قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ پرەزيدەنت قاسىم-جومارت توقاەۆقا جانە قازاقستان حالقىنا الماتى قالاسى ماڭىندا بولعان ۇشاق اپاتىنا بايلانىستى كوڭىل ايتتى. بۇل تۋرالى قىرعىز رەسپۋبليكاسى پرەزيدەنتىنىڭ ءباسپاسوز قىزمەتى حابارلادى.
«الماتى-نۇر-سۇلتان اۋە رەيسى اپاتى سالدارىنان قازا تاپقان ادامدار تۋرالى حاباردى زور كۇيزەلىسپەن قابىلدادىق. قىرعىز حالقى مەن ءوز اتىمنان قازا بولعانداردىڭ وتباسىلارىنا, تۋعان-تۋىستارىنا قايعىرىپ كوڭىل ايتامىن. اپاتتان زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىز» دەلىنگەن كوڭىل ايتۋ جەدەلحاتىندا.
ايتا كەتەيىك, رەسەي فەدەراتسياسىنىڭ پرەزيدەنتى پرەزيدەنت قاسىم-جومارت توقاەۆقا الماتى ماڭىندا بولعان اۋە اپاتىنا بايلانىستى كوڭىل ايتۋ جەدەلحاتىن جولداعانىن حابارلاعان بولاتىنبىز.