قورعالجىن اۋدانىندا جاڭا وقۋ جىلىنا دايىندىق جۇمىستارى بەلسەندى تۇردە اتقارىلۋدا. قازىردىڭ وزىندە ەڭ ءىرى «درۋجبا» ورتا مەكتەبى العاشقى قوڭىراۋ سالتاناتىنا ازىرلىكتىڭ سوڭعى نۇكتەسىن قويۋعا جاقىن.
اتالعان مەكتەپتى كۇردەلى جوندەۋدەن وتكىزۋگە «جۇمىسپەن قامتۋ-2020» باعدارلاماسى بويىنشا رەسپۋبليكالىق بيۋدجەتتەن 78 ميلليون تەڭگە بولىنگەن بولاتىن. بۇگىنگى كۇنى قارجى تولىعىمەن يگەرىلىپ, اتقارىلعان جۇمىستارعا جوعارى باعا بەرىلۋدە. مۇندا 32 ورىندىق ينتەرنات پەن 40 ورىندىق مەكتەپ جاسىنا دەيىنگى شاعىن ورتالىق جۇمىس ىستەيتىن بولادى. سونداي-اق, باعدارلاما اياسىندا جەرگىلىكتى تۇرعىنداردى جوندەۋ جۇمىستارىنا تارتۋ جانە مەكتەپتىڭ امبەباپ قىزمەتىن قامتاماسىز ەتۋ سياقتى ەكى بىردەي الەۋمەتتىك جوبا جۇزەگە اسىرىلىپ وتىرعانىن ايتقىمىز كەلەدى.
دايىندىق كەزەڭىندە قورعالجىن مەكتەپ-گيمنازياسىنا 26 ميلليون تەڭگەنىڭ جاڭا بلوك-مودۋلدىك قازاندىعى ساتىپ الىندى. قوس قازاندىقتى ورناتۋمەن بىرگە مەكتەپتىڭ كومىر قويماسى جوندەلىپ, قوسالقى عيماراتتار جاڭعىرتىلدى. جاڭادان جابدىقتالعان قازاندىقتىڭ قۋاتى وقۋ ورنىنىڭ بەس قاباتتى عيماراتىن تولىق جىلىتا الادى.
مۇنداي بلوك-مودۋلدىك قازاندىقتار «بالاۋسا» بالالار باقشاسى مەن اۋداندىق مادەنيەت ۇيىندە دە ورناتىلاتىن بولادى. سونداي-اق, امانكەلدى, قىزىلتۋ, مايشۇقىر جانە ش.ءۋاليحانوۆ اتىنداعى مەكتەپتەردىڭ جىلۋ جۇيەلەرى اعىمداعى جوندەۋدەن وتكىزىلۋدە. بۇل ماقساتقا 2 ميلليون 700 مىڭ تەڭگە قارجى بولىنگەن.
باقبەرگەن امالبەك,
«ەگەمەن قازاقستان».
اقمولا وبلىسى,
قورعالجىن اۋدانى.