بۇگىن فرانتسيانىڭ ەكس-ان-پروۆانس قالاسىندا بتا-بانكتىڭ بۇرىنعى باسشىسى مۇحتار ءابىلازوۆتىڭ ءىسى بويىنشا سوت وتىرىسى باستالدى. بۇل تۋرالى جەرگىلىكتى باق وكىلدەرىنىڭ اقپارىنا سىلتەمە جاساعان ريا «نوۆوستي» حابارلادى.
سوتتا ءابىلازوۆتىڭ قازاقستانعا ەكستراديتسيا جاسالۋى جايلى شەشىم قابىلدانىپ قالۋى دا مۇمكىن.
ول كەشە, 31 شىلدە كۇنى فرانتسيانىڭ كاننى قالاسىنا جاقىن ماڭدا پوليتسيا ارنايى جاساعىنىڭ ءىس-شاراسى بارىسىندا قولعا تۇسكەن بولاتىن. شارا بيزنەسمەندى ۇستاپ بەرۋدى وتىنگەن رەسەيدىڭ سۇراۋى بويىنشا جۇزەگە اسقان كورىنەدى. ءبىر قىزىعى, ونى سۇراپ وتىرعانداردىڭ اراسىندا قازاقستاننان بولەك ۋكراينا دا بار كورىنەدى.
وسى وقيعا تۋرالى كەشە كۇللى الەمگە ءبىرىنشى بولىپ حابارلاعان انگليانىڭ «Financial Times» گازەتى بۇگىن ءابىلازوۆتىڭ قاماۋعا الىنۋىنا بايلانىستى قوسىمشا دەرەكتەر تاراتتى. ءوز اتىنىڭ اتالماۋىن سۇراعان ءابىلازوۆتىڭ ادۆوكاتى بانكيردى قولعا ءتۇسىرۋ كەزىندە ونىڭ جانىندا قارىنداسى بولعانىن مالىمدەدى. بىراق فرانتسۋز قۇقىق قورعاۋشىلارى گاۋھار ءابىلازوۆانى بىردەن بوساتقان.
ايدار ورىسباەۆ.