وي بيىگىندەگى وتارباەۆ الەمى

اۋزىنان اينالايىنى تۇسپەيتىن ادام

جازۋشى راحىمجان وتارباەۆ شى­عار­ماشىلىعىن تانۋ ءبىر بولەك تە, جازۋ­شىنىڭ ادامي, تۇلعالىق قالىبىنا ءۇڭىلىپ, «اينالايىن» دەپ ءتىل قاتار اعالىق مەيىرىمىنە بولەنۋ – قولىنا قا­لام ۇستاعان كەز كەلگەن جاس تالاپكەر ءۇشىن ۇلكەن ونەگە مەكتەبى بولعانى انىق. سونىڭ اسەرى بولسا كەرەك, اعانىڭ «اي­نالايىنى» اتىراۋدىڭ ەكىنشى اتىنداي بولىپ كوڭىلگە ءسى­ڭىپ كەتكەنى. جايىقتىڭ جاعاسىن جاي­لاعان قوناقجاي قالاعا اسىعا جەتۋىمىزدىڭ دە سىرى وسىندا جاتسا كەرەك.

ۇشاقتان تۇسە سالا ۋاقىت وزدىرماي بىردەن تەاتر جاقتى بەتكە الدىق. بۇل جاقتا قازاقتىڭ اياۋ­لى جازۋشىسى, دراماتۋرگ راحىم­جان وتارباەۆ اتىن­داعى ءىىى رەسپۋبليكالىق تەاتر فەس­تي­ۆالىنە دايىندىق قىزۋ ءجۇرىپ جاتىر ەكەن. قۇرمانعازى اتىنداعى مادەنيەت سارايىنىڭ الدى قاراقۇرىم حالىق. اتى­راۋ اردا ۇلىن ساعىنىپتى. قىزىل كىلەم بويىمەن تەاتر ەسىگىنە بەت العان رەسپۋبليكانىڭ تۇكپىر-تۇكپىرىنەن ات ارىتىپ جەتكەن تەاترلار كوشى سۇڭعىلا سۋرەتكەردىڭ ەكىنشى ماڭگىلىك ءومىرىنىڭ باستالعانىن ايگىلەپ تۇر. جانى قالماي جاي­راڭداي قارسى الىپ جاتقان جايىق جۇرتىنىڭ اعەدىل پەيىلى دە وسىعان سەندىرەدى. كوڭىل ورنىنا تۇسەيىن دەدى.

راس, بىزدە دراماتۋرگ كوپ ەمەس. الىس-جاقىنعا ساۋىن ايتىپ, جەكە فەستيۆالىن وتكىزۋ بى­لاي تۇرسىن, جازعان ەڭبەگىن لايىقتى رەجيسسەرىنە تابىس­تاپ, كوڭى­لىندەگىدەي قويىلىمعا اينالدىرۋعا الەۋەتى جەتىپ جۇرگەنى دە تىم سيرەك. الەم كلاس­سيكاسىنا ءجيى يەك ارتىپ, اۋدارما پەسالارعا جالتاقتاۋدى الىمساقتان قا­لىپ­تى جاعدايعا اينالدىرعان قازاق تەاترلارىنىڭ ونەر تۋدىرۋ داعدىسىنا ابدەن ۇيرەنىپ قالعان حالىق ءۇشىن  جازۋشى-دراماتۋرگ راحىمجان وتارباەۆتىڭ اسقان جانكەشتىلىكپەن جىل سايىن تۋعان جەرى اتىراۋدى بىلاي قويعاندا, شىمكەنت پەن قىر­عىزستان استاناسىندا جەكە تەاتر­ فەس­تيۆالىن وتكىزۋى كەزىندە ۇلكەن جا­­ڭا­لىق بولعانى انىق. سونداي سات­تە جازىپ قانا قويماي, ءار تۋىن­دىسىنىڭ تاعدىرى ءۇشىن الاڭداپ, بايەك بولعان جازۋشى جانىنىڭ سەرگەكتىگىنە ءھام جان­كەشتىلىگىنە ءتانتى بولاتىنبىز. درا­ما­تۋرگتىڭ ءوزىنىڭ شاقىرۋىمەن سونداي تاماشا ونەر وقيعاسىنىڭ بىرنەشە مارتە كۋاسى بولۋ باقىتى بۇيىرعانى جاس تەاتر زەرت­تەۋشىسى رەتىندە بۇگىندە كوڭىلگە ۇل­كەن مەدەۋ.

 «باتىستىڭ ورالحانى»

جالپى, راحىمجان وتارباەۆ­تىڭ اسىرەسە جاستار كوڭىلىنە ەرەك­شە جاقىن بولۋىنا جاقسى ما­عىناسىندا جازۋشىنىڭ ءوزى «كىنالى». بىرىنشىدەن, سۇلۋ ءسوزدىڭ قاي­ماعىن ءسۇزىپ جازعان تا­ماشا تۋىن­دىلارى بولسا, ەكىن­شىدەن – قالام ۇستاپ, جازۋ الە­مىن ەندى اتتاعان جاس تالاپكەر­لەرگە اي­رىقشا مەيىرىمىن توگىپ, قامقورلىعىن ايا­ماۋى. «اينالايىن!» دەپ ماڭ­دايدان سۇيەر اعالىق اعەدىل پەيىلى دە قالامگەردىڭ الاقان جىلۋىن سەزىنگەن ءار جاستىڭ جۇرەگىندە جاتتالعانى انىق. 

ءالى ەستە, راحىمجان اعانى سىرت­تاي كو­رىپ جۇرگەنىمىزبەن, جا­قىنىراق تانىسۋ, تىلدەسۋ مۇم­كىندىگى اقىن ۇلىقبەك ەس­داۋلەتتىڭ 60 جاسقا تولعان مەرەيتويى­نا وراي ۇيىمداستىرىلعان سالتانات­تى جيىندا شىرايلى شىعىس جەرىندە تۋ­عان ەدى. سىرتتاي سۇستى كورىنگەنىمەن, ساح­ناعا شىقسا اي­رىقشا شابىتتانىپ, ادۋىنداپ سويلەپ كەتەر جازۋشىنىڭ ەرەك بولمىسى سوندا جاس جۋرناليست ءۇشىن ءدال كىتاپتارىنداي تىم-تىم قىزىق كورىنگەن. جيىن اياقتالعان سوڭ پىكىر سۇراي بارىپ, سوڭىندا: «وسى توپىراقتىڭ تۋماسى, تاماشا جازۋشى ورالحان بوكەيدى كورمەي قالۋىمىز – ءبىزدىڭ بۋىن­نىڭ ۇلكەن ءبىر وكىنىشى بولسا, بۇ­گىن ءسىزدىڭ كەربۇعىداي ساحناعا كەرىلە شىعىپ, يىعىڭىزعا تۇسكەن شاش­تى كەرى قايىرىپ تاستاپ, ەكپىن­دەپ سويلەۋىڭىز ەستەلىكتەن وقىپ تانىعان مۇزتاۋدىڭ مۇز­با­لاعى – ورالحاندى كوز ال­دى­­مىزعا اكەلگەندەي بولدى. مۇ­­نىڭ اسىرەسە شىعىس توپى­را­­عىن­داعى اسەرى ءتىپتى ەرەكشە ەكەن» دەگەنىمىزدە, سۋرەتكەر جار­قى­راي, ارقىراي ءبىر ك ۇلىپ الىپ: «اي­نالايىن, ورالحان شىعىس­تىڭ شايىرى بولسا, مەن سەن ءۇشىن باتىس­­تىڭ ورالحانى بولايىن. اتى­راۋدا دا ءبىر جازۋشى اعام بار دەپ ءبىل» دەپ, ماڭدايدان ءسۇيىپ, اعالىق اق تىلەگىمەن ء«بىز­دىڭ اۋىلدىڭ امازونكالارى» كىتا­بىن ۇسىنىپ ەدى سوندا. مىنە, سودان باستاپ وتارباەۆ الە­مى­نىڭ سۇلۋلىق تۇنعان سىرلى الەمى قول بۇلعاپ شاقىرا بەر­گەن. ادەبيەتتەن باستالعان ادەمى اسەر دراماتۋرگياسىنداعى ويلى سيۋجەت, شىم-شىتىرىق قايشى­لىقتار قىزىعىنا ۇلاسىپ, ەندى كىتابى عانا ەمەس, تەاتر ساحناسىن­داعى قويىلىمدارىن دا ءبىرىنشى بولىپ كورۋگە اسىعاتىن بولدىق.

 تۇلعالاردى تىرىلتكەن تالانت

«ول شىعارماشىلىققا بىر­دەن ءوز بيىگىن الىپ كەلدى دە سودان تومەن­دەگەن جوق. قازاق پرو­زاسىندا جازۋشىلار كوپ, تالانت­­تى جازۋشىلار دا از ەمەس. بىراق يۋمور, ساركازم ارقىلى قوعام­نىڭ شىندىعىن ايتقان سۋرەتكەرلەر سيرەك. مىنە, سول سيرەك سۋرەتكەردىڭ ءبىرى – را­حاڭ بولاتىن» دەيدى جازۋشى شى­عار­ماشىلىعى جونىندە ادە­بيەت سىنشىسى امانگەلدى كەڭ­شىلىك ۇلى. بۇل انىق­تاما قالام­گەردىڭ دراماتۋرگيا­سىنا دا ءتان دارالىق. كوركەم تىلمەن كەستەلەنگەن سۇلۋ سيۋجەت, قىزىقتى وقيعا ءھام وتكىر ويلار نەگىزىنەن تۇلعالار تابيعاتىن, باتىرلار بول­مىسىن تىرىلتۋگە باعىتتالعان تالانتتى تۋىندىلار دەسەك, تيتتەي دە ارتىق ايتقاندىق ەمەس. ويتكەنى راحىمجان دراماتۋرگياسى – سۇلتان بەيبارىس, ءور ماحام­بەت, حان جاڭگىر, سىرىم باتىر, مۇستافا شوقاي, تەمىربەك جۇرگەنوۆ, امىرە قاشاۋباەۆ, مۇقاعالي ماقاتاەۆ, فاريزا وڭعارسىنوۆا سىندى اياۋلى تۇل­عالاردى تىرىلتكەن ۇلتتىق درا­ماتۋرگيا. وتارباەۆتىڭ تەاتر­ الەمىندەگى ورنى سونىسىمەن  دە باعالى. ونىڭ دالەلى رە­­تىن­دە راحىمجان وتارباەۆ اتىن­­داعى تەاتر فەستيۆالىنىڭ بيىل­عى باعدارلاماسىنا ەنگەن سپەك­تاكلدەردى سانامالاپ بەرسەك تە جەتكىلىكتى دەپ ويلايمىز. سپەك­تاكل شىمىلدىعىن اشىپ بەرگەن ەلوردالىق ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنىڭ «امىرە» دراماسى (رەجيسسەرى – ن.جۇمانيازوۆ), ودان ءارى رەتى­مەن تىزبەلەنىپ كەتە بەرەتىن – ر.سەيت­مەتوۆ اتىنداعى تۇركىستان وبلىستىق سازدى دراما تەاترىنىڭ «مۇستافا شوقاي» (رەجيسسەرى – ا.ناۋرىزباەۆ), ق.جانداربەكوۆ اتىن­داعى جەتىساي دراما تەاترى­نىڭ «تۇنەك تورى» (رەجيس­سەرى – ە.قابدىل), ت.احتانوۆ اتىن­داعى اقتوبە وبلىستىق درا­ما تەاترىنىڭ «تەمىر – نار­كوم» (مەيرام حابيبۋللين), ج.شا­نين اتىنداعى شىمكەنت قالا­لىق اكادەميالىق قازاق دراما تەاترىنىڭ «باس»  (رەجيس­سەرى – ق.قاسىموۆ), اقمولا وبلىس­تىق ورىس دراما تەاترىنىڭ «سۇل­تان بەيبارىس» (ولگا لۋتسيە­ۆا), س.سەيفۋللين اتىن­داعى قا­راعاندى وبلىستىق اكادە­ميا­لىق قازاق دراما تەاترى مەن ن.ءجان­تورين اتىنداعى ماڭ­عىس­تاۋ وبلىستىق مۋزىكالىق دراما تەاترى قاتار دوداعا قوسقان رەجيسسەر نۇرلان جۇمانيازوۆتىڭ «مۇقاعالي مەن فاريزا» جانە فەستيۆالدى تۇيىندەگەن ماحام­بەت اتىنداعى اتىراۋ وبلىس­تىق اكادەميالىق قازاق دراما تەاترىنىڭ «جالعىزدىق» (رەجيس­سەرى – م.تومانوۆ) قويىلىمدارى تولىقتاي دالەل بولادى. 

ءباسى بيىك «باس»

بەس كۇن بويى اتىراۋ تو­پى­را­عى اقجارما تالانتىن ەسكە الىپ, تۇلعا رۋحىنا باس ءيدى. شى­عار­ماشىلىق مۇراسىنا جان-جاق­تى قىرىنان باعا بەرۋگە بىر­قاتار تالپىنىس جاسالدى.ادەبي تۋىندىلارىن تالداۋدى ادەبيەت سىنشىلارى مەن ادەبيەتتانۋشىلاردىڭ قۇزىرىنا قالدىرا تۇرىپ, ءبىز ءوزىمىز كۋا بولعان قويىلىمداردىڭ كور­كەم­دىك الەمى تۋرالى وي قورىتىپ كور­سەك.

راحىمجان وتارباەۆ – كور­كەم­دىك قۋاتى مىقتى تال­عامپاز قا­لام­گەر. ءار ءسوزىنىڭ اس­تارىندا ماز­­مۇنعا باي ما­عىنا مەن باتپانداي اۋىر سال­ماق تۇرادى. تۇيدەك-تۇي­دەك توگىلىپ كەتە بەرەتىن كەس­­تەلى ءتىلىن بىلاي قويعاندا, سۋ­رەت­كەر قالامىنا ساۋلە قۇي­عان شىعارمالارىنىڭ قاي-قاي­سىسىندا دا پسيحولوگيالىق تە­رەڭ­دىك, استارلى ماعىنا, پاراساتتى پايىم جاسىرىنىپ جا­­تادى. كەيبىر قالامگەرلەر سى­بىرلاپ ايتۋعا قورقاتىن ويلار اشىق اي­تىلادى. دراماتۋرگتىڭ سۋ­رەت­ك­ەر­لىك سۇڭعىلالىعىنىڭ سى­رى سول – ادام جانىن قوزعاي, اينا­لاسىن قاۋزاي جازۋىمەن قۇندى. قا­لامگەر الەمى سۇلۋلىققا, تازا­لىق­قا ءھام ساعىنىشقا تولى. جازۋشى تۋدىرعان بەينەلەر ءوزى­نىڭ ويلىلىعىمەن, ۇلتتىڭ ءۇنىن, قوعامنىڭ نەبىر ءتۇيىندى تۇيت­كىلدەرىن تارقاتۋعا, ءمان-ماعى­ناسىن اشۋعا ۇمتىلۋىمەن دە كورەرمەنىن بەيجاي قالدىر­مايدى. كەيىپكەرلەرىنىڭ قاي-قايسىسى دا ۇلتتان, قازاق دەگەن ەلدەن ءوزىن بولەك الىپ كور­­گەن ەمەس, قازاقى قالىپ, داع­دى-داس­تۇرىمەن بىرگە تىنىس­تاي­دى, بىرگە جاساي­دى. ساح­نادان كورەر­مەن ءوزىن كورەدى, جو­عالت­قانىن تابادى. باستىسى – ادامى ازىپ, پي­عىلى توزعان قوعامنىڭ توز-توز كەلبەتىنە ونەر بيىگىنەن كوز تىگەدى. وزىنشە ويلانىپ, وزىنشە تولعانادى.

ماسەلەن, تاقىرىپ وزەكتىلىگى تۇرعىسىنان دا, فورمالىق ىزدەنىس جاعىنان دا  راحىمجان وتارباەۆ دراماتۋرگياسىنىڭ شىڭى سانالاتىن «باس» دراماسىن الىپ قارايىق. بۇل جولى بىزگە رەجيسسەر قۋاندىق قاسىموۆتىڭ قولتاڭباسىندا ساحنا كورگەن ج.شانين اتىنداعى شىمكەنت قالالىق اكادەميالىق دراما تەا­ترى ۇجىمىنىڭ «باسىن» كورۋ مۇمكىندىگى بۇيىردى. وقيعا­نىڭ بارلىعى ساحنانىڭ ورتاسى­نان ويىپ ورىن العان جارىق جار­تى باستىڭ اينالاسىندا ءوربي­دى. كەرەكسىز كۇي كەشكەن ماحام­بەتتىڭ باسى... ءا دەگەندە تاڭىرقاي ءھام ۇرەيلەنە وقيعا ىشىنە ەنگەنىڭىزبەن, سيۋجەت دامي كەلە جانىڭىز ءتىپتى تۇرشىگەدى. بۇل جەردەگى باس – سيمۆول. ياعني, ماحامبەت قازاقتىڭ ءوزى بولسا, باس – سول ۇلتتىڭ بولمىسى, تەگى مەن تامىرى. ماحامبەتتىڭ باسىنا دەگەن نەمقۇرايلىلىق ۇلتتىق بولمىسقا, قازاقى قاسيەتكە, مىز­عىماس قۇندىلىقتارعا, جالپى تامىرلى تاريحىمىزعا دەگەن نەمقۇرايلىلىق دەپ تۇيەسىز ىشتەي. ەندى ويلاپ كورىڭىز, باسىنان ايىرىلعان ۇلتتىڭ كۇيى نەشىك؟ سپەكتاكل بويى وسى ءبىر سۇمدىق ويدىڭ شىرماۋىنان بوساي الماي, ىشتەي ءوز-وزىڭىزبەن ارپالىسىپ, قارا تەرگە تۇسەسىز. ءيا, بۇل – ونەر. ساحنا ءتىلى ارقىلى باسىنان, بولمىس-تامىرىنان ايى­رىلعان قازاقتىڭ كۇيى ءدال وسىلاي بولماق دەپ ەسكەرتۋ جاسايدى اۆتور. 

 راحىمجان رەكۆيەمى

بايقاپ, بايىپتاپ كورگەنىمىز­دەي, جالپى فەستيۆالعا قاتىسۋعا نيەت بىلدىرگەن قاي تەاتردىڭ دا راحىم­جان وتارباەۆ دراماتۋرگياسىن بارىنشا جۇيەلى يگەرۋگە دەگەن تالپىنىسى, قۇلشىنىسى قۋانتتى. ءار تەاتر شاما-شار­قىنىڭ جەتكەنىنشە جەلىپ كوردى. رەجيسسەرلەر جۇمىسىنان دا دراماتۋرگ شىعارماشىلىعىنا دەگەن زور قۇرمەتتىڭ لەبى سەزىلەدى. سو­نىقتان بولسا كەرەك, امىرەنىڭ انىن­دەي اسەرلى, اسەم باستالعان ونەر مەيرامى جات ەلدە ءجۇ­رىپ تۋعان جەرىنىڭ جۋسانىن اڭساعان بەيبارىس سۇلتاننىڭ سەزىم كۇ­يىندەي ماڭگىلىك سا­عىنىشقا ۇلاس­تى. سەبەبى جازۋشى اتىنداعى فەس­تيۆالعا جي­نالعان ءار قاتىسۋ­شىنىڭ جۇرەگىندە ءوزى تانىپ, ءوزى قۇر­مەت تۇتقان ءتول راحىمجانى ساي­راپ تۇرعان ەدى. سول سەزىمگە ەلىتىپ ولار ساحنادا ءسوز الدى. تەاتر ءتىلى ارقىلى ساعىنىشتارىن كەستەلەدى. اسىرەسە, راحىمجان وتار­باەۆتىڭ ءوزى ءومىرىنىڭ سو­ڭىنا دەيىن قىزمەت ەتكەن  ما­حامبەت اتىنداعى اتىراۋ تەاترى­­نىڭ «جالعىزدىق» قو­يىلىمى كوپ كوڭى­لىندە ەرەكشە جاتتالدى. ويت­كەنى سپەكتاكلدە جازۋشىنىڭ دا ىشكى مۇڭى مەن سىرى, جان جالعىز­دىعى جاتقانداي سەزىلدى. بۇل ويىمىزدى قويىلىم رەجيسسەرى دە قۋاتتاي ءتۇستى:

– «جالعىزدىق» اڭگىمەسىنىڭ جا­زىلۋ ءستيلى وزگەشە, تەرەڭ دۇ­نيە. جالعىزدىقتى جانىنا سە­رىك قىلعان شەرلى ادامنىڭ جال­عان دۇنيەدەن ابدەن جالىعىپ, كۇي­زەل­گەن جان داعدارىسىن جۇم­باق قۇبىلىس قالپىندا سۋرەتتەگەن. بارلىق ونەر تۋدىرۋشى حاس شەبەرلەردىڭ مۇڭىن ايتادى, جوقتايدى. اڭگىمەسىنىڭ باسىن راحاڭ «انام شامەننىڭ ء(شام­سيا) رۋحىنا» دەپ باستايدى. ەس­تۋىم بويىنشا قالامگەردىڭ اناسى جاستاۋ كەزىندە سۋعا كەتىپ قايتىس بولعان ەكەن... «كىم بار, ەي؟ قايىق اكەل, قايىق!» دەپ جانتالاسا ءتىرى جان يەسىن ىزدەۋى  راحاڭنىڭ ءوز عۇمىر كە­شۋ كەزەڭىنىڭ دە از قالعانىن اڭ­عار­تىپ, ءتىپتى ءوزى جاقىنداتىپ تۇرعانداي سەزىلدى ماعان, –  دەيدى رە­جيس­سەر مۇقانعالي تومانوۆ.

راسىمەن دە «جالعىزدىق» فەس­تيۆالدىڭ جاڭالىعى بولدى. تاقىرىبىمەن دە, تەرەڭدىگىمەن دە. فەستيۆالعا قاتىسقان قويى­لىم­نىڭ ەشبىرىنە ۇقسامادى. اتال­عان قويىلىمدى ءتىپتى «را­حىم­جان رەكۆيەمى» دەسە دە بول­عانداي... وسى ەرەكشەلىكتى ەس­كەرىپ, قازاقستاننىڭ ەڭبەك ەرى, كسرو جانە قازاقستاننىڭ حا­لىق ءارتىسى, مەملەكەتتىك سىي­­لىق­تىڭ لاۋرەاتى ءاسانالى ءاشى­موۆ, قازاقستاننىڭ حالىق ءارتىسى, رەجيسسەر ەسمۇحان وباەۆ باس­تاعان تەاتر ونەرى ماماندارىنان قۇرالعان قازىلار القاسى فەستيۆالدىڭ باس جۇلدەسىن  ءبىراۋىز­­دان م.وتەمىس ۇلى اتىن­داعى اتىراۋ وبلىستىق قازاق دراما تەاترى ۇجىمى ۇسىنعان «جالعىزدىق» قويىلىمىنىڭ قانجىعاسىنا بايلاپ بەردى.

– ادەبيەت پەن مادەنيەتكە تەڭدەي ۇلەس قوسقان راحىمجانداي پەر­زەنتىن ەلى ۇمىتپاۋى كەرەك. ول قازاقستاندى عانا ەمەس, الىس-جاقىن شەت مەملەكەت­تەر­دى مويىن­داتقان ساناۋ­لى سۋرەت­كەر­دىڭ ءبىرى. ونىڭ شى­عارماشى­لىعىن ناسيحاتتاۋ ءىسى قالامگەردىڭ ەلىندە ۇلكەن شا­راعا ۇلاسىپ جاتىر. بۇل – جا­زۋشىنىڭ ەكىنشى ماڭگىلىك ءومىرىنىڭ باستالعانىنىڭ ايعاعى. اقجارما تالانتىن ۇمىتپاي, ىزدەي­تىن قازاقتاي اردا ەلى باردا وتارباەۆ بيىگى الاسارمايدى, – دەدى ءاسانالى ءاشىموۆ.

جازۋشى رۋحىنا باعىشتالعان ايتۋلى ونەر دۋمانى اياسىندا, سونداي-اق, تاعى دا بىرقاتار تاعى­لىمدى ءىس-شارالار ءوتتى. سونىڭ نەگىزگىسى –  «راحىمجان وتارباەۆ رۋحانيات قورى» تۇساۋىنىڭ كەسىلۋى. جازۋشىنىڭ جارى ساۋ­لە وتارباەۆا اتاپ وتكەندەي, بۇل قور قالامگەر مۇراسىن كوپكە تانىس­تىرۋمەن قاتار, قولىنا قا­لام ۇستاعان تالانتتى جاس­تار شىعارماشىلىعىن قولداپ, نا­سيحات­تاۋعا دا كەڭ جول اشپاق.  

ء تۇيىن

...شىمىلدىق جابىلدى. فەس­تيۆال مارەسىنە جەتتى. بىراق را­حىم­جانتانۋ بيىگى استە مۇنى­مەن اياقتالعان جوق. تاماشا تە­ا­­­تر­­ شەرۋىمەن بىرگە سۋرەتكەردىڭ درا­­­­ما­تۋرگياداعى داڭعىل جولى, سۋ­رەت­كەرلىك سۇرلەۋى ماڭگىلىككە با­عىت بۇردى.

 «ادامزاتتىڭ ايتماتوۆى» اتان­عان تالانت شىڭعىس ايتما­توۆ كەزىندە  راحىمجان وتارباەۆ شىعارماشىلىعى تۋراسىندا: «راحىمجان –  ينتەللەكتۋالدى قازاق پروزاسىنىڭ حح عاسىرداعى وزىق وكىلى» دەپ جوعارى باعا بەرىپتى. بۇدان اسىرىپ ايتۋ مۇم­كىن دە ەمەس. ويتكەنى وتارباەۆ الەمى – ويدىڭ الەمى.

اتىراۋ اسپانى جىلاپ تۇر...