قاسىم-جومارت توقاەۆ «Egemen Qazaqstan» گازەتىنىڭ بۇگىنگى سانىندا جارىق كورگەن «اباي جانە XXI عاسىرداعى قازاقستان» اتتى ماقالاسىندا ۇلى ابايدى الەم جۇرتشىلىعىنا ءوز دەڭگەيىندە تانىتا الماي كەلە جاتقانىمىزدى ايتىپ, عۇلامانىڭ الەمدىك مادەنيەتتىڭ تۇلعاسى بولۋعا ابدەن لايىق ەكەنىن العا تارتتى.
«قازىرگى وركەنيەتتى مەملەكەتتەردىڭ بارلىعى دەرلىك شوقتىعى بيىك تاريحي تۇلعالارىمەن ماقتانا الادى. ولاردىڭ قاتارىندا ساياساتكەرلەر, مەملەكەت جانە قوعام قايراتكەرلەرى, قولباسشىلار, اقىن-جازۋشىلار, ونەر جانە مادەنيەت مايتالماندارى بار. قازاق جۇرتى دا ءبىرتۋار پەرزەنتتەردەن كەندە ەمەس. سولاردىڭ ىشىندە ابايدىڭ ورنى ەرەكشە. بىراق ءبىز ۇلى ويشىلىمىزدى جاھان جۇرتىنا لايىقتى دەڭگەيدە تانىتا الماي كەلەمىز»,- دەدى مەملەكەت باسشىسى.
پرەزيدەنت ماقالاسىندا قازاق ۇلتىن, رۋحانياتى مەن مادەنيەتىن الەمگە اباي ارقىلى تانىتۋ كەرەكتىگىن باسا ايتادى.
«مەن كوپ جىلعى ديپلوماتيالىق قىزمەتىمدە باسقا ەلدەردىڭ ساياساتكەرلەرىمەن, ءتۇرلى سالا ماماندارىمەن ءجيى كەزدەستىم. شەتەلدىكتەرمەن ادامزاتقا ورتاق كوپتەگەن تۇيتكىلدى ماسەلە تۋرالى پىكىر الماسىپ, وي ءبولىستىم. جالپى, ولار قازاقستاننىڭ ساياسي جانە ەكونوميكالىق جەتىستىكتەرى جونىندە جاقسى بىلەدى. ال رۋحاني جانە مادەني قۇندىلىقتارىمىزبەن جەتە تانىس ەمەس. وسى ورايدا «نەگە قازاقتىڭ ءبىتىم-بولمىسىن, مادەنيەتىن اباي ارقىلى تانىتپايمىز؟», دەگەن سۇراق تۋىندايدى. عۇلاما اباي – قازاق توپىراعىنان شىققان الەمدىك دەڭگەيدەگى كەمەڭگەر. ول كۇللى ادامزات بالاسىنا اقىل-ويدىڭ جەمىسىن سىيلادى» دەلىنگەن ماقالادا.