ايىرتاۋ اۋدانىنىنىڭ پاترۋلدىك پوليتسەيلەرى بالالاردى ورتتەن امان الىپ قالدى.
وقىس وقيعا ساۋمالكول اۋىلىندا تىركەلگەن. «كوكشەتاۋ-رۋزاەۆكا» تراسساسى بويىندا قىزمەت كورسەتىپ جۇرگەن پاترۋلدىك پوليتسيا ينسپەكتورلارى ۇيلەردىڭ ءبىرى وتقا ورانعانىن بايقاپ قالادى.
«ارىپتەسىم ەكەۋىمىز «كوكشەتاۋ-رۋزاەۆكا» اۆتوجولىندا كەزەكشىلىكتە جۇرگەنبىز. تاڭعى ساعات 6 كەزىندە جانارماي قۇيۋ ستانتسياسىنا جاقىن ءۇيدىڭ ورتەنىپ جاتقانىن كورىپ, جەدەل جاردەمگە ۇمتىلدىق. باسپاناعا جاقىنداعانىمىزدا كومەك سۇراعان داۋىستاردى ەستىدىك. قىزىل ءتىلى سۋماڭداعان ءورت ىشىنەن بالالار مەن ەكى ايەلدى الىپ شىقتىق» دەيدى پاترۋلدىك پوليتسيا قىزمەتكەرى ەرلان دانكين.
ءۇي ىشىندە ەكى ايەل جانە كامەلەتكە تولماعان ءتورت بالا بولعان. 60 جاستاعى ايەل وقىس دىبىستان ويانىپ كەتكەن. وسى كەزدە كومەككە جەتىپ ۇلگىرگەن ءتارتىپ ساقشىلارىنا ءبىر جاسار جانە سەگىز ايلىق قىزداردى قۇتقارادى. قويۋ تۇتىنگە ورانعان بولمەنىڭ ىشىنە ازامات بۋكۋەۆ كىرىپ, 7 جانە 17 جاسار قىز بالانى, ءۇيدىڭ يەسى مەن 34 جاستاعى تۋىسىن سىرتقا شىعارادى. ۇيدە ەشكىمنىڭ قالماعانىنا كوز جەتكىزگەن ءتارتىپ ساقشىلارى كەزەكشى بولىمگە ءورت تۋرالى حابارلاپ, ءورت سوندىرۋشىلەردى جانە جەدەل جاردەم شاقىرعان.
دارىگەرلەر بالالاردىڭ دەنساۋلىعىنا ەشقانداي كىنارات كەلمەگەنىن انىقتاعان.