ابحازيا ورتالىق سايلاۋ كوميسسياسى پرەزيدەنت سايلاۋىن وتكىزۋ كۇنىن بەلگىلەدى. بۇل تۋرالى ريا نوۆوستي حابارلادى.
«قايتا سايلاۋ وتكىزۋ كۇنى 2020 جىلدىڭ 22 ناۋرىزىنا بەلگىلەندى» دەدى ورتالىق سايلاۋ كوميسسياسىنىڭ توراعاسى تاماز گوگيا شەشىم ءبىراۋىزدان دەرلىك قابىلدانعانىن ايتا وتىرىپ.
ول زاڭدى تۇردە سايلاۋ قايتا بولاتىنىن جانە وعان كەز كەلگەن كانديدات قاتىسا الاتىنىن اتاپ ءوتتى.
ەسكە سالساق, 9 قاڭتاردا نارازىلىق بىلدىرۋشىلەر ابحازيا باسشىسىنىڭ اكىمشىلىگىنە باسىپ كىرىپ, پرەزيدەنتتىڭ وتستاۆكاعا كەتۋىن تالاپ ەتكەن بولاتىن. قاۋىپسىزدىك كەڭەسىنىڭ شۇعىل وتىرىسىنان كەيىن پرەزيدەنت راۋل حادجيمبا كۇش قۇرىلىمدارى كۇشەيتىلگەن رەجيمگە اۋىستىرىلعانىن, ال قاجەت بولعان جاعدايدا ول رەسپۋبليكادا توتەنشە جاعدايدى جاريالاۋ جونىندە شارالار قولداناتىنىن مالىمدەدى.
كەيىن ابحازيا پارلامەنتى حادجيمباعا پرەزيدەنت قىزمەتىنەن كەتۋدى ۇسىندى. بىراق راۋل حادجيمبا وتستاۆكاعا كەتپەيتىنىن مالىمدەدى.
«جالپىۇلتتىق كەلىسىمگە كەلىپ, تۇراقتى جاعدايدى ساقتاپ قالۋ ءۇشىن پرەزيدەنت بارلىق ماسەلەنى كەلىسسوزدەر ارقىلى شەشۋى قاجەت دەپ سانايدى» دەدى پرەزيدەنت اكىمشىلىگى باسشىسىنىڭ ورىنباسارى دميتري شامبا.