وتكەن جاز بويى تالدىقورعان قالاسىنىڭ تۇرعىندارى ءۇي توناۋشىلاردان ابدەن زارەزاپ بولعان ەدى. جەكە ۇيلەردىڭ قاراۋسىز قالعان ءساتىن قالت جىبەرمەگەن ۇرى تەرەزە مەن ەسىكتى بۇزىپ كىرىپ, قولعا ىلىككەننىڭ بارلىعىن ۇپتەپ كەتىپ وتىرعان.
وسىلايشا اككى ۇرىنىڭ كەسىرىنەن وتىز ءۇي تونالىپ, جوعالعان زات پەن اقشا, اشەكەي بۇيىمداردىڭ قۇنى 1 ملن تەڭگەگە جەتكەن. تۇرعىنداردى قان قاقساتقان قاسكويدى قۇرىقتاۋ ءۇشىن وبلىستاعى ۇزدىك ءتارتىپ ساقشىلارىنان ارنايى توپ تا قۇرىلدى. ىسكە جۇمىلدىرىلعان ءىز كەسۋشىلەر ۇرلىق ورنىنان تابىلعان ساۋساق ىزدەرىن ۇزاق زەرتتەپ, بارلىق قىلمىستى ءبىر ادامنىڭ جاساعانىنا كوز جەتكىزەدى. زەرتتەۋلەر ساۋساق ءىزىنىڭ 28 جاستاعى بۇرىن سوتتى بولعان ازاماتقا ءتان ەكەنىن انىقتاعان ەكەن.
الايدا, الاكول اۋدانىندا تۋعان اككى ۇرىنى ۇستاۋ وڭاي بولمادى. تۇراقتى تىركەۋى جوق قىلمىسكەر وبلىس اۋماعىندا قاشىپ ءجۇرىپ, جاقىندا عانا قولعا ءتۇستى. تەرگەۋ كەزىندە ول تالدىقورعان قالاسىنان 30 ءۇيدى توناپ, ۇرلانعان زاتتاردى ساتىپ 1 ملن تەڭگە پايدا كورگەنىن مويىندادى.