پرەزيدەنت ق.توقاەۆ ءوزىنىڭ قازاقستان حالقىنا جولداۋىندا ەلدىڭ قوعامدىق-ساياسي ومىرىنە «حالىق ۇنىنە قۇلاق اساتىن مەملەكەت» تۇجىرىمداماسىن ەنگىزدى. مەملەكەت باسشىسىنىڭ قاتىسۋىمەن وتكەن ۇلتتىق قوعامدىق سەنىم كەڭەسىنىڭ (ۇقسك) ەكىنشى وتىرىسى – وسى تۇجىرىمدامالىق ۇعىمنىڭ مازمۇندىق تولتىرىلۋىنىڭ كورسەتكىشى. بۇل سوزىمىزگە ۇقسك وتىرىسىندا جاريالانعان ماڭىزدى ساياسي شەشىمدەر دالەل بولا الادى. بۇل جۇمىس توپتارىنىڭ, كونسۋلتاتسيالار, كەڭەستەر, پرەزيدەنتتىڭ ۇلتتىق كەڭەستىڭ جەكەلەگەن مۇشەلەرىمەن جەكە كەزدەسۋلەرىنىڭ ناتيجەسى بولدى. ءبىرىنشى رەفورمالار پاكەتىندە الەۋمەتتىك-ساياسي مودەرنيزاتسيانىڭ ەڭ وزەكتى, ماڭىزدى ماسەلەلەرى قوزعالدى.
بىرىنشىدەن, بۇل – ميتينگىلەردى ۇيىمداستىرۋدىڭ رۇقسات ەتۋ پرينتسيپىنەن حابارلاۋ پرينتسيپىنە كوشۋ. بەيبىت جينالىستار مەن شەرۋلەردى وتكىزۋ تارتىبىندەگى وزگەرتۋلەر – وتە ماڭىزدى قادام. بۇكىل الەمدە قازىر نارازىلىق بەلسەندىلىگىنىڭ ءوسۋ ءۇردىسى بايقالادى. ميتينگىلەر مەن نارازىلىق اكتسيالارى قازىرگى زامانعى نورماعا اينالدى. بۇل, پرەزيدەنت ايتقانداي, قازاقستاندىق قوعامنىڭ ساناسىندا ميتينگ مادەنيەتىن قالىپتاستىرۋ ۋاقىتى كەلگەنىن بىلدىرەدى. پرەزيدەنت جولداۋىن ىسكە اسىرۋ جونىندەگى جوسپاردى ورىنداۋ شەڭبەرىندە «بەيبىت جينالىستار تۋرالى» زاڭ جوباسى ازىرلەندى, وندا بەيبىت جينالىستار مەن ولاردى وتكىزۋ ءۇشىن ارنايى ورىنداردىڭ بارلىق نىساندارى بەلگىلەنەدى. بۇدان باسقا, ۇيىمداستىرۋشىنىڭ, قاتىسۋشىنىڭ, بايقاۋشىنىڭ مارتەبەلەرى, سونداي-اق ولاردىڭ قۇقىقتارى مەن مىندەتتەرى ناقتى انىقتالاتىن بولادى.
ەكىنشىدەن, بۇل – ساياسي پارتيالار مەن پارلامەنتتىك وپپوزيتسياعا قاتىستى وزگەرىستەر. ۇلتتىق كەڭەس وتىرىسى اياسىندا ساياسي پارتيالار ءۇشىن تىركەۋ مەجەسىن 2 ەسەگە, 20 مىڭ ادامعا دەيىن تومەندەتۋ تۋرالى مالىمدەلدى جانە پارلامەنتتىك وپپوزيتسيا تۋرالى زاڭنىڭ ازىرلەنۋىنە قولداۋ كورسەتىلدى, وعان سايكەس ساياسي ازشىلىق كوميتەتتەردى باسقارا الادى. بۇل ۋاقىت پەن جاڭا ساياسي جاعدايلارعا جاۋاپ بولدى.
ۇشىنشىدەن, ۇلتتىق كەڭەستىڭ كونسۋلتاتيۆتىك-كەڭەسشى ورگان رەتىندەگى قىزمەتىنىڭ ماڭىزدى قورىتىندىسى – جالا جاپقانى ءۇشىن قىلمىستىق جازا تۋرالى قر قك-ءنىڭ 130-بابىن قىلمىستىق سيپاتتان ارىلتۋ بويىنشا جۇمىس بولدى, ول ەندى اكىمشىلىك قۇقىق بۇزۋشىلىق تۋرالى كودەكسكە كوشىرىلەدى. كوبىنەسە بۇل باپ بويىنشا جۋرناليستەر جازالاۋعا ۇشىرادى, سەبەبى بۇل باپتى قىلمىستىق سيپاتتان ارىلتۋ جالپى باق جۇمىسىنا وڭ اسەر ەتەدى دەپ كۇتىلۋدە. قر قك 174-بابىن ىزگىلەندىرۋ ءادىل سوت تورەلىگىن جۇزەگە اسىرۋعا ىقپال ەتەتىن ناقتى زاڭدىق انىقتاما بەرۋگە مۇمكىندىك بەرەدى.
مەملەكەت, سونداي-اق اشىق جانە ەسەپ بەرۋى ءتيىس. بۇل, ەڭ الدىمەن, بيۋدجەت قاراجاتىن ۇتىمدى جۇمساۋعا قاتىستى. وسىعان بايلانىستى, 2020 جىلدىڭ قاڭتارىنان باستاپ تەكسەرىلەتىن مەملەكەتتىك ورگاندار مەن ۇيىمدار بويىنشا اۋديتورلىق ءىس-شارالاردى جاريالاۋ تۋرالى شەشىم قابىلداندى. بۇل جۇمىستى جوعارى قارجىلىق قاداعالاۋ ورگانى – ەسەپ كوميتەتى جۇرگىزەتىن بولادى.
كوپتەگەن باستاما مەن شەشىم الەۋمەتتىك سالاعا جانە ازاماتتاردىڭ بەلگىلى ءبىر توپتارىن قولداۋعا قاتىستى – شەتەلدىك جۇمىس كۇشىن تارتۋعا ارنالعان كۆوتانى قىسقارتۋ, شەتەلدىك جۇمىس بەرۋشىلەر تاراپىنان قازاقستاندىق جۇمىسشىلاردى كەمسىتۋگە جول بەرمەۋ. كوپ بالالى وتباسىلارعا اتاۋلى الەۋمەتتىك كومەكتى ادىلەتتى قامتاماسىز ەتۋ ەرەكشە ماڭىزعا يە. كوپ بالالى وتباسىلارعا ارنالعان جاڭا مەملەكەتتىك جاردەماقىنىڭ مولشەرى سارالانعان مولشەردە بەلگىلەنەدى جانە ول 42,5 مىڭنان 74 مىڭ تەڭگەگە دەيىن بولادى. حالىقتىڭ الەۋمەتتىك وسال توپتارىنىڭ بالالارى دا كەپىلدى الەۋمەتتىك كومەك پاكەتىمەن – مەكتەپتەردە ىستىق تاماقپەن, مەكتەپ فورماسىمەن, كولىكتە تەگىن جول جۇرۋمەن جانە ت. ب. قامتاماسىز ەتىلەتىن بولادى.
وسىلايشا, ۇلتتىق قوعامدىق سەنىم كەڭەسىنىڭ ەكىنشى وتىرىسى قوعام مەن مەملەكەتتىڭ سۇحباتىندا ناقتى شارالار مەن قابىلداناتىن شەشىمدەردە كورنەكى ناتيجەلەرگە قول جەتكىزۋگە بولاتىنىن كورسەتتى.
ءمادينا نۇرعاليەۆا,
پرەزيدەنت جانىنداعى قسزي ديرەكتورىنىڭ كەڭەسشىسى