شىعىس قازاقستان وبلىسىندا اۋدانداردىڭ مادەني كۇندەرىن وتكىزۋ داستۇرگە اينالعان. زايسان اۋدانىنىڭ وسكەمەندەگى مادەني كۇندەرى ەستە قالارلىقتاي بولىپ ءوتتى. وعان وسى ءوڭىردىڭ تالانتتى ۇل-قىزدارى, بۇل كۇندەرى الماتىدا تۇرىپ جاتقان اقىن ۇلىقبەك ەسداۋلەت, كۇمىس كومەي انشىلەر دالەل ءۋاش, قانات, ايتكۇل قۇدايبەرگەنوۆتەر, تەحنيكا عىلىمدارىنىڭ دوكتورى, اكادەميك مارات بىتىمباەۆ, وسكەمەندەگى زيالى ازاماتتار, زايساننىڭ ونەرپازدارى قاتىستى.
الماتىدان كەلگەن انشىلەر, ءۇرجار اۋدانىنىڭ تالانتتى ونەرپازى, داۋلەسكەر كۇيشى سەكەن تۇرىسبەك, زايساندىق ونەرپازدار ءتورت ساعات بويى وبلىس ورتالىعى تۇرعىندارىن ءان مەن كۇيگە بولەدى. كەشكىلىك قالا تۇرعىندارى گالا كونتسەرتتى تاماشالادى. كەشتە ءسوز العان زايسان اۋدانىنىڭ اكىمى الماس وڭداقانوۆ ءوڭىر باسشىسى ب.ساپارباەۆتىڭ باستاماسىمەن قانات قاققان «تۋعان جەرگە تاعزىم!» اكتسياسىنىڭ اۋىلداردا دا جالعاسىپ جاتقانىن تىلگە تيەك ەتتى.
وسى سەنبىدە اياگوز اۋدانىنىڭ وسكەمەندەگى مادەني كۇندەرى وتپەك. ءتالىم الارلىق مادەني شارا جىل سوڭىنا دەيىن جالعاسا بەرەدى.
وڭداسىن ەلۋباي,
«ەگەمەن قازاقستان».
وسكەمەن.