بۇگىن قاراعاندىداعى «دوستىق ۇيىندە» وبلىس ورتالىعىنداعى كوشەلەردىڭ اتاۋلارىن وزگەرتۋگە بايلانىستى قوعامدىق تىڭداۋ ۇيىمداستىرىلدى. ماڭىزى زور شاراعا ادامنىڭ كوپ جينالعانى سونشالىقتى, ولاردىڭ كوبى 400 ورىندىق نەگىزگى زالعا سىيماي, ىشتە بولىپ جاتقان پىكىرتالاستى سىرتتا تۇرىپ ەكراننان تاماشالادى.
كۇن تارتىبىندە قاراعاندى قالاسىنداعى 10 كوشەنىڭ اتاۋىن اۋىستىرۋ ماسەلەسى قارالدى. ونىڭ ىشىندە قالاداعى باستى كوشەلەردىڭ ءبىرى – اتىشۋلى لەنين كوشەسى دە بار ەدى. سونىمەن قاتار, بۇل تىزىمگە پريكانالنايا, كريۆوگۋزا, زاششيتنايا, زونالنايا, وليمپيسكايا, ۆولوچاەۆسكايا, كۋۆسكايا, امانجولوۆ سىندى كوشەلەر دە كىرگەن بولاتىن.
جيىن بارىسىندا زيالى قاۋىم وكىلدەرى, قوعام بەلسەندىلەرى جانە كوشە اتاۋلارىن وزگەرتۋگە قارسى توپتىڭ مۇشەلەرى دە ءسوز الىپ, پىكىر تالاستىردى. اتاپ ايتقاندا, بەلگىلى اقىن سەرىك اقسۇڭقار ۇلى, قوعام بەلسەندىسى ايتقوجا فازىل, تاريحشى زاۋرەش ساقتاعانوۆا وزگەرىستەردىڭ ۋاقىت تالابى ەكەنىن, ەندى كىبىرتىكتەۋدىڭ ەش قاجەتى جوقتىعىن ارگى-بەرگى تاريحتان مىسالدار كەلتىرە وتىرىپ كوپشىلىككە جەتكىزدى.
پىكىرتالاس كەزىندە «كوشە اتاۋلارىن اۋىستىرۋعا قىرۋار اقشا جۇمساعانشا, سول قارجىنى قالانىڭ كەم-كەتىگىن تۇزەۋگە جۇمساسا بولماس پا ەدى؟», دەگەن سىڭايداعى قارسى پىكىر ايقاندار دا بولدى. مۇنداي پىكىر يەلەرىنە قاراتا بەلگىلى كاسىپكەر, «ناتيجە» ءسۇت كومپانياسىنىڭ باسشىسى ەرلان ءاشىم اتاۋلاردى اۋىستىرۋعا كەتەتىن شىعىننىڭ ءبارىن ءوزى باسقاراتىن كاسىپورىننىڭ كوتەرىپ الۋعا دايىن ەكەنىن مالىمدەدى.
سونىمەن, قوعامدىق تىڭداۋعا جيىلعان قاراعاندىلىقتار وزگەرىستەردى قولداپ, لەنين كوشەسىنىڭ – اباي قۇنانباي ۇلى, پريكانالنايا كوشەسىنىڭ – سارىارقا, كريۆوگۋزا كوشەسىنىڭ – قاسىم امانجولوۆ, زاششيتنايا كوشەسىنىڭ – گريگوري پوتانين, زونالنايا كوشەسىنىڭ – الەكساندر زاتاەۆيچ, وليمپيسكايا كوشەسىنىڭ – نارمانبەت تولەپوۆ, ۆولوچاەۆسكايا كوشەسىنىڭ – كامالي دۇيسەمبەكوۆ, كۋۆسكايا كوشەسىنىڭ – قازىبەك نۇرجانوۆ, امانجولوۆ كوشەسىنىڭ – بالقانتاۋ جانە نۇرجانوۆ كوشەسىنىڭ مەرەي كوشەسى بولىپ اۋىستىرىلۋىنا ءبىراۋىزدان داۋىس بەردى.
قوعامدىق تىڭداۋدى جۇرگىزگەن قاراعاندى قالالىق ءماسليحاتىنىڭ حاتشىسى قۇدايبەرگەن بەكسۇلتانوۆتىڭ ايتۋىنشا, جيىن حاتتاماسى قالالالىق ءماسليحاتتىڭ كەزەكتەن تىس سەسسياسىندا قارالىپ, ارنايى شەشىم قابىلدانۋى ءتيىس. ودان ءارى ول شەشىم قاراعاندى وبلىستىق ءماسليحاتىنىڭ سەسسياسى مەن وبلىستىق ونوماستيكا كوميسسياسىندا بەكىتىلەدى. بەكىتىلگەن شەشىم رەسپۋبليكالىق كوميسسيانىڭ قاراۋىنا جىبەرىلىپ, ول جاقتان كەلىسىم كەلگەن جاعدايدا, قورىتىندى قۇجات باق-تاردا جاريالانادى. ياعني, مۇنىڭ بارىنە ۋاقىت كەرەك بولادى. قالالىق ءماسليحاتتىڭ حاتشىسى قانشا ۋاقىت قاجەت بولاتىنىن ناقتى ايتا الماسا دا, بۇل ۇدەرىستىڭ مامىر ايىنا دەيىن سوزىلۋى مۇمكىن دەگەن پىكىر ءبىلدىردى.