بەلگىلى بالالار اقىنى, ارداگەر جۋرناليست ءالي ىسقاباي بيىل سەكسەن جاستىڭ سەڭگىرىنە شىقتى.
جەتىسۋدىڭ ءبىر وزەنى – ىلەنىڭ بالقاش كولىنە قۇياتىن تۇسىندا كىندىك قانى تامعان ءالي اقساقال العاشقى ولەڭىن بالا جاسىندا جازىپتى. تابيعات, انا مەيىرىمى, كوز سۇيىندىرەتىن كوركەم كورىنىستەردىڭ بارلىعى بالا اقىننىڭ قيالىن ۇشتاپ, شىعارماشىلىعىنا قانات بىتىرگەن. بالعىن شاقتان باستالعان جىر اعىنى ءالي ىسقابايدىڭ تۇتاس عۇمىرىنا ارقاۋ بولىپ, بالالارعا ارنالعان تۋىندىلار جازۋعا جەتەلەپ كەلەدى.
قازىر اقىننىڭ قالامىنان تۋعان «ايدوستىڭ ارعىماعى», «مەنىڭ ءىنىم», «سولدات اعاعا حات», «بەسىك جىرى», «ەڭبەكقور قۇمىرسقا» جىر جيناقتارى قازاق بالالار ادەبيەتىنە قوسىلعان وراسان ولجا بولىپ سانالادى. مەكتەپ وقۋلىقتارىنىڭ دەرلىگىندە اۆتوردىڭ بالالارعا ارنالعان ولەڭدەرى كىرگەن. اقساقال ەل اۋزىنداعى ماقال-ماتەلدەردى, جۇمباقتاردى جيناپ, دايەكتى ءسوزدىڭ ىزىمەن ءوزى دە ناقىل جىردىڭ مارجانىن تەرىپ كەلەدى. بالا تالعامىنا تاتيتىن «777 جۇمباق», ء«تىل مەن جىر» اتتى جيناقتارى ەل وقىرماندارىنا ەتەنە تانىس.
اعا ارىپتەسىمىز – «ەگەمەن قازاقستان» گازەتىنىڭ ارداگەرى. ەڭبەك جولىن ءوزى تۋىپ-وسكەن قۇيعان اۋىلىندا قاتارداعى جۇمىسشى بولىپ باستاعان ول 1958 جىلى بالقاش اۋداندىق گازەتىنە ادەبي قىزمەتكەرلىككە قابىلدانعان ەكەن. بۇل ءالي اپەك ۇلىنىڭ جۋرناليستيكاداعى العاشقى قادامى ەدى. ارتىنشا, جۋرناليستىك ءبىلىم الىپ جۇرگەن تۇستا ورتالىق باسپاسوزگە ءجيى جاريالانا باستادى. كوبىنە جازعان-سىزعاندارىن سول كەزدەگى «سوتسياليستىك قازاقستان» گازەتىنە اپاراتىن. 1973 جىلى ماڭعىستاۋ وبلىسى قۇرىلدى دا, باس گازەت رەداكتسياسى جاڭا ايماقتاعى مەنشىكتى ءتىلشى ىزدەپ جاتتى. رەداكتسيانىڭ تاڭداۋى قالامى قارىمدى ءالي ىسقابايعا تۇسكەن. ءتىلشى كۋالىگىن قولىنا العان كۇنى-اق قازىرگى اقتاۋ, بۇرىنعى فورت-شەۆچەنكو قالاسىنا تارتتى.
– جاڭا وبلىستا جۇمىس قىزىپ جاتتى. مۇناي ءوندىرۋ ءىسى كۇن ساناپ ارتىپ كەلەدى. قۇرىلىس تا قىزىپ بەردى. ول كەزدە «سوتسياليستىك قازاقستاننىڭ» مەنشىكتى ءتىلشىسى پارتيا مەن سوۆەت ورگانىنىڭ ەڭ بەدەلدى وكىلىنەن دە جوعارى تۇراتىن. بىردەن باسپانا بەردى, قىزمەتتىك كولىككە وتىرعىزدى. ەڭبەك كورىگى قىزعان ولكەدەن كۇن قۇرعاتپاي اقپارات بەرىپ تۇردىم. اۋىز سۋ, جول ماسەلەسىنە قاتىستى تۇرعىندار ءجيى شاعىمداناتىن ەدى. مەيلىنشە, رەداكتسيا باسشىلىعىنىڭ تاپسىرماسىمەن قازاقى اۋدانداردىڭ پروبلەماسىن ءجيى جازىپ وتىردىم. ەكى جىلعا جۋىق قىزمەتىمدە جەرگىلىكتى تۇرعىنداردان تەك العىس ەستىدىم. كەيىن تالدىقورعان وبلىستىق «وكتيابر تۋى» گازەتىنە باس رەداكتوردىڭ ورىنباسارى بولىپ قىزمەتكە شاقىرىلدىم دا, ءۇش قيان جۇرتىمەن قيماي قوشتاسىپ, ەلگە ورالدىم, – دەيدى ءالي اقساقال.
سەكسەن جاسقا تولعان اقىن, جۋرناليست ءالى تىڭ. ايماقتاعى قوعامدىق جۇمىستان قول ۇزگەن ەمەس. جاقىندا ءبىر كەزدە ءوزى قىزمەت ەتكەن باس باسىلىمنىڭ مەرەيتويىنا وراي وتكەن جيىندا «Egemen Qazaqstan» گازەتىنە – 100 جىل» ارنايى مەدالىمەن ماراپاتتالدى.
الماتى وبلىسى