وتكەن جىلدىڭ قاراشا ايىنىڭ سوڭعى شيرەگى مەن جەلتوقسان ايىنداعى تابيعات سىنىنا الماتى وبلىسىنىڭ جول جوندەۋشىلەرى توتەپ بەرە الماي قالعان ەدى.
ايماقتاعى ىشكى قاتىناس جولدارىن بىلاي قويعاندا, رەسپۋبليكالىق ماڭىزى بار تراسسالاردىڭ قارى كۇرەلمەي, كوكتايعاق بولىپ جاتتى. سونىڭ كەسىرىنەن جولداردا كولىك اپاتى كوبەيىپ, ادام ءومىرىن جالماعان ونداعان وقيعا بولدى. بۇل وبلىستاعى جول جوندەۋشى ۇيىمداردىڭ قار تازارتۋ جۇمىستارىنا دايىن ەمەستىگىن كورسەتتى. ال تراسسالاردىڭ دەر كەزىندە كۇرەلمەۋىنە جاۋاپتى مەكەمەلەردەگى ارنايى تەحنيكانىڭ جەتىسپەۋشىلىگى باستى سەبەپ بولعان ەكەن.
جاقىندا وبلىس اۋماعىندا كولىك جولدارىنداعى توتەنشە جاعدايدىڭ ورىن الۋىنا قاتىستى جاعداي «جەتىسۋ – ادالدىق الاڭى» كەڭسەسىندە قارالىپ, جاۋاپتى مەكەمەلەردى تارتىپكە شاقىرۋ جايى ءسوز بولدى.
- بۇعان دەيىن تەحنيكالاردىڭ قىسقى كەزەڭگە دايىندىعىن تەكسەرۋ ناتيجەلەرى بويىنشا جول دايىندىعىمەن اينالىساتىن «قازاۆتوجول» اق, «كازاحاۆتودور» جشس ۇيىمدارىندا ارنايى تەحنيكانىڭ جەتكىلىكسىزدىگى انىقتالعان. وسىعان سايكەس, ارنايى تەحنيكالاردى الىپ, ولاردى ستاندارتقا سايكەستەندىرۋ قاجەتتىلىگى تۋرالى ۇسىنىس بەرىلگەن بولاتىن. ولارعا وبلىستىق پوليتسيا دەپارتامەنتىنىڭ قىزمەتكەرلەرى 25 جەلتوقسانعا دەيىن جول قاۋىپسىزدىگىن قامتاماسىز ەتۋ تۋرالى ەسكەرتۋ دە بەرگەن. تاپسىرمانىڭ جەدەل جۇزەگە اسۋى مەن كورسەتىلگەن كەمشىلىكتەردىڭ قانشالىقتى جويىلعانى جايىندا كولىك جۇرگىزۋشىلەر اراسىندا باقىلاۋ ساۋالناماسى جۇرگىزىلدى. وكىنىشكە قاراي, رەسپۋبليكالىق ماڭىزى بار اۆتوموبيل جولىنا تەحنيكالىق قىزمەت كورسەتۋمەن جانە جوندەۋمەن اينالىساتىن «كازاحاۆتودور» مەكەمەسىنىڭ بۇرىن بەرىلگەن ەسكەرتۋلەردى ورىنداماعانى جانە جولدى قىستا كۇتىپ ۇستاۋعا قويىلاتىن تالاپتاردى ساقتاماعانى انىقتالدى, - دەيدى سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتى باسشىسىنىڭ ءبىرىنشى ورىنباسارى جاندوس جۇماباەۆ.
ناتيجەسىندە «كازاحاۆتودور» سەرىكتەستىگى اكىمشىلىك كودەكستىڭ 462-بابىنىڭ 3-تارماعىنا سايكەس ايىپتالىپ, ءىس پروتسەسسۋالدىق شەشىم قابىلداۋ ءۇشىن سوتقا جولدانعان. ياعني, وبلىس جولدارىنداعى كۇتىپ باپتاۋعا نەمقۇرايلى قاراعانى ءۇشىن مەكەمە ەندى 500 ايلىق ەسەپ كورسەتكىشى مولشەرىندە ايىپپۇل تولەيدى. الايدا, «كازاحاۆتودور» سەرىكتەستىگىن جول ساپاسى مەن ادامداردىڭ قاۋىپسىزدىگىنىڭ 1 262 500 تەڭگەگە باعالانعانى ويلاندىرسا, قانە...
الماتى وبلىسى