋس جۇرگىزۋشىسى قىزمەتىن اتقارعان 53 جاسار كاسترو ءوزىنىڭ سوڭعى سوزىندە جابىرلەنۋشىلەردەن كەشىرىم سۇرادى. «مەن قۇبىجىق ەمەسپىن. مەن پورنوگرافيالىق ۇلگىدەگى فيلمدەردىڭ ىقپالىنا تۇسكەن اۋرۋ اداممىن», – دەدى ول.
سوتتا جابىرلەنۋشىلەردىڭ ءبىرى – 32 جاسار ميشەل نايت ءسوز سويلەدى. «سەن مەنىڭ 11 جىل ءومىرىمدى قورلادىڭ. بۇل جىلدار مەن ءۇشىن توزاق سەكىلدى بولدى. ەندى سەنىڭ ءومىرىڭ توزاققا اينالادى», – دەدى كوز جاسىن ارەڭ ۇستاعان ميشەل نايت. قالعان ەكى جابىرلەنۋشى سوتقا كەلمەدى.
اتالمىش سوت وتىرىسى كوپتەگەن امەريكالىق تەلەارنالاردا تىكەلەي ەفيردە كورسەتىلدى.
اماندا بەرري, دجينا دەحەسۋس پەن ميشەل نايت 2002-2004 جىلدار ارالىعىندا 14,16 مەن 20 جاستارىندا جوعالىپ, تەك بيىلعى جىلدىڭ مامىر ايىندا كاسترونىڭ قاماۋىنان بوساپ شىعادى. ءۇش قىز دا قانىشەردىڭ تاراپىنان زورلىق كورگەن. قىلمىسكەردىڭ تۇتقىنىندا جاتقان كەزىندە اماندا بەرري كاسترودان جۇكتى بولىپ ءسابي تۋادى.
جالپى العاندا, اريەل كاستروعا 977 تارماق بويىنشا ايىپ تاعىلىپ وتىر.
ايدار ورىسباەۆ.