سەنات وتىرىسىندا زاڭناماعا جەر قويناۋىن پايدالانۋ, گاز جانە گازبەن جابدىقتاۋ ماسەلەلەرى جونىندەگى تۇزەتۋلەر ەكىنشى وقىلىمدا قارالدى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
بايانداما جاساعان سەناتور ماناپ كوبەنوۆ زاڭ جوباسى ەكونوميكاعا ينۆەستيتسيا تارتۋعا جانە قوسىمشا قۇنى جوعارى ءارى ايتارلىقتاي مۋلتيپليكاتيۆتى اسەرى بار مۇناي-حيميا ءوندىرىسىن دامىتۋعا ارنالعانىن اتاپ ءوتتى. بۇل رەتتە گازبەن ىشكى نارىقتى ۇزدىكسىز جابدىقتاۋدى, سونداي-اق گاز باعاسىنىڭ تۇراقتى دەڭگەيىن قامتاماسىز ەتۋ ءۇشىن جاڭا ستراتەگيالىق ماڭىزدى ينۆەستيتسيالىق جوبالارعا تاۋارلىق گازدىڭ شەكتى باعاسى زاڭ جوباسى اياسىندا گاز جەتكىزۋدىڭ وزىندىك قۇنى مەن گاز جانە گازبەن جابدىقتاۋ سالاسىنداعى ۇلتتىق وپەراتوردىڭ («قازترانسگاز»اق) ەڭ تومەنگى تيىمدىلىك نورماسىنان قالىپتاساتىن بولادى.
ەلەكتر ەنەرگياسىن وندىرۋگە وتىن رەتىندە تاۋارلىق گازدى پايدالاناتىن ەلەكتر ستانتسيالارىن سالۋعا ينۆەستيتسيالار تارتۋ ءۇشىن گازعا ۇزاق مەرزىمدى كەزەڭگە (ون جىلعا دەيىن) قولايلى باعا بەلگىلەۋ ۇسىنىلادى.
ودان باسقا, كومىرسۋتەگىلەر بويىنشا جەر قويناۋىن پايدالانۋ قۇقىعىن بەرۋگە اۋكتسيون وتكىزۋ تەتىگىنە وزگەرىستەر ەنگىزىلەدى. زاڭ جوباسىن قابىلداعاننان كەيىن وپەراتور اۋكتسيونداردى ەلەكتروندىق سيپاتتا جۇرگىزەدى. اۋكتسيون جەڭىمپازىن تانۋ جونىندەگى فۋنكتسيالار كوميسسيادا ساقتالادى. سونداي-اق ەلەكتروندىق اۋكتسيوندار وپەراتورىنىڭ قىزمەتى رەتتەلەدى.
سەناتورلار جەر قويناۋىن پايدالانۋ, گاز جانە گازبەن جابدىقتاۋ ماسەلەلەرى بويىنشا زاڭناماعا تۇزەتۋلەردى ەكىنشى وقىلىمدا قاراپ, قابىلدادى.
سەناتورلار سونداي-اق تەمىر جول كولىگى ماسەلەلەرى جونىندەگى زاڭناماعا تۇزەتۋلەردى دە قابىلدادى.
سەناتور ەرىك سۇلتانوۆ ءوز بايانداماسىندا زاڭ جوباسىمەن نورماتيۆتىك قۇقىقتىق اكتىلەردى ازىرلەۋ جانە بەكىتۋ جونىندەگى تاريف بەلگىلەۋ اشىقتىعىن جەتىلدىرۋ جانە ارتتىرۋ, كىرمە جولداردى سۋبسيديالاۋ جانە قىزمەتتەرىن پايدالانۋشىلار قۇقىقتارىن قورعاۋ بويىنشا مەملەكەتتىك ورگانداردىڭ وكىلەتتىكتەرى تولىقتىرىلاتىنىن اتاپ ءوتتى.
قۇجاتتا جول ءجۇرۋ قۇجاتتارىن قايتا ساتۋ جانە تەمىرجول كولىگىندەگى قوزعالىس قاۋىپسىزدىگىنىڭ قامتاماسىز ەتىلمەگەنى ءۇشىن اكىمشىلىك جاۋاپكەرشىلىكتى كۇشەيتۋ كوزدەلگەن.