قىزىلوردا وبلىسىنىڭ ىشكى ىستەر ورگاندارىنىڭ قىزمەتكەرلەرى قۇجاتىن جوعالتىپ العان وزبەكستان ازاماتىن ەلىنە قايتاردى. بۇل تۋرالى وبلىستىق ىشكى ىستەر دەپارتامەنتىنىڭ ءباسپاسوز قىزمەتى حابارلادى.
.
ۇستىمىزدەگى جىلدىڭ 28 ماۋسىمىندا ارال ءاىىب-ءنىڭ قىزمەتكەرلەرى قىزمەت اتقارۋ كەزىندە «شىمكەنت-سامارا» تاس جولىنىڭ بويىندا اقتوبە وبلىسىنا قاراي كەتىپ بارا جاتقان «كاماز» اۆتوكولىگىن تەكسەرگەن. ونىڭ بارىسىندا اۆتوكولىك ىشىندە قۇجاتتارى جوق ءبىر ازامات انىقتالعان. وزىنەن سۇراستىرعان كەزدە ول وزبەكستان رەسپۋبليكاسىنىڭ 1989 جىلى تۋعان ازاماتى تيمۋر يۋسۋپوۆ ەكەنىن ايتقان. پوليتسيا قىزمەتكەرلەرى شەتەل ازاماتىنىڭ جەكە باسىن انىقتاۋ ءۇشىن ونى الىپ قالىپ, ءىسىن اۋداندىق سوتقا جولدايدى. ت.يۋسۋپوۆ سوت شەشىمىمەن جەكە باسى انىقتالعانعا دەيىن قىزىلوردا ءوىىد «قابىلداۋ-تاراتۋ ورنىنا» ورنالاستىرىلعان.
ازامات ت.يۋسۋپوۆتىڭ ءوز ايتۋىنشا, 21 ماۋسىمدا ءوزىنىڭ «شەۆرولەت-سپارك» جەكە اۆتوكولىگىمەن رەسەي فەدەراتسياسىنا جولعا شىققان. جولدا جانار مايى تاۋسىلعان سوڭ, جولدىڭ جيەگىنە كولىكتى قويىپ, جانار ماي الىپ كەلۋگە كەتكەن. 1 ساعاتتاي ۋاقىتتا قايتىپ ورالعاندا اۆتوكولىكتى تابا الماعان. ودان سوڭ تيمۋر يۋسۋپوۆ جولاي كولىكپەن قىزىلوردا قالاسىنا جەتكەن. قىزىلوردا قالاسىندا قۇجاتتارىن جوعالتىپ, ودان ءارى رەسەيگە جول تارتقان تيمۋردى جولدا توقتاتقان ارالدىق پوليتسەيلەر ونىڭ ودان ءارى اداسۋىنا مۇمكىندىك بەرمەدى.
اتالعان دەرەكتى دەپارتامەنت باسىشىلىعى تىكەلەي نازاردا ۇستادى. دەپارتامەنت باستىعىنىڭ ورىنباسارى امىربەك شايماعامبەتوۆتىڭ نۇسقاۋىمەن ت.يۋسۋپوۆتىڭ تۋعان جەرى وزبەكستان رەسپۋبليكاسى سامارقاند قالاسىنا سۇراۋ سالىنىپ, اكە-شەشەسىنە حابار جىبەرىلگەن. كورشىلەس وزبەك ەلىنىڭ ازاماتى تيمۋر يۋسۋپوۆتى اكەسى امين يۋسۋپوۆ كەلىپ, ءوز ەلىنە الىپ كەتتى. قىزىلوردا ءوىىد قىزمەتكەرلەرى تيمۋردىڭ اۆتوكولىگىن دە تاۋىپ بەردى. جاڭاقورعان اۋدانىنان تابىلعان اۆتوكولىكتى جاڭاقورعان ءاىىب قىزمەتكەرلەرى جول جيەگىندە 2-3 كۇن قاراۋسىز قالعاندىقتان جانە يەسى تابىلماعاندىقتان اۆتوتۇراققا ورنالاستىرعان ەكەن.
تيمۋردىڭ اكەسىنىڭ ايتۋىنشا, بالاسىنىڭ اقىل-ەسىندە ازداعان كەمتارلىق بار كورىنەدى. سونداي-اق ەستە ساقتاۋ قابىلەتىنىڭ تومەندىگىن دە ايتىپ وتىر.
بالاسىنىڭ تابىلعانىنا قۋانعان اكەنىڭ قىزىلوردالىق پوليتسەيلەرگە ايتار العىسى شەكسىز. «بالامدى قىزىلوردالىق پوليتسەيلەر تاۋىپ بەرمەگەندە, قاي جەردەن ىزدەرىمدى بىلمەس ەدىم», دەيدى امين يۋسۋپوۆ ريزا كوڭىلىن ءبىلدىرىپ.
بالاسىن اكەسىنە تابىستاعان قىزىلوردا ءوىىد قىزمەتكەرلەرى ت.يۋسۋپوۆتىڭ قۇجاتتارىن راسىمدەپ, كولىگىن وزىنە قايتارىپ, اكەلى-بالالى كورشى ەلدىڭ ازاماتتارىن ەلىنە اتتاندىرىپ سالدى.
سۇلتان بوزايعىر.