پارلامەنت سەناتىنىڭ وتىرىسىندا قازاقستان رەسپۋبليكاسى مەن ەۋروپا كەڭەسى اراسىنداعى سىبايلاس جەمقورلىققا قارسى مەملەكەتتەر توبى وكىلدەرىنىڭ جانە باعالاۋشى توپتار مۇشەلەرىنىڭ (گرەكو) ارتىقشىلىقتارى مەن يممۋنيتەتتەرىنە قاتىستى كەلىسىم راتيفيكاتسيالاندى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
كەلىسىمنىڭ ماقساتى گرەكو مەن باعالاۋ توپتارىنىڭ وكىلدەرىنە ازاماتتىق, اكىمشىلىك جانە قىلمىستىق جاۋاپكەرشىلىكتەن, قىزمەتتىك مىندەتتەرىن ورىنداۋعا بايلانىستى ولاردىڭ ءبىزدىڭ ەلىمىزگە كەلۋ كەزىندە جەكە ۇستاپ تۇرۋ مەن قاماۋلاردان يممۋنيتەتتەر ۇسىنۋ بولىپ تابىلادى.
سەناتور نۇرجان نۇرسيپاتوۆ كەلىسىمدى راتيفيكاتسيالاۋ سىبايلاس جەمقورلىققا قارسى زاڭنامانى جەتىلدىرۋگە, سونداي-اق الەمدىك رەيتينگتەردە قازاقستاننىڭ سىبايلاس جەمقورلىق كورسەتكىشتەرىنىڭ يندەكسىن تومەندەتۋگە ىقپال ەتەتىنىن اتاپ ءوتتى.
قازاقستان مەن كيپر ۇكىمەتتەرى اراسىنداعى تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كونۆەنتسيا مەن وعان حاتتاما راتيفيكاتسيالاندى.
ۋاعدالاسۋشى مەملەكەتتەردىڭ ارقايسىسى سالىق تولەۋشىگە ۋاعدالاسۋشى مەملەكەتتەردىڭ تەك بىرىندە ءبىر رەت قانا سالىق تولەۋ مۇمكىندىگىن قامتاماسىز ەتەدى. باسقا مەملەكەت وعان تولەنگەن سالىق سوماسىنا ەسەپ بەرەدى نەمەسە سالىق سالىناتىن جيىنتىق تابىستان ەكىنشى مەملەكەتتە سالىق سالىنعان بولىگىن الىپ تاستايدى.
سەناتور ولگا پەرەپەچينا سالىق كونۆەنتسيالارىن نەمەسە كەلىسىمدەردى قابىلداۋ ترانسشەكارالىق ساۋدانى جەڭىلدەتىپ, ينۆەستيتسيالار تارتۋدى قامتاماسىز ەتەتىنىن اتاپ ءوتتى. سوڭعى 10 جىلدا سالىقتىق كونۆەنتسيالار قولدانىلاتىن ەلدەردەن ءبىزدىڭ ەلىمىزگە كەلگەن شەتەلدىك تىكەلەي ينۆەستيتسيالار اعىنى 391 ملرد اقش دوللارىن قۇرادى نەمەسە بۇل شەتەلدىك ينۆەستيتسيالاردىڭ بارلىق كولەمىنىڭ شامامەن 90 پايىزى بولدى.
«قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ قابىلداندى.
قۇجاتتىڭ ماقساتى احقو-نى جىلدام قالىپتاستىرۋ مەن ەلىمىزدىڭ نەگىزگى قارجى تۇعىرناماسى رەتىندە دامۋىن قامتاماسىز ەتۋ جانە ينۆەستيتسيا تارتۋ ءۇشىن ونىڭ يۋريسديكتسياسىن پايدالانۋ بولىپ تابىلادى.
زاڭ جوباسى «ينۆەستيتسيالىق رەزيدەنت» ۇعىمىن ەنگىزۋدى كوزدەيدى, سونداي-اق ينۆەستيتسيالىق رەزيدەنتتەرگە بەرىلەتىن تالاپتار مەن جەڭىلدىكتەردى رەتتەيدى.
سەناتور باقتىباي شەلپەكوۆ بيۋدجەتتەن احقو-نى قارجىلاندىرۋعا باعىتتالعان ماقساتتى اۋدارىمداردى قوسىمشا قۇن سالىعىنان بوساتۋدا ۇسىنىلىپ وتىرعان ەرەكشەلىكتەردى ءتۇسىندىردى. سونداي-اق رەزيدەنت ەمەستەردىڭ احقو-عا كورسەتىلگەن قىزمەتتەرى/جۇمىستارى مەن احقو-عا قاتىسۋشىلاردىڭ قىزمەتتەرىن قوسىمشا قۇن سالىعىن سالۋعا جاتاتىن اينالىم دەپ ەسەپتەمەۋ ۇسىنىلادى.
زاڭ جوباسىنا قولداۋ ءبىلدىرىپ ءسوز العان سەناتور ەربولات مۇقاەۆ قازاقستان رەسپۋبليكاسىنا كەلۋ ۆيزاسىن الۋ قۇقىعىن قامتاماسىز ەتۋ, احقو اۋماعىندا ارەكەت ەتەتىن اعىلشىن قۇقىعىمەن قامتاماسىز ەتىلگەن ينۆەستيتسيالاردىڭ ساقتالۋ كەپىلدىكتەرىمەن قوسا سالىق پرەفەرەنتسيالارىن بەرۋ شەتەلدىك ينۆەستورلاردى تارتۋعا ىقپال ەتەتىنىن اتاپ ءوتتى.
ودان باسقا, «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا جالپىعا بىردەي دەكلاراتسيالاۋدى ەنگىزۋ مەرزىمدەرىن 2020 جىلدان 2021 جىلعا اۋىستىرۋ بولىگىنە وزگەرىستەر ەنگىزىلەدى.