ب.مومىش ۇلى: قازاق حالقىنىڭ ۇلدارى وتان الدىنداعى مىندەتىن ابىرويمەن ورىندايدى

1942 جىلعى 4 يانۆاردا قازاقستان دەلەگاتسياسىنىڭ پرەدسەداتەلى, كك(ب)پ ورتالىق كوميتەتتىڭ قىزمەتكەرى قابىلباەۆ جولداس مەنىمەن اڭگىمەلەسكەندە, ءبىزدىڭ ديۆيزيانى تولىقتىراتىن اسكەرلەردى ىرىكتەپ الۋعا ءسىزدى ايرىقشا قاتىناسىپ وتىرعانىڭىزدى ايتتى.بۇل اڭگىمەدەن بىرنەشە كۇن وتكەننەن كەيىن ءبىزدى تولىقتىرۋعا جاڭا كۇشتەر كەلدى. مەن ولارعا ەرەكشە كوڭىل ءبولىپ, جاڭا كەلگەن جاۋىنگەرلەردى بولىمشەلەرگە تاراتۋعا قاتىناستىم. جاسىراتىنى جوق, بۇلار ول كەزدە ماعان ۇنامادى. سترويدا بولماعان, يكەمدىلىگى كەم, وزدەرى وتە جاس, العاشقى ۇرىستا-اق قوياننىڭ كوجەگىندەي جان-جاققا قاشىپ كەتە مە دەپ ويلادىم. قىسقاسى جاڭا كەلگەن جاۋىنگەرلەرمەن ءبىرىنشى ۇرىسقا شىققانعا دەيىن مەن ىشىمنەن قاۋىپتەنىپ ءجۇردىم.ولاردى دايارلاۋعا بىزگە تەك ءبىر اپتا ۋاقىت بەرىلدى. بۇل ۋاقىتتىڭ ىشىندە ءبىز ولارمەن ابدەن تۇسىنىسۋگە ۇلگەرە المادىق, ۇيىمداستىرۋ ماسەلەلەرىن ۇنەمى اسىعىس شەشىپ وتىردىق. بىزگە وتە قيىن, جاۋاپتى جاۋىنگەرلىك مىندەت جۇكتەلدى. سولتۇستىك-باتىستىڭ ىزعارلى قىسى جاعدايىندا قىرىق گرادۋس ايازدا جولسىز ەرەجەلەرمەن ۇزاق جول ءجۇرىپ, قيىن جورىق جاساۋعا, مايداندى بۇزىپ وتۋگە, گيتلەرشىلەردىڭ توناۋشى ارمياسىن تۇتاس ارميالىق توپتارىن ءبولىپ الىپ, قىزىل ارميانىڭ باسقا بولىمدەرىمەن بىرگە كۇش قوسىپ, وككۋپانتتاردى قورشاپ, قۇرتۋعا تۋرا كەلدى.ءبىز جولسىز جەرلەرمەن, كۇرتىك قاردا, دۇشپاننىڭ جەردەن جانە اۋەدەن جاۋدىرعان وعى استىندا, جاۋدىڭ قيىر تىلىندا سوعىسا وتىرىپ, جاۋدىڭ قارسىلىعىن جەڭە وتىرىپ 200 كيلومەتر العا باستىق. بۇل ۇرىستاردىڭ ناتيجەسىندە ءبىز 62 دەرەۆنيانى فاشيستەردىڭ تەپكىسىنەن ازات ەتتىك. بۇل دەرەۆنيالاردا سوۆەت ۇكىمەتى قايتا ورناتىلدى. فاشيستەر ۇرىس مايدانىندا 2 مىڭ ادامنىڭ ولىگىن قالدىرىپ كەتتى. ءبىزدىڭ بولىمشە دۇشپاننان 125 اۆتومات, 13 تانك, 16 زەڭبىرەك پەن مينومەت, كوپ وق-ءدارى, ازىق-ت ۇلىك, سوعىس جابدىعىن جانە باسقا كوپ قارۋ-جاراق قولعا ءتۇسىردى.

بۇل كەسكىلەسكەن قاتتى ۇرىستاردا قازاقستاننىڭ ۇلدارى نەمىس وككۋپانتتارعا قارسى قالاي كۇرەسىپ, ولاردى قالاي راقىمسىز كۇيرەتۋ كەرەك ەكەنىن تاعى دا ايقىن كورسەتتى. وزدەرىنىڭ سۇيىكتى سوتسياليستىك وتانىنا, وزدەرىنىڭ حالقىنا, كوممۋنيست پارتياسىنا, سۇيىكتى كوسەمىمىز ي. ۆ. ستالينگە شىن بەرىلگەندىكتىڭ ۇلگىسىن, وتان قورعاۋ حالىق كوميسسارى جانە سۇيىكتى باس كومانداشامىز ستالين جولداستىڭ بۇيرىعىن ورىنداۋدىڭ ۇلگىسىن كورسەتتى.ءبىز قىزىل ارميانىڭ شىن جاۋىنگەرىنە, سوۆەت پاتريوتىنا لايىقتى اسقان ەرلىكپەن, جاناياماي سوعىستىق, باتىرلىقتىڭ, جۇرەكتىلىكتىڭ ۇلگىسىن كورسەتتىك – ديۆيزيانىڭ كوماندوۆانيە ءبىزدىڭ جاۋىنگەرلىك قيمىلدارىمىزعا وسىنداي باعا بەردى. مەن تالاي ۇرىستارعا قاتىسقان كومانديرمىن, سوندىقتان ءبىزدىڭ جاۋىنگەرلەردىڭ كومانديرلەر مەن ساياسي قىزمەتكەرلەردىڭ كوماندوۆانيەدەن ونداي زور باعا الۋعا لايىقتى جاۋىنگەرلىك قيمىلدارىن ءوز كوزىممەن كوردىم.سىزدەر جىبەرگەن جاس جاۋىنگەرلەر مەنىڭ العاشقى قاۋىپتەن­گەنىمدەي بولماي شىقتى, ولار نەگىزىندە وزدەرىن جاقسى ۇستاپ, ەرلىك, جۇرەكتىلىك, باتىرلىق كورسەتتى. جاس جاۋىنگەرلەر اسقان كۇشتى جىگەرمەن, جاس قىراندارداي تايىنباي ۇرىسقا ۇمتىلدى. جارايسىڭ, جىگىتتەر, جارايسىڭ, قازاق ۇلدارى. بۇل ۇرىستاردا جاڭا كەلگەن جاس جاۋىنگەرلەردىڭ ىشىنەن لەنينوگورسك جۇمىسشىسى باتتالوۆ جۇماجان جولداس, وڭتۇستىك قازاقستان وبلىسىنىڭ سارىاعاش اۋدانىنداعى ستالين كولحوزىنان ەگەنبەرديەۆ جالىنبەك جولداس جانە باسقالارى ەرەكشە ەرلىك كورسەتتى, ۇكىمەتتىڭ ناگرادىنا ۇسىنىلدى.اسىرەسە, لەنينوگورسك جۇمىسشىسى گۆاردەەتس قىزىل اسكەر تولەگەن توقتاروۆ ۇزدىك ەرلىك كورسەتتى. ول ۇرىستاردىڭ بىرىندە باتىر ولىممەن قازا تاپتى. ءبىز تولەگەندى ۇكىمەتتىڭ ەڭ جوعارى ناگرادىنا – لەنين وردەنى مەن سوۆەتتەر سويۋزىنىڭ گەرويى اتاعىن بەرۋگە ۇسىندىق.باسقا جاۋىنگەرلەردىڭ جاۋىنگەرلىك, ەرلىك ىستەرى تۋرالى جازۋعا ۋاقىت جوق, بىراق ماڭگى وشپەيتىن اتاققا يە بولعان 28 گەرويلار سياقتى باسقا جاۋىنگەرلەردىڭ دە ەرلىكتەرى ءبىزدىڭ پولكتىڭ داڭقتى تاريحىنان كورنەكتى ورىن الدى. قىسقاسىنان ايتقاندا قازاقستان بىزگە تاماشا جاۋىنگەرلەر جىبەرگەن.بىزگە گۆاردەەتس جاۋىنگەرلەر بەرگەنىڭىز ءۇشىن العىس ايتامىز.جاستاردى كوممۋنيستىك رۋحتا, ءوز وتانىنا شىن بەرىلگەندىك رۋحىندا تاربيەلەگەن قازاقستان كومسومولىنا العىس ايتامىز.

كوممۋنيستىك سالەممەن:ن. گۆارديا اتقىشتار پولكى كومانديرىنىڭ ورىنباسارى – كاپيتان باۋىرجان مومىش ۇلى.سولتۇستىك-باتىس مايدانى.

«سوتسياليستىك قازاقستان», 1 اپرەل, 1942 جىل