جاقىندا چەحيانىڭ پاردۋبيتسە قالاسىندا توعىزقۇمالاقتان بليتس پەن راپيد ءتۇرى بويىنشا ەرەسەكتەر اراسىندا ەۋروپا چەمپيوناتى مەن جاسوسپىرىمدەر اراسىندا حالىقارالىق تۋرنير ءوتتى.
جاقىندا چەحيانىڭ پاردۋبيتسە قالاسىندا توعىزقۇمالاقتان بليتس پەن راپيد ءتۇرى بويىنشا ەرەسەكتەر اراسىندا ەۋروپا چەمپيوناتى مەن جاسوسپىرىمدەر اراسىندا حالىقارالىق تۋرنير ءوتتى.
قازىرگى كۇنى بۇل شاھار ەۋروپاداعى قازاقتىڭ ۇلتتىق ويىن ءتۇرىن ناسيحاتتاۋ جانە دامىتۋ ورداسىنا اينالىپ كەلەدى. بۇل ەلدە مۇنداي شارالاردى وتكىزۋ وسىدان بىرنەشە جىل بۇرىن قولعا الىنا باستاعان بولاتىن. سونىڭ ناتيجەسىندە بۇگىندە پاردۋبيتسەدە توعىزقۇمالاقتان وتەتىن جارىستار چەحيانىڭ عانا ەمەس, ەۋروپانىڭ باسقا دا ەلدەرىنىڭ قىزىعا قاتىساتىن جارىسىنا اينالىپ وتىر. بيىلعى ءتول ويىنىمىزدان جارىسقا 30-عا جۋىق ادام قاتىستى. ەرەسەكتەر اراسىنداعى ەۋروپا چەمپيوناتىنا 8 سپورتشى قاتىسىپ, اينالمالى جۇيە بويىنشا جارىس وتكىزسە, راپيد جانە بليتس تۋرنيرىندە باق سىناسقان 17 سپورتشى شۆەيتسار جۇيەسى بويىنشا 7 تۋردان جارىس وتكىزدى. ال جاستار اراسىنداعى تۋرنيرگە 7 سپورتشى قاتىسىپ, 6 تۋر وتكىزدى. ەۋروپا چەمپيوناتىنا قازاقستان, چەحيا, رەسەي, حورۆاتيا, شۆەيتساريا جانە اقش-تىڭ وكىلدەرى قاتىستى. بۇل باسەكەدە چەح وندرە تساح 7 ويىننان 7 ۇپاي جيناپ ەۋروپا چەمپيونى اتانسا, ەكىنشى ورىندى 6 ۇپايمەن ونىڭ وتانداسى ياكۋب تساح پەن ءۇشىنشى ورىندى 5 ۇپايمەن حانا كوتينوۆا يەلەندى.
ال بليتس جانە راپيد تۇرىنەن ءبىزدىڭ ا. بايزەكەنوۆا 7 ويىننان 6,5 ۇپاي جيناپ چەمپيون اتاندى. ەكىنشى ورىنعا 6 ۇپاي العان C. Cاپاربەكوۆا, ءۇشىنشى ورىنعا 5 ۇپاي جيناعان گۇلجان ماعاۋوۆا تۇراقتادى. جاسوسپىرىمدەر اراسىنداعى جارىستا چەح سپورتشىلارى بارلىق جۇلدەنى الدى.
چەحيادا ەكى كۇنگە سوزىلعان جارىس اسا قىزىقتى جانە تارتىستى جاعدايدا ءوتتى. شارا سوڭىندا جارىستىڭ دەمەۋشىلەرى جانە دۇنيەجۇزىلىك توعىزقۇمالاق فەدەراتسياسى چەمپيوندار مەن جۇلدەگەرلەرگە ارنايى ديپلومدار, مەدالدار جانە باعالى سىيلىقتار تاپسىردى. وسىدان كەيىن پاردۋبيتسەدە سەمينار مەن توعىزقۇمالاقتى دامىتۋ مەن ۇيرەتۋ جونىندە ءىس-شارالار وتكىزىلدى.
داستان كەنجالين,
«ەگەمەن قازاقستان».