كوكشەتاۋدا «Nur Otan» پارتياسىنىڭ «قازاقستان 2021: بىرلىك. تۇراقتىلىق. جاسامپازدىق» اتتى 2016-2021 جىلدارعا ارنالعان سايلاۋالدى باعدارلاماسىنا سايكەس «جوعارى تەحنولوگيالاردى دامىتۋ» باعىتىندا وڭىرلىك كوميسسياسىنىڭ كەزەكتى وتىرىسى ءوتتى.
«جوعارى تەحنولوگيالاردى دامىتۋ» باعىتى بويىنشا جاۋاپتىلار جىل باسىنان بەرى ىسكە اسقان جۇمىستاردىڭ ەسەبىن تىزبەكتەپ, العا قويعان جوسپارلارىمەن تانىستىردى. ەلباسى نۇرسۇلتان نازارباەۆتىڭ ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىندا ايتىلعان يندۋستريالاندىرۋدى جاڭا تەحنولوگيالاردى ەنگىزۋدىڭ كوشباسشىسىنا اينالدىرۋ تۋرالى مىندەت اقمولا وبلىسىندا دا ءساتتى جۇزەگە اسىرىلۋدا. جيىنعا الەمدەگى التىن وندىرەتىن ەڭ ءىرى 20 كاسىپورىننىڭ قاتارىنا كىرەتىن «التىنتاۋ كوكشەتاۋ» سەرىكتەستىگى مەن ستەپنوگورسك قالاسىندا ورنالاسقان «قازاقالتىن» تاۋ-كەن مەتاللۋرگيالىق كونتسەرنىنىڭ وكىلدەرى قاتىسىپ, ەكىنشى تاراپتان تۋىنداعان بارلىق سۇراقتارعا جاۋاپ بەرىپ, ۇسىنىستارعا قۇلاق استى.
– ستەپنوگورسك قالاسىندا ورنالاسقان «قازاقالتىن» تاۋ-كەن مەتاللۋرگيالىق كونتسەرننىڭ اقمولا وبلىسى بويىنشا 4 نۇكتەسى بار. ول اقسۋ, بەستوبە, جولىمبەت كەنتتەرى مەن ستەپنوگورسك قالاسىندا ورنالاسقان. «قازاقالتىن» بۇگىنگى تاڭدا 5 كاسىپورىنمەن ۇزاق مەرزىمدى كەلىسىم-شارت بويىنشا جۇمىس ىستەيدى. اتالمىش مەكەمەلەرمەن تىعىز قارىم-قاتىناستامىز,–دەيدى «قازاقالتىن» اق جەر قويناۋىن پايدالانۋ ءبولىمىنىڭ جەتەكشىسى باۋىرجان سارمانوۆ.
«قازاقالتىن» تاۋ-كەن مەتاللۋرگيالىق كونتسەرنى سەرىكتەستىگى جىل سايىن الەۋمەتتىك سالاعا 424 ميلليون تەڭگە بولەدى. بۇل جاڭا جاتاقحانالاردىڭ قۇرىلىسى, تۇرعىن ءۇي جانە تۇرمىستىق كەشەندەردىڭ كۇردەلى جوندەۋى, سونداي-اق ءوڭىردىڭ ينفراقۇرىلىمىنا, اتاپ ايتساق, جولداردى, مەكتەپتەردى, بالاباقشالاردى جوندەۋ باعىتىنا قوماقتى قارجى جۇمسايدى. «Nur Otanنىڭ» وڭىرلىك پارتيالىق كۋراتورى جيىنعا قاتىسقان جوعارى وقۋ ورىندارىنىڭ وكىلدەرى مەن ءىرى كاسىپورىنداردىڭ باسشىلارىنا ستۋدەنتتەردىڭ وندىرىستىك تاجىريبەدەن ءوتۋىن قامتاماسىز ەتۋ قاجەتتىگىن ايتتى. قوس تاراپ بىرلەسە قىزمەت اتقارۋعا قاتىستى ۇسىنىستارىن ورتاعا سالدى.
– ءبىزدىڭ ۋنيۆەرسيتەتتىڭ لابوراتورياسىندا بىلىكتى مامانداردىڭ كومەگىمەن سىزدەردىڭ جۇمىستارىڭىزدى جانداندىراتىن ءتۇرلى قۇرىلعىلاردى ويلاپ تابۋعا بولادى. سول سەبەپتى بىرلەسىپ جۇمىس جاسايىق. «التىنتاۋ كوكشەتاۋ» مەن «قازاقالتىن» تاۋ-كەن مەتاللۋرگيالىق كونتسەرنىنە ستۋدەنتتەرىمىزدى ءىس-تاجىريبەگە جىبەرۋگە دايىنبىز, دەيدى ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ پرورەكتورى ايگۇل جاقىپوۆا.
جوعارى تەحنولوگيالاردى دامىتۋ – پارتيانىڭ باسىم باعىتتارىنىڭ ءبىرى بولىپ وتىر. بيۋدجەتتىك باعدارلامالاردىڭ ۋاقىتىلى ورىندالۋىن باقىلاۋ, ولارعا قوعامدىق مونيتورينگ جاساۋ – مەملەكەتتىك باعدارلامالاردى ءساتتى ىسكە اسىرۋدىڭ نەگىزى بولىپ قالا بەرمەك. بۇگىنگى تاڭدا وڭىردە شوعىرلانعان سەرىكتەستىكتەردىڭ نەگىزگى ماقساتى ىشكى سۇرانىستى قاناعاتتاندىرۋ عانا ەمەس, جوعارى ساپالى ءونىمدى ەكسپورتقا شىعارۋ بولىپ تابىلادى.