قوستانايدا توپەلەپ جاۋعان بارماق باسىنداي بۇرشاق ەگىستىك القاپتى جايپاپ ءوتىپ, شارۋاشىلىقتارعا وراسان زيان كەلتىردى. بۇل تۋرالى «حابار» تەلەارناسى حابارلادى.
مارات مولداشەۆ باسقاراتىن شارۋاشىلىق ۇجىمى بيىل 3,5 مىڭ گەكتارعا ءداندى-داقىلدار ەككەن ەدى. سونىڭ 300 گەكتارى تابيعات اپاتىنان تىپ-تيپىل بولدى. العاشقى بولجام بويىنشا سەرىكتەستىككە كەلگەن شىعىن كولەمى -12-15 ملن. تەڭگە شاماسىندا. جالپى ايتقاندا, اتالعان ءوڭىردىڭ مەڭدىقارا اۋدانىندا 4 شارۋاشىلىق بۇرشاقتىڭ زاردابىن تارتىپ وتىر. جارامسىز بولعان ەگىس القابى 1 مىڭ گەكتارعا جۋىقتايدى. ناقتى ەسەبىن جاقىن ارادا ارنايى كوميسسيا جاريا ەتەتىن بولادى. «الدىمەن ىسكە جارامسىز بولىپ قالعان القاپتاردىڭ اۋماعى ولشەنىپ, شىعىن ەسەبى شىعارىلادى. سودان كەيىن عانا ساقتاندىرۋ كومپانياسى ءوز ەسەبىن جاريالايدى. از دا بولسا, ءتيىستى تولەم قولىمىزعا تيەر دەگەن ۇمىتتەمىن», - دەيدى مەڭدىقارا اۋداندىق اۋىل شارۋاشىلىعى ءبولىمىنىڭ باستىعى الەكساندر كوۆالچۋك.
دانيار تۇيمەباي.