نۇر-سۇلتان قالاسىنىڭ اكىمدىگىندە جاستار جىلىنىڭ قورىتىندىسى جاريالانىپ, الداعى ۆولونتەرلەر جىلىندا اتقارىلاتىن ءىس-شارالار جوسپارى تالقىلاندى. جيىن بارىسىندا قازاقستان مەديتسينا جاستارى رەسپۋبليكالىق جاستار ۇيىمىنىڭ جەتەكشىسى ابىلاي ءابدىراش الداعى جىلعا دايىندىق بارىسىن مالىمدەدى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
قازاقستان مەديتسينا جاستارى ۇيىمىنىڭ جەتەكشىسى ءسوز اراسىندا كەلەر جىلعا ۇسىنىلىپ وتىرعان جۇمىس جوبالارىن تانىستىرىپ ءوتتى.
«الداعى جىلعا «سالاۋاتتى نۇر-سۇلتان» دەپ اتالاتىن جوبامىزدى ۇسىنىپ وتىرمىز. جوبانىڭ اتاۋى وزگەرۋى مۇمكىن. ونىڭ باستى ماقساتى – قالاداعى بارشا مەديتسينالىق مەكەمەلەرگە ۆولونتەرلىك كومەك كورسەتۋ جانە قالانىڭ بارشا تۇرعىندارىنىڭ, اسىرەسە جاستاردىڭ مەديتسينالىق ساۋاتىن ارتتىرۋ. قازىرگى ۋاقىتتاعى تۇيتكىلدى ماسەلەلەردىڭ ءبىرى – قالا تۇرعىندارىنىڭ مەديتسينالىق ءبىلىمىنىڭ ازدىعى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرىنە سۇيەنەر بولساق, 10 ادامنىڭ 9-ى ءتۇرلى مەديتسينالىق تەرميندەردى تۇسىنبەيدى. سونىڭ سالدارىنان الەۋمەتتىك جەلىلەردە مەديتسيناعا قاتىستى تارالعان اقپاراتتاردىڭ راس-وتىرىگىن ايىرا المايدى» دەدى ۇيىم جەتەكشىسى.
ابىلاي ءابدىراش ءوز سوزىندە جۇرتشىلىقتىڭ مەديتسينالىق ءبىلىمىنىڭ ازدىعىن بىلايشا ءتۇسىندىرىپ ءوتتى.
«ماسەلەن, تاڭەرتەڭ ەگدە جاستاعى ادام ويانعاننان كەيىن كەۋدە تۇسىنىڭ اۋىرىپ تۇرعانىن سەزىنەر بولسا, سالدەن كەيىن قويىپ كەتەتىن شىعار دەپ سوڭىنا دەيىن شىداپ باعادى. بىراق كەشكە قاراي جەدەل جاردەم كولىگىمەن اۋرۋحاناعا اتتانىپ جاتادى. سول سياقتى ءىشى اۋىرىپ جۇرگەن ادام اۋىرعانىن ۋاقىتشا باساتىن ءدارى ءىشىپ جۇرەدى. ارادا ۋاقىت وتكەندە ول ادامنىڭ ىسىك اۋرۋىنىڭ ءۇشىنشى نەمەسە ءتورتىنشى كەزەڭىنە قالاي شالدىققانىن بىلمەي قالادى. بۇل مەديتسينالىق ءبىلىمنىڭ جەتكىلىكسىزدىگى. ال ءبىز وسى ولقىلىقتىڭ ورنىن تولتىرعىمىز كەلەدى» دەپ ءتۇسىندىردى ول.
ونىڭ ايتۋىنشا, كەلەر جىلعا قويىلىپ وتىرعان جوسپاردىڭ ءبىرى – جۇرتشىلىقتى العاشقى مەديتسينالىق كومەككە ۇيرەتۋ. وسى ماقساتتا قازاقستان مەديتسينا جاستارى ۇيىمى ەلورداداعى ءبىلىم نىساندارىنا بارىپ, وقۋشىلار مەن ستۋدەنتتەرگە العاشقى كومەك كورسەتۋ جولدارىن ۇيرەتپەك.
«قازىر استانامىزدا 200-گە جۋىق مەديتسينالىق ۆولونتەر بار. ولاردى ءبىز جەدەل جاردەم كولىكتەرىنە كەزەكشى رەتىندە قوسۋدى جوسپارلاپ وتىرمىز. ماقساتىمىزدىڭ تاعى ءبىرى – ءمامس جۇيەسىنىڭ ارتىقشىلىقتارىن ەلوردالىقتارعا دۇرىس ناسيحاتتاۋ. سونىمەن قاتار مەديتسينالىق ۆولونتەرلەردىڭ سانىن ارتتىرۋ جوسپارىمىزدا تۇر» دەپ العا قويعان ويلارىمەن ءبولىستى.
ايتا كەتەيىك, مەملەكەت باسشىسى كەلەر جىلى ستۋدەنت-ۆولونتەرلەردىڭ شاكىرتاقىسىن 30 % كوبەيتۋدى تاپسىرعان بولاتىن.