قاسىم-جومارت توقاەۆ «Egemen Qazaqstan» گازەتىنىڭ بۇگىنگى سانىندا جاريالانعان «اباي جانە ءححى عاسىرداعى قازاقستان» اتتى ماقالاسىندا ابايدى ۇلتىمىزدىڭ مادەني كاپيتالى رەتىندە ناسيحاتتاۋ كەرەك ەكەنىن جازادى.
«اباي ءوزىنىڭ قارا سوزدەرىندە ادامزات بالاسىنا ورتاق مۇرالاردى دارىپتەي وتىرىپ, رۋحاني بيىككە قۇلاش سەرمەپ, الىسقا قانات قاققانىن كورسەتەدى. ونىڭ قارا سوزدەرىنىڭ ارقاۋى – كىسىلىك, مادەنيەت, ىزگىلىك. حاكىم ابايدىڭ قارا سوزدەرىنە بالاما ەڭبەك ىزدەسەك, فرانتسۋز ويشىلى مونتەننىڭ جازبالارى ويعا ورالادى. دەسەك تە, مونتەن ءوز بولمىسى مەن ادام تۇلعاسى جونىندە كوبىرەك وي تولعاسا, اباي قارا سوزدەرىنىڭ باستى ميسسياسى – ويلانۋ, وزگەگە وي سالۋ, ماقساتتى ۇستانىمعا اينالدىرۋ. دەمەك, ۇلى ويشىلدىڭ قارا سوزدەرى – اسا قۇندى ەڭبەك» دەپ جازدى پرەزيدەنت «اباي جانە ءححى عاسىرداعى قازاقستان» ماقالاسىندا.
سونداي-اق قاسىم-جومارت توقاەۆ الەمدىك مادەنيەتتە ابايدى جوعارى دارەجەدە تانىتۋ قاجەت ەكەنىن جازدى.
«دۇنيە جۇزىندە عىلىم مەن ءبىلىمنىڭ ءتۇرلى سالالارىن دامىتۋعا زور ۇلەس قوسىپ, بۇكىل ادامزاتقا ورتاق ويشىل رەتىندە تانىلعان تۇلعالار بارشىلىق. مىسالى, قىتاي دەگەندە لاو-تسزى مەن كونفۋتسي, رەسەي دەگەندە دوستوەۆسكي مەن تولستوي, فرانتسيا دەگەندە ۆولتەر مەن رۋسسو بىردەن ويعا كەلەدى. سول سياقتى شەتەلدىكتەردىڭ ءبارى بىردەي قازاقستان دەگەندە بىردەن ابايدىڭ ەسىمىن اتايتىنداي دارەجەگە جەتۋىمىز كەرەك. وزگە جۇرت «قازاق حالقى – ابايدىڭ حالقى» دەپ بىزگە ءىلتيپات ءبىلدىرىپ وتىرسا, زور مارتەبە بولارى انىق» دەلىنگەن ماقالادا.
پرەزيدەنتتىڭ ايتۋىنشا, ەڭ الدىمەن ابايدى ۇلتىمىزدىڭ مادەني كاپيتالى رەتىندە ناسيحاتتاۋىمىز كەرەك.
«وركەنيەتتى ەلدەر قازاقتىڭ بولمىس-ءبىتىمىن, مادەنيەتى مەن ادەبيەتىن, رۋحاني ورەسىن الەمدىك دەڭگەيدەگى ءبىرتۋار پەرزەنتتەرىنىڭ دارەجەسىمەن, تانىمالدىعىمەن باعالايتىنىن ۇمىتپايىق. سوندىقتان ابايدى جاڭا قازاقستاننىڭ برەندى رەتىندە الەم جۇرتشىلىعىنا كەڭىنەن تانىستىرۋ قاجەت. بۇل – بۇگىنگى ۇرپاقتىڭ قاستەرلى بورىشى», دەپ جازدى ق.توقاەۆ.