كەشە ەلىمىزدىڭ سىرتقى ىستەر ءمينيسترى ەرلان ىدىرىسوۆ استاناعا جۇمىس ساپارىمەن كەلگەن حالىقارالىق كورمەلەر بيۋروسىنىڭ باس حاتشىسى ۆيسەنتە لوسسەرتالەسپەن كەزدەستى.
كەزدەسۋ بارىسىندا تاراپتار بىرنەشە جىلدان كەيىن الەم نازارىن استاناعا اۋدارتاتىن ەكسپو-2017 كورمەسىنە دايىندىق ماسەلەسىن جان-جاقتى تالقىلادى. ماسەلەن, قازاقستاننىڭ سىرتقى ساياسات ۆەدومستۆوسىنىڭ باسشىسى حالىقارالىق كورمەلەر بيۋروسىنىڭ باس حاتشىسىنا ەكسپو-2017 كورمەسىن جوعارى دەڭگەيدە وتكىزۋ ماقساتىندا ارنايى قۇرىلعان مەملەكەتتىك كوميسسيانىڭ اتقارىپ جاتقان جۇمىسى جونىندە اقپارات بەرە كەلىپ, قازاقستاندىق تاراپتىڭ بارلىق قاجەتتى دەگەن ءىس-شارالاردىڭ باسىن قايىراتىنىنا سەندىردى.
ەرلان ىدىرىسوۆ بۇل كورمەنىڭ قازاقستاننىڭ «جاسىل» ەكونوميكاعا وتۋىنە ايرىقشا سەرپىن بەرەرلىكتەي بىرەگەي جالپىۇلتتىق جوبا ەكەنىن, سوندىقتان, ونىڭ وسى جاڭارتىلعان ەنەرگەتيكا سالاسىنىڭ يننوۆاتسيالىق دامۋىنا تاپتىرمايتىن الاڭعا اينالۋى قاجەتتىگىن, اتالعان كورمەنىڭ ەلىمىزدىڭ ءوز ەگەمەندىگىنىڭ 25 جىلدىق مەرەيتويىن اتاپ وتكەننەن كەيىن بولاتىنى دا سيمۆولدىق مانگە يە ەكەنىن اتاپ ءوتتى.
ەكىجاقتى كەزدەسۋ بارىسىندا ۆيسەنتە لوسسەرتالەس ەكسپو جوباسىنىڭ بەلسەندى قاتىسۋشىسىنا اينالعانى ءۇشىن سىرتقى ىستەر مينيسترلىگىنە العىسىن ءبىلدىردى. ول سونداي-اق, قازاقستاننىڭ حالىقارالىق كورمەنى وتكىزۋگە دايىندىعى ءتيىستى دەڭگەيدە وتكىزىلىپ جاتقانىنا توقتالدى. «قازىرگى تاڭدا ەكسپو-2017 كورمەسىنە دايىندىق ءىس-شارالارى حالىقارالىق كورمەلەر بيۋروسىنىڭ بارلىق تالاپ-نورمالارىنا سايكەس دەر كەزىندە ورىندالۋدا», دەدى ول.
كەزدەسۋ سوڭىندا تاراپتار استانادا ەكسپو-2017 كورمەسىن جوعارى دەڭگەيدە وتكىزۋ باعىتىنداعى ەكىجاقتى ىنتىماقتاستىقتى الداعى ۋاقىتتا دا جالعاستىرا بەرەتىندەرىنە مۇددەلىلىك تانىتتى. استاناعا جۇمىس ساپارى كەزىندە ۆ.لوسسەرتالەس, سونداي-اق, ەل باسشىلىعىمەن جانە «استانا ەكسپو-2017» ۇلتتىق كومپانياسى» اق وكىلدەرىمەن دە كەزدەسپەك.
ءلايلا ەدىلقىزى,
«ەگەمەن قازاقستان».