ەندى قازاقستاندىقتار ازاماتتىق حال اكتىلەرىنىڭ بارلىعىن تۇرعىلىقتى تىركەۋ ورنىنا قاراماستان, كەز كەلگەن جەردەن الا الادى. بۇل تۋرالى زاڭعا ەنگىزىلگەن تۇزەتۋلەر پارلامەنت سەناتىندا قابىلدانعان زاڭ جوباسىندا قاراستىرىلدى.
جاڭاشىلدىق بالانىڭ تۋىنا, نەكەنى تىركەۋ مەن اجىراسۋعا, اتى-ءجونى مەن تەگىن وزگەرتۋگە بايلانىستى قۇجاتتاردى, سونداي-اق قايتىس بولۋ قۇجاتتارىن تىركەۋ سياقتى قىزمەتتەردى قامتيدى. ەسكە سالايىق, بۇرىن ازاماتتار اتالعان مەملەكەتتىك قىزمەتتەردى الۋ ءۇشىن تۇرعىلىقتى تىركەۋ ورنى نەمەسە تىركەۋ جازباسىنىڭ ورنالاسقان جەرى بويىنشا مەملەكەتتىك كورپوراتسيانىڭ فرونت-وفيستەرىنە نەمەسە احات بولىمىنە حابارلاساتىن. ەندى ازاماتتىق حال اكتىلەرىنە قاتىستى 5 ءتۇرلى قىزمەتتى كەز كەلگەن حقو-دان نەمەسە احات-تان الۋعا بولادى. بۇل كەرەكتى قۇجاتتاردى از ۋاقىت ىشىندە الۋعا جانە سىبايلاس جەمقورلىق دەرەكتەرىن بولدىرماۋعا مۇمكىندىك بەرەدى.
بۇرىن قۇجاتتاردى راسىمدەپ الۋ ءۇشىن ءوتىنىش بەرۋشى تىركەۋ ورنى بويىنشا حالىققا قىزمەت كورسەتۋ ورتالىقتارىنا نەمەسە تىركەۋشى ورگانعا حابارلاسىپ, 5-تەن 30 كۇنگە دەيىن جاۋاپ كۇتەتىن, بۇل قىزمەت الۋشىلار ءۇشىن قولايسىزدىق پەن قوسىمشا قاعازباستىلىقتى تۋدىراتىن.