بۇل جونىندە 2019 جىلدىڭ ناتيجەسى بويىنشا وبلىستاعى مىقتى سپورتشىلار مەن جاتتىقتىرۋشىلاردى ماراپاتتاۋ سالتاناتىندا ايتىلدى. وبلىستا بۇگىندە سپورت پەن دەنەشىنىقتىرۋعا زور ءمان بەرىلەدى. وڭىردە تۇرعىنداردىڭ 34 پايىزى سپورت پەن دەنەشىنىقتىرۋدى جانىنا سەرىك ەتكەن. ول ءۇشىن وبلىستا مۇمكىندىگىنشە ءتۇرلى جاعداي جاسالىپ جاتىر.
«مەملەكەتتىك-جەكەمەنشىك ارىپتەستىك جوبالارىن جۇزەگە اسىرۋ بارىسىندا قوستاناي قالاسىندا جاڭا مۇز ايدىنى بار سپورت سارايىنىڭ قۇرىلىسى جالعاسىپ جاتىر. وندا مۇز ايدىنىنان وزگە 50 مەترلىك باسسەين دە ورىن الادى. 2020 جىلى شاڭعى بازاسىنىڭ قۇرىلىسى مەن بوكس مەكتەبىن قايتا جوندەۋ جۇمىستارى جوسپارلانىپ وتىر. ونىڭ سىرتىندا 6 دەنەشىنىقتىرۋ-ساۋىقتىرۋ كەشەندەرى قۇرىلىسىنىڭ جوباسى قارالىپ جاتىر» دەدى وبلىس اكىمى ارحيمەد مۇحامبەتوۆ سپورتشىلاردى قۇتتىقتاۋ سوزىندە.
وبلىستا وليمپيادالىق دايىندىق ورتالىعى مەن جوعارى سپورتتىق شەبەرلىك مەكتەبى جۇمىس ىستەيدى. قازاقستان رەسپۋبليكاسى قۇرامالارىنىڭ قاتارىندا 722 قوستانايلىق ۇزدىك سپورتشىلار ەل نامىسىن قورعاپ ءجۇر.