بۇل تۋرالى شايسۇلتان شاياحمەتوۆ اتىنداعى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ اتقارۋشى ديرەكتورى ەربول تىلەشوۆ پرەزيدەنت قاسىم-جومارت توقاەۆتىڭ «اباي جانە ءححى عاسىرداعى قازاقستان» ماقالاسىنا قاتىستى پىكىرىندە ايتتى.
«ابايدىڭ بيىگى, ابايدىڭ تاعىلىمى بىزگە رۋحاني ازىق. وسى تۇرعىدان العاندا پرەزيدەنت ءوز ماقالاسىندا بىرنەشە ماسەلەنى كوتەردى. مەن وزىمە ءۇش ماسەلەنى ءتۇرتىپ الدىم. ءبىرىنشىسى – ابايدى تانۋ, يگەرۋ, ەكىنشىسى – اباي يدەيالارىنىڭ بۇگىنگى كۇندە وزەكتىلىگى جانە سوڭعىسى – ابايدى جالپىادامزاتقا ورتاق تۇلعا رەتىندە تانىتۋ جانە قابىلداۋ. ماقالادا بۇدان وزگە ءتىل, مادەنيەت, ەڭبەك ماسەلەلەرى دە ايتىلعان. ەڭ باستى مىندەتىمىز – اباي ارقىلى ءبىزدىڭ ۇلتتىق بولمىسىمىزدى, وزىق قاسيەتتەرىمىزدى ۇشتاۋ. ول ءۇشىن جوعارىدا ايتقان ابايدى تانۋ ماسەلەسىن قولعا الۋىمىز كەرەك. بۇل جەردە ابايدى اعارتۋشىلىق ەمەس, فيلوسوف, ۇلى ويشىل دەڭگەيىندە تانۋىمىز كەرەك. اباي XIX عاسىردىڭ ۇلانى بولعانىمەن, ول جالپىادامزاتتىق ماسەلەلەردى ايتتى. ودان بەرى قوعام وزگەردى, قوعامدىق قاتىناس وزگەردى, بىراق ادامنىڭ پەيىلى, نيەتى, ماحابباتى, ۇمتىلىسى, وزگەرگەن جوق. وسى تۇرعىدان قاراساق, ابايدىڭ ايتقان ويلارى ءالى دە وزەكتى ءارى ماڭىزدى. ادامدىق قارىم-قاتىناس, قاسيەت, اقىل مەن جۇرەك تاربيەسى سەكىلدى ويلارى بۇگىنگى كۇنگە قاتىستى ەكەنى دە ماقالادا كورسەتىلگەن. ەل بولىپ ەكونوميكالىق, ديپلوماتيالىق, ساياسي جاعىنان الەمگە تانىلىپ جاتىرمىز, بىراق بۇل ەل بولۋ ەمەس. ەل بولۋ – اباي سەكىلدى ۇلىڭ, ازاماتىڭ مەن تۇلعاڭ بولۋ. اباي – ءبىزدىڭ بولمىسىمىز, قازاقتىڭ اقىلىنىڭ جەتكەن جەرى. ابايدىڭ وبرازىندا قازاقتىڭ ماسەلەسى, قازاقتىڭ ويى, قازاقتىڭ تاعىلىمى بار. وسىنى الەمدىك دەڭگەيدە تانىتۋ ماسەلەسى – پرەزيدەنت ماقالاسىنىڭ باستى ارقاۋى», - دەدى ەربول تىلەشوۆ.