قىس مەزگىلى قىزىقتى ويىندار مەن كوڭىلدى ۋاقىت وتكىزۋگە تاماشا مۇمكىندىك. سونىمەن قاتار قازىر قازاقستاندىق وقۋشىلاردىڭ قىسقى دەمالىسى وتۋدە. بىراق قۋانىش پەن بەلسەندى دەمالۋدان باسقا, بۇل كەزەڭ قاۋىپتى بولۋى مۇمكىن. ويتكەنى, دەمالىس كەزىندە بالالار كوپ جاعدايدا كوشەدە ءجيى بولىپ, ەرەسەكتەردىڭ قاراۋىنسىز قالادى.
دەنساۋلىق ساقتاۋ مينيسترلىگى قوعامدىق دەنساۋلىق ساقتاۋ ۇلتتىق ورتالىعىنىڭ ينفەكتسيالىق ەمەس اۋرۋلاردىڭ مونيتورينگى ءبولىمىنىڭ باس مامانى قۋانىش الىمبەتوۆتىڭ ايتۋىنشا, قىسقى ۋاقىتتا كوكتايعاققا جانە اۋا رايى جاعدايلارىنا بايلانىستى جاراقاتتار الۋ قاۋپى ارتادى.
«ەگەر بالاڭىز كونكيمەن, شاڭعىمەن نەمەسە شانامەن سىرعاناۋدى ۇناتسا, بۇل ويىن قۇرالدارىن تەكسەرۋ كەرەك. شاڭعى بالانىڭ اياعىنا سەنىمدى جانە دۇرىس بەكىتىلۋى كەرەك, ال كونكيلەر ولشەمگە سايكەس بولۋى ءتيىس. كونكيمەن ارنايى جابدىقتالعان ورىنداردا نەمەسە مۇز ايدىندارىندا سىرعاناۋ كەرەك. شاڭعىمەن جانە كونكيمەن سىرعاناۋ, سونداي-اق تايعاق تابانى بار اياق كيىمدى كيۋ اياق سىنۋىنىڭ نەگىزگى سەبەپتەرى بولىپ تابىلادى. سىنىققا كۇدىكتەنگەن كەزدە دارىگەرگە بارۋدى كەيىنگە قالدىرماڭىز. قار ۇستىندەگى ويىن, كوزدىڭ زاقىمدانۋىنا اكەلۋى مۇمكىن, سوندىقتان ەرەسەكتەر بالالارعا مۇز قابىعى بار قاردى لاقتىرماۋعا ەسكەرتۋ جاساۋ كەرەك. جىلدىڭ سۋىق مەزگىلىندە نەگىزگى قاۋىپ-قاتەر كوكتايعاق بولىپ تابىلادى. بىرىنشىدەن, بالاعا اياق كيىمدى دۇرىس تاڭداپ الىڭىز. جۇمساق رەزەڭكەدەن نەمەسە تەرموەلاستوپلاستان جاسالعان, وكشەسىز قابىرعالى تابانى بار اياق كيىم كيگەنى دۇرىس. ەكىنشىدەن, كوكتايعاق كەزىندە ۇلكەن قاۋىپ-قاتەردى ساتىلار تۋعىزادى. مۇمكىندىگىنشە, ءتۇسۋ كەزىندە اياقتى باسپالداقتىڭ بويىمەن قويىپ, ابايلاپ ءتۇسۋ كەرەك» دەيدى ول.
مامان, سونىمەن قاتار جول-كولىك جاراقاتتارى تۋرالى دا ەسكەرتەدى.
«بالالار كولىك جاقىنداپ كەلە جاتقانىن كورە تۇرا, تەزىرەك ءوتىپ كەتۋگە اسىعادى, ال تايعاق جولدا جۇرگىزۋشى تەجەۋگە ۇلگەرمەۋى مۇمكىن. بالاعا مىندەتتى تۇردە جول ءجۇرۋ ەرەجەلەرىن ساقتاۋ قاجەتتىگىن ەسەرتۋ كەرەك. تاعى ءبىر كەڭ تارالعان قىسقى جاراقات - ۇسىك. وعان اۋانىڭ تومەن تەمپەراتۋراسى عانا ەمەس, دىمقىل اۋا رايى, ىلعالدى كيىم, تىعىز اياق كيىم سەبەپ بولۋى مۇمكىن. كوبىنەسە قول مەن اياقتىڭ ساۋساقتارى, بەت, مۇرىن, قۇلاق ۇسەدى. جاعىمسىز سالدارلاردان اۋلاق بولۋ ءۇشىن بالانى سەرۋەندەۋگە دۇرىس كيىندىرگەن ءجون. اياعىن قىسپايتىن جانە سۋ وتكىزبەيتىن اياق كيىم, جىلى استارلى سۋ جۇقپايتىن ماتەريالدان جاسالعان باس كيىم قاجەت. تەرىنى ارنايى بالالار كرەمىمەن قورعاۋ كەرەك» دەدى مامان.